Milli Məclisdə görüş

Tədbirlər
12 iyul 2021 | 18:25   
Paylaşın:        

İyulun 12-də Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov və Azərbaycan-Niderland parlamentlərarası əlaqələr üzrə işçi qrupunun rəhbəri Eldar Quliyev Niderland Krallığının Azərbaycandakı səfiri Pauline Eizema ilə görüşüblər.

Səməd Seyidov xanım səfiri salamlayaraq onun bu günlərdə diplomatik korpusun nümayəndələri ilə Füzuli və Şuşaya səfərini yüksək qiymətləndirib. Cari ilin iyunun 18-də Milli Məclisdə Niderland parlamenti tərəfindən Azərbaycana qarşı qərəzli və birtərəfli qaydada qəbul edilən qətnamələrin kontekstində Azərbaycan-Niderland ikitərəfli münasibətlərinin müzakirə olunması barədə məlumat verib.

Azərbaycan-Niderland parlamentlərarası əlaqələr üzrə işçi qrupunun rəhbəri Eldar Quliyev isə diqqətə çatdırıb ki, Niderland parlamenti Milli Məclisin bu məsələ ilə bağlı müraciətlərinə, dialoq təkliflərinə heç bir reaksiya verməyib və hər hansı bir fikir mübadiləsindən yayınıb.

Pauline Eizema Niderland parlamentinin Milli Məclisin məktub və müraciətlərinə cavab verməməsini və birtərəfli qərarların qəbulunu Niderland cəmiyyətinin erməni diasporunun məlumat selinə məruz qalması ilə əlaqələndirib. O, səfir kimi bölgədə gedən prosesləri hökumətinə olduğu kimi çatdırdığını, bu məsələlərdə parlamentdən fərqli olaraq Niderland hökumətinin balanslaşdırılmış yanaşma sərgilədiyini qeyd edib.

Sonra görüşdə Azərbaycanla Niderland arasında parlamentlərarası əməkdaşlığın gələcəyi və digər məsələlər müzakirə edilib.

Milli Məclisin Mətbuat və

ictimaiyyətlə əlaqələr şöbəsi



Azərbaycan Respublikasının Milli Məclisi — Azərbaycan Respublikasında qanunvericilik hakimiyyətini həyata keçirən dövlət hakimiyyəti orqanı. Birpalatalı orqan olub 125 deputatdan ibarətdir. Deputatlar majoritar seçki sistemi, ümumi, bərabər və birbaşa seçki hüququ əsasında sərbəst, şəxsi və gizli səsvermə yolu ilə seçilirlər. Azərbaycan Respublikası Milli Məclisinin hər çağırışının səlahiyyət müddəti 5 ildir.

AZ EN RU