Sahibə Qafarova: TÜRKPA-nın adının “Türk Dövlətləri Parlament Assambleyası” kimi dəyişdirilməsi təşkilatımızın tarixində keyfiyyət baxımından yeni bir səhifə açır

Sədrin səfərləri
24 iyun 2022 | 16:52   
Paylaşın:        

İyunun 24-də Qırğızıstan Respublikasının Çolpon-Ata şəhərində TÜRKPA-nın 11-ci plenar İclasının yekunlarına həsr edilmiş mətbuat konfransı keçirilib. Mətbuat konfransında təşkilata üzv dövlətlərin parlament sədrləri iştirak ediblər.

Milli Məclisin sədri Sahibə Qafarova media nümayəndələrinə tədbirin yekunları ilə bağlı açıqlama verərək deyib ki, Azərbaycan Respublikasının Milli Məclisi TÜRKPA çərçivəsində fəaliyyətinə böyük əhəmiyyət verir və qardaş ölkələrin parlamentləri arasında həm ikitərəfli, həm də çoxtərəfli əməkdaşlığın inkişafı istiqamətində səylərini davam etdirir.

O, TÜRKPA-nın 11-ci plenar iclasının uğurla başa çatdığını bildirərək, həm şura iclasının, həm də plenar iclasın gündəliyinin kifayət qədər zəngin olduğunu qeyd edib. Spiker vurğulayıb ki, gündəliyə daxil olan bütün məsələlər işgüzar şəraitdə müzakirə olundu və müvafiq qərarlar qəbul edildi. Sahibə Qafarova xüsusilə TÜRKPA-nın 11-ci plenar iclası çərçivəsində qəbul edilmiş ən mühüm qərarlardan biri kimi, “Türkdilli Ölkələrin Parlament Assambleyası”nın adının “Türk Dövlətləri Parlament Assambleyası”na dəyişdirilməsini qeyd edib. Spiker vurğulayıb ki, bu qərar təşkilatımızın tarixində keyfiyyət baxımından yeni bir səhifə açır və bizlərin qarşılıqlı etimad və dəstəyə əsaslanan parlamentlərarası əməkdaşlığımızı daha da gücləndirmək niyyətimizi əks etdirir.

Milli Məclisin sədri, həmçinin qeyd edib ki, qurumun ayrı-ayrı komissiyalarının iclasları, qarşılıqlı maraq doğuran mövzulara həsr edilmiş seminarlar, qanunvericilik sahəsində təcrübə paylaşımı, seçki və referendum müşahidə missiyaları TÜRKPA-nın məhsuldar fəaliyyətinin nəticələridir. Xüsusən beynəlxalq parlament təşkilatları çərçivəsində birgə fəaliyyətimiz və səmərəli əməkdaşlığımız da uğurla davam etdirilir. O, həmçinin 11-ci plenar iclasın yekunlarına dair qəbul olunmuş Çolpon-Ata Bəyannaməsinin də əhəmiyyətini qeyd edib. Vurğulayıb ki, Bəyannamədə bir çox önəmli məsələlərə dair fikir birliyimiz və ortaq mövqeyimiz öz əksini tapıb. Bu mənada, Bəyannamə qardaş ölkə parlamentlərinin qarşılıqlı etimad və dəstəyi baxımından əhəmiyyətlidir. Milli Məclisin sədri, xüsusən Azərbaycanın işğaldan azad olunmuş torpaqlarının bərpası və yenidən qurulması istiqamətində göstərdiyi səylərlə bağlı Azərbaycan Respublikası ilə həmrəyliyin nümayiş etdirilməsinə, türk dövlətləri arasında daha qısa və effektiv nəqliyyat bağlantısı olacaq Zəngəzur dəhlizinin təşviqinə görə qardaş ölkə parlamentlərinə öz təşəkkürünü bildirib.

Yekunda spiker Sahibə Qafarova əminliyini ifadə edib ki, TÜRKPA-nın Çolpon-Ata şəhərində keçirilmiş 11-ci plenar iclası təşkilatın qarşısında dayanan vəzifələrin yerinə yetirilməsi baxımından böyük əhəmiyyətə malikdir. Spiker toplantıda qəbul edilmiş qərarların qardaş xalqlarımız və dövlətlərimiz arasında münasibətlərin daha da dərinləşməsi, birgə maraqlarımızın müdafiəsi işinə öz töhfəsini verəcəyinə əminliyini ifadə edib.

Milli Məclisin Mətbuat və
ictimaiyyətlə əlaqələr şöbəsi  



Azərbaycan Respublikasının Milli Məclisi — Azərbaycan Respublikasında qanunvericilik hakimiyyətini həyata keçirən dövlət hakimiyyəti orqanı. Birpalatalı orqan olub 125 deputatdan ibarətdir. Deputatlar majoritar seçki sistemi, ümumi, bərabər və birbaşa seçki hüququ əsasında sərbəst, şəxsi və gizli səsvermə yolu ilə seçilirlər. Azərbaycan Respublikası Milli Məclisinin hər çağırışının səlahiyyət müddəti 5 ildir.

AZ EN RU