07 iyul 2026

Layihə

AZƏRBAYCAN RESPUBLİKASININ QANUNU

Azərbaycan Respublikasının Əmək Məcəlləsində, Azərbaycan Respublikasının Mülki Məcəlləsində, “Valyuta tənzimi haqqında”, “Banklar haqqında”, “İnvestisiya fondları haqqında” və “Qiymətli kağızlar bazarı haqqında” Azərbaycan Respublikasının qanunlarında dəyişiklik edilməsi barədə

Azərbaycan Respublikasının Milli Məclisi Azərbaycan Respublikası Konstitusiyasının 94-cü maddəsinin I hissəsinin 10-cu, 12-ci, 13-cü, 15-ci, 16-cı, 20-ci və 27-ci bəndlərini rəhbər tutaraq qərara alır:

Maddə 1. Azərbaycan Respublikasının Əmək Məcəlləsində (Azərbaycan Respublikasının Qanunvericilik Toplusu, 1999, № 4, maddə 213 (Cild I); 2024, № 1, maddə 6, № 4, maddə 365, № 7, maddə 744, № 8, maddə 934; 2025, № 1, maddələr 1, 16, № 2, maddə 96, № 4 (I kitab), maddə 322, № 7, maddələr 606, 608; 2026, № 1, maddələr 8, 16, № 2, maddə 110, № 3, maddə 209; Azərbaycan Respublikasının 2026-cı il 3 mart tarixli 376-VIIQD nömrəli, 10 aprel tarixli 383-VIIQD nömrəli, 27 aprel tarixli 394-VIIQD nömrəli və 1 may tarixli 401-VIIQD nömrəli qanunları) aşağıdakı dəyişikliklər edilsin:

1.1. 3-cü maddəyə aşağıdakı məzmunda 7-1-ci hissə əlavə edilsin:

“7-1. İşçilərin pay (səhm) iştirakı planı haqqında müqavilə – kommersiya hüquqi şəxsin  təsisçisinin (iştirakçısının) və ya onun verdiyi səlahiyyət əsasında işəgötürənin təşəbbüsü ilə işçiyə güzəştli şərtlərlə və ya ödənişsiz əsasla müəssisənin paylarının (səhmlərinin) verilməsi və ya gələcəkdə onları əldə etmək (almaq) hüququnun tanınması ilə bağlı məsələləri tənzimləyən ayrıca müqavilə.”;

1.2. aşağıdakı məzmunda 7-1-ci və 76-1-ci maddələr əlavə edilsin:

“Maddə 7-1. İşçilərin pay (səhm) iştirakı planı haqqında müqavilənin şərtləri

7-1.1. Təsisçi və ya işəgötürənlə işçi arasında bağlanan işçilərin pay (səhm) iştirakı planı haqqında müqavilədə payların (səhmlərin) işçinin tam mülkiyyətinə keçməsi üçün aşağıdakı xüsusi şərtlərdən biri müəyyən edilə bilər:

7-1.1.1. zamana əsaslanan şərt: tərəflər arasında müəyyən edilmiş müddət ərzində işçinin işəgötürənlə əmək münasibətlərində olması şərtilə paya (səhmə) olan hüququnun hissə-hissə və ya müddətin sonunda tam qüvvəyə minməsi;

7-1.1.2. hədəfə əsaslanan şərt: işçinin və ya kommersiya hüquqi şəxsin fəaliyyətində müəyyən hədəflərə nail olunması şərtilə paya (səhmə) olan hüququnun qüvvəyə minməsi.

7-1.2. Tərəflər işçilərin pay (səhm) iştirakı planı haqqında müqavilədə bu Məcəllənin 76-1.1-ci maddəsinə uyğun olaraq, əmək münasibətlərinə xitam verilməsi əsaslarından asılı olaraq paya (səhmə) olan hüquqlarının əldə edilib-edilməməsi nəticələrini müəyyən edə bilərlər.”;

 “Maddə 76-1. Əmək münasibətlərinə xitam verilməsinin işçilərin pay (səhm) iştirakı planı haqqında müqaviləyə təsiri

76-1.1. İşçilərin pay (səhm) iştirakı planı haqqında müqavilədə işçi ilə əmək münasibətlərinə xitam verildikdə, həmin xitamın əsaslarından asılı olaraq işçinin paya (səhmə) olan hüquqlarına və ya əldə etdiyi paylara (səhmlərə) fərqli hüquqi nəticələr nəzərdə tutula bilər.

76-1.2. Bu Məcəllənin 69-cu maddəsi, 70-ci maddəsinin “a”, “b”, “d” və “e” bəndləri, 73-cü maddəsi, 74-cü maddəsinin birinci hissəsinin “a”, “b”, “c”, “d”, “e” və “ə” bəndləri ilə əmək müqaviləsinə xitam verilməsi hallarında işçinin əldə edilməmiş paya (səhmə) olan hüquqlarının hamısının və ya bir hissəsinin əldə edilmiş hesab edilməsi və ya əldə edilmiş payların (səhmlərin) ədalətli bazar dəyəri ilə kommersiya hüquqi şəxsə və ya təsisçiyə (iştirakçıya) geri satılması öhdəliyi nəzərdə tutula bilər.

76-1.3. Bu Məcəllənin 70-ci maddəsinin “c” və “ç” bəndləri, 74-cü maddəsinin birinci hissəsinin “ç” və “f” bəndləri ilə əmək müqaviləsinə xitam verilməsi hallarında işçilərin pay (səhm) iştirakı planı haqqında müqavilədə işçinin bütün əldə edilməmiş paya (səhmə) olan hüquqlarını itirməsi və ya əldə etdiyi payları (səhmləri) nominal və ya daha aşağı dəyərlə kommersiya hüquqi şəxsə və ya təsisçiyə (iştirakçıya) geri satılması ilə bağlı hüquqi nəticələr nəzərdə tutula bilər.”;

1.3. 154-cü maddəyə aşağıdakı məzmunda 4-cü hissə əlavə edilsin:

“4. İşçinin pay (səhm) iştirakı planı haqqında müqavilənin tələblərinə uyğun olaraq əldə edilən pay (səhm) əmək haqqına daxil edilmir və əmək haqqı əvəzi kimi ödənilmir.”.

Maddə 2. Azərbaycan Respublikasının Mülki Məcəlləsində (Azərbaycan Respublikasının Qanunvericilik Toplusu, 2000, № 4 (I kitab), maddə 250 (Cild I); 2024,     № 2, maddə 138, № 4, maddə 365, № 5 (I kitab), maddə 493, № 7, maddə 744, № 12     (I kitab), maddə 1281; 2025, № 1, maddə 17, № 3, maddə 216, № 4 (I kitab), maddələr 315, 318, № 6, maddələr 523, 524, 536, № 7, maddələr 610, 626, № 8, maddələr 738, 741, 743, 744, № 11, maddə 1004; 2026, № 1, maddə 2, № 3, maddə 208) aşağıdakı dəyişikliklər edilsin:

2.1. aşağıdakı məzmunda 61.7-1-ci, 64.10-cu, 65-1-ci, 65-2-ci və 88.3-cü maddələr əlavə edilsin:

“61.7-1. Bu Məcəllənin 404-4.3-cü maddəsində nəzərdə tutulan halda gələcək iştirak payı (səhm) haqqında müqavilə üzrə investorun ödəniş tələbləri, hüquqi şəxsin digər təminatsız kreditorlarının tələblərindən sonra, lakin hüquqi şəxsin iştirakçılarına (səhmdarlarına) qalıq əmlakın verilməsindən (bölüşdürülməsindən) əvvəl yerinə yetirilir.”;

 “64.10. Bu Məcəllənin 90.4-cü və 104.1-ci maddələrinin tələblərindən fərqli olaraq təsərrüfat cəmiyyətinin nizamnaməsi ilə direktorlar şurasına (müşahidə şurasına) təsisçilərin (iştirakçıların) ümumi yığıncağını çağırmadan, nizamnamədə əvvəlcədən yuxarı həddi nəzərdə tutulmuş, lakin şərtləri (hüquqları, imtiyazları və məhdudiyyətləri) hələ müəyyən edilməmiş yeni payların ayrılması və ya səhmlərin buraxılması barədə qərar qəbul etmək səlahiyyəti verilə bilər. Bu payların (səhmlərin) emissiya şərtləri direktorlar şurasının (müşahidə şurasının) qərarı ilə müəyyən edilir və bununla bağlı nizamnaməyə edilən dəyişikliklər qanunla müəyyən edilmiş qaydada dövlət qeydiyyatına alınır.”;

 “Maddə 65-1. Korporativ müqavilə

65-1.1. Məhdud məsuliyyətli cəmiyyətin iştirakçıları və ya səhmdar cəmiyyətinin səhmdarları, habelə korporativ müqavilədən irəli gələn öhdəliklərin icrasında iştirakı zəruri olduğu hallarda cəmiyyətin özü, öz aralarında və ya cəmiyyətlə öz korporativ hüquqlarının həyata keçirilməsi qaydasını və cəmiyyətin fəaliyyətinin təmin edilməsi və idarə edilməsi ilə bağlı məsələləri müəyyən edən korporativ müqavilə bağlaya bilərlər. Korporativ müqaviləyə əsasən həmin subyektlər öz hüquqlarını bu müqavilə ilə müəyyən edilmiş qaydada həyata keçirməyi və ya onların həyata keçirilməsindən çəkinməyi (imtina etməyi) öhdələrinə götürürlər.

65-1.2. Korporativ müqavilədə təsisçilərin (iştirakçıların) aşağıdakı məsələlərlə bağlı hüquq və vəzifələri bu Məcəllə ilə və digər normativ hüquqi aktlarla müəyyən edilmiş tələblərə zidd olmamaq şərtilə tənzimlənə bilər:

65-1.2.1. təsərrüfat cəmiyyətinin təsisçilərinin (iştirakçılarının) ümumi yığıncağında səsvermə qaydaları və şərtləri;

65-1.2.2. təsərrüfat cəmiyyətinin nizamnamə kapitalındakı payların (səhmlərin) özgəninkiləşdirilməsi qaydaları, müəyyən qiymətə və ya müəyyən hallar baş verdikdə həmin payların (səhmlərin) alınması, yaxud da onların əldə edilməsindən və ya özgəninkiləşdirilməsindən imtinanı, o cümlədən payların (səhmlərin) qiymətinin müəyyən edilməsi qaydasını və bu Məcəllənin 93-cü və 101-ci maddələrində nəzərdə tutulan qaydalardan fərqli olaraq bu Məcəllənin 65-2-ci maddəsində nəzərdə tutulan xüsusi hüquqların tətbiqi;

65-1.2.3. təsərrüfat cəmiyyətinin idarə edilməsi üzrə, o cümlədən cəmiyyətin idarəetmə orqanlarının formalaşdırılması və fəaliyyətinin təşkili üzrə şərtlər;

65-1.2.4. korporativ müqavilənin tərəfi olan təsərrüfat cəmiyyətinin təsisçilərinə (iştirakçılarına) məxsus payların (səhmlərin) tam mülkiyyət hüququnun korporativ müqavilədə nəzərdə tutulmuş hədəflərə çatmaqdan asılı olaraq tədricən yaranması qaydaları və şərtləri, o cümlədən həmin müddət bitənədək və ya hədəflərə çatılmadıqda payların (səhmlərin) cəmiyyət və ya digər iştirakçılar tərəfindən geri alınması mexanizmləri;

65-1.2.5. korporativ müqavilənin tərəfi olan və eyni zamanda təsərrüfat cəmiyyəti ilə əmək münasibətlərində olan təsisçinin (iştirakçının) onunla olan əmək münasibətlərinə xitam verilməsinin əsaslarından asılı olaraq paylarını (səhmlərini) digər iştirakçılara və ya cəmiyyətə geri satması və həmin satış üzrə qiyməti və şərtləri müəyyən edən müddəalar;

65-1.2.6. mübahisələrin həlli qaydası, tərəflər arasında fikir ayrılığı yarandıqda tətbiq ediləcək mübahisələrin həlli üsulları, o cümlədən arbitraj və tətbiq ediləcək hüquq barədə şərtlər;

65-1.2.7. cəmiyyətin idarə edilməsində korporativ müqavilə iştirakçıları üçün xüsusi əhəmiyyət kəsb edən məsələlərin (qorunan məsələlərin) siyahısı, habelə bu məsələlər üzrə qərar qəbulu və səsvermə qaydaları;

65-1.2.8. təsərrüfat cəmiyyətinin idarəetmə orqanlarına namizədlərin təyinatının razılaşdırılması və şərtləri, habelə müəyyən iştirakçıların nümayəndələrinin cəmiyyətin idarəetmə orqanlarının iclaslarında səs hüququ olmadan iştirak etmək və iclas materialları ilə tanış olmaq hüququ;

65-1.2.9. təsərrüfat cəmiyyətinə investisiya edilmiş vəsaitlərin istifadə istiqamətləri və xərclənməsinə nəzarət mexanizmləri;

65-1.2.10. payların (səhmlərin) özgəninkiləşdirilməsi zamanı payı (səhmi) əldə edən yeni iştirakçının (səhmdarın) həmin müqaviləyə qoşulması proseduru;

65-1.2.11. korporativ müqavilənin şərtlərinin pozulmasının hüquqi nəticələri;

65-1.2.12. korporativ müqavilə iştirakçılarının razılığı ilə müəyyən edilən və normativ hüquqi aktlara zidd olmayan digər şərtlər.

65-1.3. Korporativ müqavilə yazılı formada bağlanır və möhürlə (iştirakçı (səhmdar) hüquqi şəxs olduqda həmçinin onun möhürü ilə) təsdiqlənir. Korporativ müqavilənin notariat qaydasında təsdiqi tələb olunmur. Müqavilənin müddəaları yalnız onu imzalamış tərəflər üçün məcburi qüvvəyə malikdir və cəmiyyətin nizamnaməsinin müddəalarına zidd olduqda, müqaviləni imzalamış tərəflər arasındakı daxili münasibətlərdə korporativ müqavilənin müddəaları üstün hüquqi qüvvəyə malikdir (bir şərtlə ki, bu, normativ hüquqi aktlara zidd olmasın və üçüncü şəxslərin hüquqlarına xələl gətirməsin), cəmiyyət (tərəflərdən birinin təsərrüfat cəmiyyəti olduğu hallar istisna olmaqla) və üçüncü şəxslərlə münasibətlərdə isə nizamnamənin müddəaları tətbiq edilir.

65-1.4. Korporativ müqavilənin şərtlərinin pozulması müqavilənin digər tərəfləri üçün dəymiş zərərin ödənilməsinə və müqavilədə nəzərdə tutulmuş digər hüquqi nəticələrin yaranmasına səbəb olur.

65-1.5. Korporativ müqavilənin tərəfləri müqavilənin bağlanmasından sonra on beş gündən gec olmayaraq təsərrüfat cəmiyyətini bu barədə yazılı şəkildə məlumatlandırmağa borcludurlar.

65-1.6. Korporativ müqavilədə başqa hal nəzərdə tutulmayıbsa, müqavilə tərəflərindən birinin təsərrüfat cəmiyyətinin nizamnamə kapitalındakı paylarına (səhmlərinə) olan hüququna xitam verilməsi və ya müqavilədən çıxması müqavilənin digər tərəflər üçün qüvvədən düşməsinə səbəb olmur.

65-1.7. Korporativ müqavilə ilə ondan irəli gələn öhdəliklərin icrasının təmin edilməsi üsulları (dəbbə pulu, girov, zaminlik və s.) və belə öhdəliklərin icra edilməməsi və ya lazımınca icra edilməməsinə görə məsuliyyət müəyyən edilə bilər. Tərəflər həmçinin müqavilənin pozulmasına görə dəymiş zərərin ödənilməsini, cərimələrin tətbiqini və ya öhdəliyin naturada icrasını tələb etmək hüququnu nəzərdə tuta bilərlər.

65-1.8. Korporativ müqavilədə fərqli səs, dividend və ləğvetmə hüquqları verən aşağıdakı xüsusi hüquqlar müəyyən edilə bilər:

65-1.8.1. ləğvetmə və ya özgəninkiləşdirmə zamanı üstünlük: təsərrüfat cəmiyyəti ləğv edildikdə və ya nəzarət zərfinin və ya bütün aktivlərin satışı (özgəninkiləşdirilməsi) həyata keçirildikdə, səhmdar cəmiyyətində imtiyazlı səhmlərə, məhdud məsuliyyətli cəmiyyətdə isə nizamnamədə nəzərdə tutulmuş xüsusi hüquqlu paylara (səhmlərə) sahib olan təsisçilərin (iştirakçıların) öz qoyduqları vəsaiti (nizamnamədə və ya korporativ müqavilədə müəyyən edilmiş əmsalla) digər təsisçilərdən (iştirakçılardan) əvvəl geri almaq hüququ (səhmdar cəmiyyətlərində imtiyazlı səhmlərin hüquqi rejimi üzrə bu Məcəllənin 106.2-ci maddəsi ilə müəyyən edilmiş hallar nəzərə alınmaqla);

65-1.8.2. payın (səhmin) dəyərsizləşməsi əleyhinə müddəalar: təsərrüfat cəmiyyəti tərəfindən gələcəkdə pay (səhm) nominal dəyərindən aşağı olmamaqla, əvvəlki buraxılış (yerləşdirmə) qiymətindən daha aşağı yerləşdirmə qiyməti ilə buraxıldıqda, müəyyən kateqoriya paylara (səhmlərə) sahib olan təsisçilərin (iştirakçıların) paylarının (səhmlərinin) dəyər itkisindən qorunması üçün konvertasiya qiymətinin və ya konvertasiya nisbətinin yenidən hesablanması mexanizmi;

65-1.8.3. xüsusi məsələlər: təsərrüfat cəmiyyətinin imtiyazlı səhmlərinə (paylarına) və (və ya) nizamnamə və ya korporativ müqavilə ilə nəzərdə tutulmuş xüsusi hüquqlu paylara (səhmlərə) sahib olan təsisçilərin (iştirakçıların) razılığı olmadan qəbul edilə bilməyəcək qərarların siyahısı və ya veto hüququ;

65-1.8.4. konvertasiya hüququ: imtiyazlı səhmləri (payları) istənilən zaman nizamnamədə müəyyən edilmiş şərtlərlə və nisbətdə adi səhmlərə (paylara) çevirmək;

65-1.8.5. təsərrüfat cəmiyyətinin fəaliyyətinə və digər təsisçilərin (iştirakçıların) hüquq və qanuni mənafelərinə əhəmiyyətli təsir göstərən qərarlar qəbul edildikdə, kiçik həcmdə paya (səhmə) malik olan təsisçilərin (iştirakçıların) hüquqlarının qorunması mexanizmləri, o cümlədən onlara öz paylarını (səhmlərini) ədalətli bazar qiymətinə satmaq və ya zəmanətli kompensasiya almaq hüququnun verilməsi;

65-1.8.6. ümumi yığıncaqda fərqli sayda səs vermək hüququnun müəyyən edilməsi, təsərrüfat cəmiyyətinin direktorlar şurasının (müşahidə şurasının) üzvlərinin seçilməsi və ya təyin edilməsi ilə bağlı xüsusi hüquqlar;

65-1.8.7. təsərrüfat cəmiyyəti tərəfindən yeni paylar (səhmlər) buraxıldıqda, müəyyən kateqoriya təsisçilərin (iştirakçıların) öz mülkiyyət paylarına (səhmlərinə) mütənasib şəkildə həmin payların (səhmlərin) əldə edilməsində üstünlük hüququnun bu Məcəllə ilə müəyyən edilmiş qaydada verilməsi.

65-1.9. Tərəflər, Azərbaycan Respublikasının rezidenti və ya qeyri-rezidenti olmalarından asılı olmayaraq, korporativ müqavilədə aralarında yaranacaq mübahisələrin həlli üzrə xarici dövlətin hüququnun tətbiq edilməsi barədə razılığa gələ bilərlər.

Maddə 65-2. Payın (səhmin) özgəninkiləşdirilməsi ilə bağlı xüsusi hüquqlar

65-2.1. Təsərrüfat cəmiyyətinin nizamnaməsi və ya iştirakçılar arasında bağlanmış korporativ müqavilə ilə payların (səhmlərin) özgəninkiləşdirilməsi ilə bağlı aşağıdakı xüsusi hüquqlar müəyyən edilə bilər:

65-2.1.1. birgə satış hüququ: təsərrüfat cəmiyyətinin nizamnamə kapitalında onun nizamnaməsi və ya korporativ müqavilə ilə müəyyən edilmiş həddən çox paya (səhmə) malik olan və öz paylarını (səhmlərini) üçüncü tərəfə satan təsisçi (iştirakçı) alış təklifi aldıqda, digər təsisçilərin (iştirakçıların) öz paylarını eyni şərtlərlə və eyni qiymətə həmin alıcıya satmaq hüququna dair şərt. Satıcı təsisçi (iştirakçı) bu barədə digər təsisçiləri (iştirakçıları) məlumatlandırmağa və onların da satışda iştirakını təmin etməyə borcludur;

65-2.1.2. məcburi satış hüququ: təsərrüfat cəmiyyətinin nizamnamə kapitalında nizamnamə və ya korporativ müqavilə ilə müəyyən edilmiş həddən çox paya (səhmə) malik olan təsisçi (iştirakçı) təsərrüfat cəmiyyətinin paylarının (səhmlərinin) hamısının və ya nəzarət zərfinin üçüncü şəxsə satışı (özgəninkiləşdirilməsi) barədə üçüncü şəxslə razılığa gəldikdə, digər təsisçiləri (iştirakçıları) öz paylarını (səhmlərini) eyni şərtlərlə və eyni qiymətə satmağa məcbur etmək hüququna dair şərt;

65-2.1.3. ilk imtina hüququ: açıq səhmdar cəmiyyətləri istisna olmaqla, digər təsərrüfat cəmiyyətlərinin hər hansı təsisçisi (iştirakçısı) öz payını (səhmini) üçüncü şəxsə satmaq niyyətində olduqda, həmin payı (səhmi) eyni şərtlərlə ilk növbədə təsərrüfat cəmiyyətinin nizamnaməsi və ya korporativ müqavilə ilə müəyyən edilmiş müəyyən kateqoriya təsisçisinə (iştirakçısına) təklif etməyə dair şərt.”;

“88.3. Məhdud məsuliyyətli cəmiyyətin iştirakçılarının normativ hüquqi aktlarla müəyyən edilmiş qaydada aşağıdakı hüquqları vardır:

88.3.1. bu Məcəllə və cəmiyyətin təsis sənədləri ilə müəyyən edilmiş qaydada cəmiyyətin idarə edilməsində iştirak etmək, onun idarəetmə və icra orqanlarını seçmək və həmin orqanlara seçilmək;

88.3.2. normativ hüquqi aktlarda və cəmiyyətin təsis sənədlərində müəyyən edilmiş qaydada cəmiyyətin fəaliyyəti haqqında məlumat almaq, ildə bir dəfə onun illik hesabatı və maliyyə hesabatları ilə tanış olmaq;

88.3.3. mənfəətin bölüşdürülməsində iştirak etmək;

88.3.4. bu Məcəllə və cəmiyyətin nizamnaməsi ilə nəzərdə tutulmuş qaydada cəmiyyətin nizamnamə kapitalındakı payını və ya onun bir hissəsini bu cəmiyyətin bir və ya bir neçə iştirakçısına satmaq və ya başqa şəkildə güzəştə getmək;

88.3.5. bu Məcəllə və cəmiyyətin təsis sənədləri ilə nəzərdə tutulmuş qaydada digər iştirakçıların razılığından asılı olmayaraq istənilən vaxt cəmiyyətdən çıxmaq;

88.3.6. cəmiyyət ləğv edildiyi halda kreditorlarla hesablaşmalardan, hesablanmış, lakin ödənilməmiş dividendlər ödənildikdən sonra qalan əmlakın bir hissəsini və ya onun dəyərini almaq;

88.3.7. cəmiyyətin təsisçiləri (iştirakçıları) arasında onların hüquqlarının bu Məcəllə ilə müəyyən edilmiş qaydada həyata keçirilməsi barədə korporativ müqavilə bağlamaq;

88.3.8. cəmiyyətin ümumi yığıncağının çağırılmasını, ümumi yığıncağının gündəliyində dəyişikliklərin edilməsini və gündəliyə yeni müzakirə mövzularının əlavə olunmasını tələb etmək;

88.3.9. cəmiyyətin ümumi yığıncağında səsvermə hüququ ilə iştirak etmək (bu Məcəllənin 49-1.2-ci və 49-1.3-cü maddələrində nəzərdə tutulmuş hallar istisna olmaqla) və onun protokolunun surətini tələb etmək;

88.3.10. cəmiyyətin fəaliyyətinin təftiş komissiyası və ya auditor tərəfindən yoxlanılmasını tələb etmək;

88.3.11. cəmiyyətin xalis mənfəətindən dividend almaq;

88.3.12. icra orqanının və direktorlar şurasının (müşahidə şurasının) üzvlərinin səhlənkarlığına və cəmiyyətə qəsdən vurduğu zərərə görə məsuliyyətə cəlb edilməsini tələb etmək;

88.3.13. cəmiyyətin paylarının satışı prosesində iştirak etmək;

88.3.14. bağlanmış əqd nəticəsində cəmiyyətə və ya səhmdarlara dəyən zərərin və bununla bağlı məsrəflərin ödənilməsi barədə məhkəməyə və ya digər səlahiyyətli quruma müraciət etmək;

88.3.15. bağlanacaq əqdlərin (o cümlədən aidiyyəti şəxslərlə əqdlərin və xüsusi əhəmiyyətli əqdlərin) əlavələri ilə tanış olmaq;

88.3.16. bu Məcəllədə və cəmiyyətin nizamnaməsində nəzərdə tutulmuş digər hüquqlara malik olmaq.”;

2.2. 90-cı maddə üzrə

2.2.1. 90.2-ci maddənin birinci və ikinci cümlələrinə “Məhdud məsuliyyətli cəmiyyətin” sözlərindən sonra “(məhdud məsuliyyətli cəmiyyət formasında yaradılan vençur kapitalı fondu istisna olmaqla)” sözləri əlavə edilsin;

2.2.2. aşağıdakı məzmunda 90.3-2-ci maddə əlavə edilsin:

“90.3-2. Məhdud məsuliyyətli cəmiyyətin iştirakçılarına, idarəetmə orqanlarının üzvlərinə və ya işçilərinə həvəsləndirmə məqsədilə paylar bu Məcəllənin 404-5-ci maddəsinə uyğun olaraq bağlanmış işçilərin pay iştirakı planı haqqında müqavilə əsasında ödənişsiz verildikdə, bu Məcəllənin 90.3-cü maddəsi tətbiq edilmir.”;

2.3. 90-1.2-ci maddəyə “Məhdud məsuliyyətli cəmiyyətin” sözlərindən sonra “(məhdud məsuliyyətli cəmiyyət formasında yaradılan vençur kapitalı fondu istisna olmaqla)” sözləri əlavə edilsin;

2.4. 95-ci maddə üzrə:

2.4.1. mətni 95.1-ci maddə hesab edilsin və həmin maddəyə “Məhdud məsuliyyətli cəmiyyətin” sözlərindən sonra “(məhdud məsuliyyətli cəmiyyət formasında yaradılan vençur kapitalı fondu istisna olmaqla)” sözləri əlavə edilsin;

2.4.2. aşağıdakı məzmunda 95.2-ci maddə əlavə edilsin:

“95.2. “İnvestisiya fondları haqqında” Azərbaycan Respublikasının Qanunu ilə müəyyən edilmiş hallarda, iştirakçının cəmiyyətdən çıxmaq hüququnun həyata keçirilməsi müddəti, hesablaşma vaxtı, şərtləri və qaydası cəmiyyətin nizamnaməsi ilə müəyyən edilə və məhdudlaşdırıla bilər.”;

2.5. aşağıdakı məzmunda 103.4-2-ci maddə əlavə edilsin:

“103.4-2. Səhmdar cəmiyyətinin iştirakçılarına, idarəetmə orqanlarının üzvlərinə və ya işçilərinə həvəsləndirmə məqsədilə səhmlər bu Məcəllənin 404-5-ci maddəsinə uyğun olaraq bağlanmış işçilərin səhm iştirakı planı haqqında müqavilə əsasında ödənişsiz verildikdə, bu Məcəllənin 103.4-cü maddəsi tətbiq edilmir.”;

2.6. 106-1.3.9-cu maddənin sonunda nöqtə işarəsi nöqtəli vergül işarəsi ilə əvəz edilsin və aşağıdakı məzmunda 106-1.3.10-cu maddə əlavə edilsin:

“106-1.3.10. cəmiyyətin səhmdarları arasında onların hüquqlarının bu Məcəllə ilə müəyyən edilmiş qaydada həyata keçirilməsi barədə korporativ müqavilə bağlamaq.”;

2.7. 107-3.5-ci maddə aşağıdakı redaksiyada verilsin:

“107-3.5. Bu Məcəllənin 65-1.8.6-cı maddəsində nəzərdə tutulmuş hallar istisna olmaqla, səhmdarların ümumi yığıncağında səsvermə “bir səsli səhm - bir səsdir” prinsipi əsasında həyata keçirilir.”;

2.8. aşağıdakı məzmunda 404-2 – 404-5-ci maddələr əlavə edilsin:

“Maddə 404-2. Konvertasiya edilən maliyyə alətləri

404-2.1. Təsərrüfat cəmiyyəti gələcəkdə əvvəlcədən müəyyən edilmiş hallar baş verdikdə, cəlb edilən vəsaitin cəmiyyətin payına (səhmlərinə) çevrilməsini (konvertasiyasını) nəzərdə tutan maliyyə alətlərindən istifadə edə bilər.

404-2.2. Konvertasiya edilən maliyyə alətləri borc öhdəliyi (konvertasiya edilən borc müqaviləsi) və ya borc öhdəliyi yaratmayan müqavilə (gələcək iştirak payı (səhm) haqqında müqavilələr) formasında ola bilər.

404-2.3. Konvertasiya edilən maliyyə alətlərinin tətbiqi nəzərdə tutulduğu hallarda, konvertasiya edilən maliyyə alətlərinin buraxılması və konvertasiyası qaydaları cəmiyyətin nizamnaməsi və ya cəmiyyətin iştirakçılarının ümumi yığıncağının qərarı ilə müəyyən edilə bilər.

404-2.4. Konvertasiya edilən maliyyə alətləri üzrə vəsait cəlb edən cəmiyyət, investorun tələbi ilə ona öz fəaliyyəti, maliyyə vəziyyəti və cəlb edilmiş vəsaitlərin istifadəsi haqqında mütəmadi olaraq, dövriliyi cəmiyyətin nizamnaməsi və ya korporativ müqavilə ilə müəyyən edilən qaydada hesabat təqdim edir.

404-2.5. Bu Məcəllənin 404-3-cü və 404-4-cü maddələrində nəzərdə tutulan alətlər (müqavilələr) və onlarda təsbit edilən hüquqlar konvertasiya edilənədək qiymətli kağız və ya törəmə maliyyə aləti hesab olunmur, onların bağlanması qiymətli kağızların emissiyası (kütləvi təklifi) sayılmır.

404-2.6. Cəmiyyət tərəfindən bağlanmış konvertasiya edilən maliyyə alətlərinin daxili reyestri aparılmalıdır. Konvertasiya baş verdikdə nizamnamə kapitalının artırılması və payların (səhmlərin) bölüşdürülməsi qanunvericiliklə müəyyən edilmiş ümumi qaydada dövlət qeydiyyatına alınır.

Maddə 404-3. Konvertasiya edilən borc müqaviləsi

404-3.1. Konvertasiya edilən borc müqaviləsi investordan cəmiyyətə borc qismində pul vəsaitinin verilməsini və müqavilədə göstərilən qaytarılma müddəti çatdıqda, yaxud cəmiyyət tərəfindən yeni investorlardan əlavə vəsaitin cəlb edildiyi maliyyələşmə mərhələsi (kvalifikasiyalı maliyyələşmə) baş verdikdə, həmin borcun (əsas məbləğ və faizlərin) qaytarılmaq əvəzinə tərəflərin razılaşdırdığı şərtlərlə cəmiyyətin paylarına (səhmlərinə) çevrilməsini nəzərdə tutan müqavilədir. Konvertasiya edilən borc müqaviləsi yazılı formada bağlanır və möhürlə (investor hüquqi şəxs olduqda həmçinin onun möhürü ilə) təsdiqlənir və onun notariat qaydasında təsdiqi tələb olunmur.

404-3.2. Borcun paya (səhmə) konvertasiyası zamanı ilkin investorun risklərini kompensasiya etmək üçün müqavilədə aşağıdakı qoruyucu mexanizmlərdən azı biri müəyyən edilməlidir:

404-3.2.1. qiymətləndirmənin yuxarı həddi – konvertasiya anında investorun əldə edəcəyi payın həcminin hesablanması üçün tətbiq edilən, cəmiyyətin dəyərinin müqavilə ilə əvvəlcədən razılaşdırılmış maksimal miqdarı;

404-3.2.2. endirim dərəcəsi – kvalifikasiyalı maliyyələşmə mərhələsində cəmiyyətə daxil olan yeni investorların bir pay (səhm) üçün ödədikləri qiymətə ilkin borcverən üçün tətbiq edilən güzəşt faizi.

404-3.3. Müqavilənin müddəti bitdikdə və paya çevrilməni şərtləndirən hadisə baş vermədikdə, investor öz seçimi ilə borcun (faizlərlə birlikdə) pul şəklində geri qaytarılmasını və ya borcun müqavilədə əvvəlcədən razılaşdırılmış qiymətləndirmə əsasında cəmiyyətin payına (səhmlərinə) çevrilməsini tələb edə bilər.

Maddə 404-4. Gələcək iştirak payı (səhm) haqqında müqavilə

404-4.1. Gələcək iştirak payı (səhm) haqqında müqavilə investorun cəmiyyətə pul vəsaiti ödəməsini, bunun müqabilində cəmiyyətin hər hansı borc öhdəliyi, faiz və ya ödəmə müddəti yaratmadan investora həmin vəsait müqabilində gələcəkdə cəmiyyətin paylarını (səhmlərini) almaq hüququ verməsini nəzərdə tutan müqavilədir. Gələcək iştirak payı (səhm) haqqında müqavilə yazılı formada bağlanır və möhürlə (investor hüquqi şəxs olduqda həmçinin onun möhürü ilə) təsdiqlənir və onun notariat qaydasında təsdiqi tələb olunmur.

404-4.2. Gələcək iştirak payı (səhm) haqqında müqavilə üzrə investorun vəsaitinin paya (səhmə) konvertasiyası cəmiyyətin nizamnamə kapitalını artıraraq yeni investorlara pay (səhm) satdığı yeni maliyyələşmə mərhələsi (kvalifikasiyalı maliyyələşmə) baş verdikdə və ya cəmiyyətin nəzarət zərfinin və ya bütün aktivlərinin satılması, cəmiyyətin başqa hüquqi şəxsə qoşulması, ləğvi kimi likvidlik hadisəsi baş verdikdə həyata keçirilir.

404-4.3. Gələcək iştirak payı (səhm) haqqında müqavilə üzrə paya (səhmə) çevrilmə zamanı investorun payının həcminin hesablanması tərəflərin razılaşdırdığı qiymətləndirmənin yuxarı həddi və (və ya) endirim dərəcəsi əsasında bu Məcəllənin 404-3.2-ci maddəsinə uyğun olaraq hesablanır. İnvestor bu iki şərtdən onun üçün daha sərfəli olanını seçmək hüququna malikdir.

404-4.4. Likvidlik hadisəsi (cəmiyyətin ləğvi və ya satışı) konvertasiyadan əvvəl baş verdikdə, bu müqavilə üzrə vəsaiti ödəmiş investorun ödəniş (investisiyanın geri qaytarılması) tələbləri cəmiyyətin digər təminatsız kreditorlarının tələblərindən sonra, lakin cəmiyyətin təsisçilərinə (iştirakçılarına, səhmdarlarına) qalıq əmlakın bölüşdürülməsindən əvvəl yerinə yetirilir.

Maddə 404-5. İşçilərin pay (səhm) iştirakı planı haqqında müqavilə

404-5.1. Təsərrüfat cəmiyyəti işçilərini və idarəetmə orqanının üzvlərini həvəsləndirmək məqsədilə, onlara cəmiyyətin paylarını (səhmlərini) gələcəkdə müəyyən edilmiş qiymətə (icra qiyməti) və ya ödənişsiz əsaslarla əldə etmək (almaq) hüququ verən pay (səhm) iştirakı planı haqqında müqavilələr bağlaya bilər. Müqavilə yazılı formada bağlanır və cəmiyyətin möhürü ilə təsdiqlənir və onun notariat qaydasında təsdiqi tələb olunmur.

404-5.2. Planın tərtibi tarixi, hüququn qüvvəyə minməsi şərtləri, icra qiyməti (payların (səhmlərin) güzəştli ödənişli əsaslarla əldə edilməsi nəzərdə tutulduğu hallarda) və müddəti müqavilədə aydın şəkildə göstərilməlidir. Cəmiyyət tərəfindən bağlanmış işçilərin pay (səhm) iştirakı planı müqavilələrinin daxili reyestri aparılmalıdır.

404-5.3. Bu müqavilələrin icrası üçün cəmiyyət nizamnamə kapitalının tərkibində səlahiyyət verilmiş (lakin buraxılmamış) xüsusi pay (səhm) fondu yarada bilər.”.

Maddə 3. “Valyuta tənzimi haqqında” Azərbaycan Respublikasının Qanununa (Azərbaycan Respublikası Ali Sovetinin Məlumatı, 1995, № 7, maddə 116; Azərbaycan Respublikasının Qanunvericilik Toplusu (Cild I); 2024, № 2, maddə 138, № 3, maddə 250; 2025, № 2, maddə 100, № 5, maddə 432) aşağıdakı məzmunda 9-1-ci maddə əlavə edilsin:

“Maddə 9-1. Rəqəmsal səyyahların, innovasiya layihələrinin (startapların),  vençur kapitalı fondlarının, akkreditə edilmiş investorların valyuta əməliyyatlarının xüsusiyyətləri

9-1.1. Rəqəmsal səyyahlar tərəfindən xarici mənbələrdən əldə olunan xarici valyuta vəsaitlərinin (vergi öhdəliklərinin icrası şərtilə)  müvəkkil banklardakı hesablarına mədaxili və Azərbaycan Respublikasından köçürülməsi zamanı valyuta tənzimi məqsədləri üçün məbləğ məhdudiyyəti tətbiq edilmir.

9-1.2. Qeyri-rezidentlərin Azərbaycan Respublikasında qoyduqları investisiyalardan (o cümlədən daşınmaz əmlak, pay və səhmlərdən) əldə etdikləri mənfəətin, dividendlərin və investisiyanın realizə edilməsi nəticəsində yaranmış əlavə dəyərin (kapital artımının) repatriasiyasına məbləğ məhdudiyyəti tətbiq edilmir. Köçürmə zamanı vəsaitin əvvəllər Azərbaycan Respublikasına gətirilməsini təsdiq edən ilkin gömrük bəyannaməsi və ya bank çıxarışının təqdim edilməsi obyektiv səbəblərdən qeyri-mümkün olduqda, investisiya obyektinin qanuni əldə edilməsini təsdiq edən dövlət reyestrindən rəsmi çıxarış ilkin mədaxil sənədi qismində qəbul edilir.

9-1.3. Vençur kapitalı fondlarının, akkreditə olunmuş investorların xarici dövlətlərdəki innovativ layihələrdən (o cümlədən startaplardan) əldə etdikləri mənfəətin, dividendlərin və investisiyanın realizə edilməsi nəticəsində əldə olunan vəsaitlərin repatriasiyası və yenidən Azərbaycan Respublikasından göndərilməsi zamanı, vəsaitlərin əvvəllər Azərbaycan Respublikasından göndərilməsini (Azərbaycan Respublikasına gətirilməsini) təsdiq edən gömrük bəyannaməsi və ya bank çıxarışı yalnız o halda tələb olunmur ki, ilkin investisiyanın qeyri-maddi aktiv və ya xidmət kimi qoyulduğu,yaxud əldə edilən gəlir xarici dövlətin səlahiyyətli vergi orqanının arayışı ilə təsdiq edilmiş olsun.

9-1.4. Rezidentlər tərəfindən Azərbaycan Respublikasından kənarda fəaliyyət göstərən innovativ layihələrdə (startaplarda) gələcək iştirak payının əldə edilməsi (gələcək iştirak payı (səhm) haqqında müqavilə, konvertasiya olunan borc və analoji maliyyə alətləri) məqsədilə investisiyaların qoyulması üzrə köçürmələrə vençur kapitalı fondları tərəfindən məbləğ məhdudiyyəti tətbiq edilmədən, akkreditə olunmuş investorlar tərəfindən təqvim ili ərzində 2 (iki) milyon ABŞ dolları ekvivalentindən çox olmamaqla yol verilir.

9-1.5. Bu Qanunun 9-1.4-cü maddəsində qeyd edilən köçürmələr üzrə investor köçürmə tarixindən etibarən 5 il ərzində müqavilədə göstərilən müddətdə iştirak payının (səhminin) əldə edilməsini təsdiq edən xarici reyestr çıxarışını müvəkkil banka təqdim etməyə və ya investisiya cəlb edən şəxs müflis elan edildikdə və ya ləğv olunduqda xarici dövlətin səlahiyyətli qurumu tərəfindən bu halın təsdiqini göstərən sənədi təqdim etməyə borcludur.

9-1.6. Rezident hüquqi şəxslər tərəfindən innovativ məhsulların (qeyri-maddi aktivlərin, proqram təminatının) hazırlanması məqsədilə xaricdəki törəmə müəssisələrinə vəsait köçürüldükdə, məhsulun gömrük ərazisinə gətirilmədən xaricdə realizə edilməsinə (istifadəyə verilməsinə) aşağıdakı şərtlərlə icazə verilir:

9-1.6.1. yaradılan əqli mülkiyyət hüquqları obyektləri üzərində müstəsna hüquqlar rezident şirkətə məxsus olsun;

9-1.6.2. törəmə müəssisə tərəfindən həmin məhsulun xaricdə satışından əldə edilən xalis gəlirlər (mənfəət və ya royalti) təhvil-təslim tarixindən etibarən 365 (üç yüz altmış beş) gündən gec olmayaraq rezidentin Azərbaycan Respublikasındakı müvəkkil bank hesablarına repatriasiya edilsin.

9-1.7. Rezident hüquqi şəxslər və fərdi sahibkarlar tərəfindən xarici dövlətlərdə yerləşən təminatçılara rəqəmsal xidmətlərin, proqram təminatı lisenziyalarının, bulud (server) xidmətlərinin və beynəlxalq kommersiya abunəliklərinin ödənilməsi məqsədilə təqvim ayı ərzində cəmi 200.000 (iki yüz) min ABŞ dolları ekvivalentinədək köçürmələr ikitərəfli müqavilə təqdim edilmədən, müstəsna olaraq xidmətin təyinatını əks etdirən elektron hesab-faktura  və ya ödəniş bildirişi əsasında həyata keçirilir.

9-1.8. Rezidentlər tərəfindən xarici ölkə ərazisində istifadə məqsədilə alınan və Azərbaycan Respublikasının gömrük ərazisinə gətirilməyən daşınar əmlakın (nəqliyyat vasitələri, yaxtalar və s.) əldə edilməsi üzrə köçürmələr alqı-satqı müqaviləsi əsasında icra edilir. Rezident köçürmə tarixindən etibarən 180 (yüz səksən) gün ərzində həmin əmlakın xarici dövlətin səlahiyyətli dövlət orqanında öz adına qeydiyyata alındığını təsdiq edən leqallaşdırılmış (və ya apostil olunmuş) mülkiyyət çıxarışını müvəkkil banka təqdim etməyə borcludur.

9-1.9. Birləşmiş Millətlər Təşkilatının ixtisaslaşmış qurumlarına, habelə hədəfli maliyyə sanksiyaları siyahılarında olmayan və beynəlxalq səviyyədə tanınmış təbiəti mühafizə, səhiyyə və humanitar fondlara (qeyri-hökumət təşkilatlarına) ianələrin köçürülməsi həmin qurumların rəsmi internet informasiya ehtiyatlarındakı rekvizitlər və ya rəsmi müraciəti əsasında həyata keçirilir.

9-1.10. Xarici ölkələrdən malların və ya xidmətlərin alışı və ya icarəsi ilə bağlı müqavilənin müddəti 2 (iki) ildən çox olduqda, təchizatçının xeyrinə öhdəliyin icrasının təminatı məqsədilə beynəlxalq agentliklər tərəfindən investisiya dərəcəli reytinqə malik qeyri-rezident bankda depozit ödənişi yerləşdirildikdə banka ödənişin təyinatını əks etdirən müqavilə təqdim edilir. Malların və ya xidmətlərin ölkəyə idxalına və ya maliyyə icarəsinə xitam verildikdən sonra 3 (üç) ay ərzində depozit məbləği ölkəyə geri qaytarılmalıdır. Depozit məbləğinin müqaviləyə əsasən cərimə sanksiyası kimi təchizatçı tərəfindən tutulması və ya malların və ya xidmətlərin qarşılığı kimi əvəzləşdirilməsi hallar istisna olmaqla (bu hal rəsmi hüquqi tələbnamə, arbitraj və ya məhkəmə sənədi ilə təsdiqlənməlidir), geri qaytarılmayan məbləğin qalıq dəyəri 200.000 (iki yüz min) ABŞ dolları ekvivalentindən çox olduqda, əməliyyata dair sənədlər 5 (beş) iş günü ərzində Azərbaycan Respublikasının Mərkəzi Bankına təqdim edilir.”.

Maddə 4. “Banklar haqqında” Azərbaycan Respublikasının Qanununda (Azərbaycan Respublikasının Qanunvericilik Toplusu, 2004, № 3, maddə 130 (Cild I); 2024, № 2, maddə 138; 2025, № 1, maddə 1, № 4 (I kitab), maddə 318, № 5, maddə 432; 2026, № 2, maddə 111) aşağıdakı dəyişikliklər edilsin:

4.1. aşağıdakı məzmunda 36.8-ci maddə əlavə edilsin:

“36.8. Rəqəmsal səyyahlara müvəkkil banklarda hesablar yalnız şəxsiyyəti təsdiq edən sənəd və imza nümunəsi vərəqəsi əsasında açılır.”;

4.2. 41.2-ci maddənin dördüncü cümləsi beşinci cümlə hesab edilsin və aşağıdakı məzmunda dördüncü cümlə əlavə edilsin:

“Müştərinin Elektron Hökumət İnformasiya Sistemi üzərindən verdiyi elektron razılığı əsasında onun hesab üzrə məlumatları “Ödəniş xidmətləri və ödəniş sistemləri haqqında” Azərbaycan Respublikasının Qanununa uyğun olaraq hesab üzrə məlumat xidməti təchizatçılarına ötürülə bilər.”.

Maddə 5. “İnvestisiya fondları haqqında” Azərbaycan Respublikasının Qanununda (Azərbaycan Respublikasının Qanunvericilik Toplusu, 2010, № 11, maddə 950 (Cild I); 2025, № 4 (I kitab), maddələr 315, 318, № 5, maddə 432) aşağıdakı dəyişikliklər edilsin

5.1.1.1-ci maddə üzrə:

5.1.1. aşağıdakı məzmunda 1.1.7-1 – 1.1.7-8-ci maddələr əlavə edilsin:

“1.1.7-1. vençur kapitalı fondu – fəaliyyətinin müstəsna predmeti investorların mənfəət əldə etməsi məqsədilə yalnız peşəkar investorlardan cəlb edilmiş pul vəsaitlərinin investisiya bəyannaməsinə uyğun olaraq investisiya edilməsi olan və aşağıdakı meyarlara cavab verən, habelə bu Qanunla nəzərdə tutulmuş təşkilati-hüquqi formalarda yaradılan investisiya fondudur:

1.1.7-1.1. əsas fəaliyyətinin investisiya qoyuluşundan ibarət olması və bu Qanunda nəzərdə tutulan hallar istisna olmaqla digər kommersiya fəaliyyəti həyata keçirməməsi;

1.1.7-1.2. fondun investorları üçün ortaq gəlir əldə etmək məqsədilə cəlb edilmiş kapitalı birləşdirməsi;

1.1.7-1.3. maliyyə və əməliyyat fəaliyyəti istiqamətlərinin müəyyən edilməsində, investisiya qərarların qəbulunda bütün təsisçilərin (iştirakçıların) birgə şəkildə davamlı iştirakının olmaması;

1.1.7-2. peşəkar investor – “Qiymətli kağızlar bazarı haqqında” Azərbaycan Respublikası Qanununun 1.0.7-ci maddəsi ilə müəyyən edilmiş institusional investorlar, iqtisadiyyatın, o cümlədən sahibkarlığın inkişafının maliyyələşdirilməsi və innovasiya fəaliyyətinin həyata keçirilməsi məqsədilə fəaliyyət göstərən dövlət adından yaradılan publik hüquqi şəxslər və ya paylarının (səhmlərinin) nəzarət zərfi dövlətə məxsus olan hüquqi şəxslər və ya bu Qanunun 1.1.7-3-cü maddəsində müəyyən edilmiş tələblərə cavab verən  akkreditə olunmuş investorlardır;

1.1.7-3. akkreditə olunmuş investor –  bu Qanunun 9-1.3-cü maddəsində göstərilən fəaliyyətə vençur kapitalı fondu vasitəsilə investisiya edən, investisiya ilə bağlı riskləri dərk etmək üçün maliyyə təcrübəsinə və ya potensial itkiləri qarşılamaq üçün maliyyə imkanlarına malik olan və aşağıdakı meyarlardan  azı birinə cavab verən fiziki və ya hüquqi şəxsdir:

1.1.7-3.1. son 2 ilin hər birində illik gəliri 150.000 (yüz əlli min) manatdan çox olan və cari ildə də eyni gəlir səviyyəsini əldə edəcəyini əsaslı şəkildə gözləyən fiziki şəxslər;

1.1.7-3.2. əsas yaşayış yeri olan daşınmaz əmlakının dəyəri istisna olmaqla, xalis maliyyə aktivlərinin dəyəri 500.000 (beş yüz min) manatdan çox olan fiziki şəxslər;

1.1.7-3.3. siyahısı Mərkəzi Bankı tərəfindən müəyyən edilmiş sertifikatlara malik olan şəxslər;

1.1.7-3.4. xalis aktivlərinin dəyəri 5.000.000 (beş milyon) manatdan çox olan və ya bütün iştirakçıları bu Qanunun 1.1.7-3.1 – 1.1.7-3.3-cü maddələri ilə müəyyən edilmiş meyarlardan birinə cavab verən hüquqi şəxslər;

1.1.7-3.5. bütün iştirakçıları akkreditə olunmuş investorlardan ibarət olan hüquqi şəxslər;

1.1.7-3.6. vençur kapitalı fondunun idarəçisi (hüquqi şəxs olduqda isə onun rəhbər şəxsləri) və investisiya qərarlarının qəbulunda bilavasitə iştirak edən şəxslər;

1.1.7-4. azad hesabatlı vençur kapitalı fondu - bu Qanunun 9-2-ci maddəsində müəyyən edilmiş meyarlara cavab verən, fəaliyyəti üçün lisenziya tələb olunmayan və Mərkəzi Bank tərəfindən aparılan reyestrdə qeydə alınan vençur kapitalı fondudur;

1.1.7-5. lisenziyalaşdırılan vençur kapitalı fondu – bu Qanunun 9-3-cü maddəsinə uyğun olaraq Mərkəzi Bank lisenziyası əsasında fəaliyyət göstərən  vençur kapitalı fondudur;

1.1.7-6. idarə edilən aktivlərin həcmi – vençur kapitalı fondunun idarə etdiyi bütün aktivlərinin, o cümlədən cəlb edilmiş, lakin hələ investisiya edilməmiş kapitalın və investorların ödənilməmiş kapital öhdəliklərinin bu Qanunun 9-1.7-ci maddəsinə əsasən hesablanan ümumi dəyəridir;

1.1.7-7. ödənilməmiş kapital öhdəliyi – vençur kapitalı fondunun təsis sənədlərinə (müqaviləsinə) əsasən fondun çağırışı əsasında investorun gələcəkdə fonda ödəməyi öhdəsinə götürdüyü, lakin hələ ödənilməmiş vəsaitin məbləğidir;

1.1.7-8. investorlardan pul vəsaitlərinin cəlb edilməsi – fond (və ya onun adından çıxış edən şəxs) tərəfindən kənar investorlardan (onların fondun təsisçisi qismində çıxış edib-etməməsindən asılı olmayaraq) investisiya məqsədilə fonda vəsaitin köçürülməsini (və ya bu barədə öhdəliyin götürülməsini) təmin etmək üçün həyata keçirilən fəaliyyətdir;”;

5.1.2. 1.1.10-cu maddədə “şəxsdir” sözü “şəxs və ya investisiya şirkətləridir” sözləri ilə əvəz edilsin;

5.1.3. 1.1.17-ci maddəyə “müşahidə şurası” sözlərindən sonra “(olduqda)” sözü əlavə edilsin, “üzvlükdür” sözü “üzvlük və ya kommandit ortaqlığı formasında yaradılan vençur kapitalı fondunda işləri aparan tam ortaqdır (ortaqlardır)” sözləri ilə əvəz edilsin;    

5.1.4. aşağıdakı məzmunda 1.2-ci maddə əlavə edilsin:

“1.2. Bu Qanunda xüsusi olaraq fərqləndirilmədikdə, bu Qanunun investisiya fondlarına, o cümlədən səhmdar investisiya fondlarına, qapalı paylı investisiya fondlarına, onların idarəçilərinə, depozitarlarına və investorlarına dair müddəaları (bu Qanunun 42-ci və 43-cü maddələri istisna olmaqla) vençur kapitalı fondlarına, onların idarəçilərinə, depozitarlarına və peşəkar investorlarına da şamil edilir. Bu Qanunun lisenziyalaşdırmaya, habelə prudensial tənzimləməyə və nəzarətə dair müddəaları yalnız lisenziyalaşdırılan vençur kapitalı fondlarına şamil edilir. Azad hesabatlı vençur kapitalı fondlarının fəaliyyəti bu Qanunun II-I fəslində nəzərdə tutulmuş rejimə əsasən tənzimlənir.”;

5.1.5. aşağıdakı məzmunda 2.3-2-ci maddə əlavə edilsin:

“2.3-2. Bu Qanunun məqsədləri üçün yalnız iştirakçılarının (təsisçilərinin) öz vəsaiti hesabına fəaliyyət göstərən, ortaq investisiya məqsədilə kənar (üçüncü şəxs) investorlardan kapital cəlb etməyən holdinqə daxil olan müəssisələr və birgə müəssisələr vençur kapitalı fondu hesab edilmir və bu Qanunun müddəaları onlara şamil edilmir.”;

5.2. 3-cü maddə üzrə:

5.2.1. aşağıdakı məzmunda 3.2-1-ci maddə əlavə edilsin:

“3.2-1. Vençur kapitalı fondunun adında “vençur kapitalı fondu” sözləri olmalıdır. Hüquqi şəxs statusu almaq istəyən qurumun dövlət qeydiyyatına alınması və ya mövcud hüquqi şəxsin nizamnaməsində (adında) dəyişiklik edilməsi zamanı bu sözlərdən istifadə edilməsi üçün Mərkəzi Bankın ilkin razılığı alınmalıdır. İlkin razılığın alınması qaydası Mərkəzi Bankın qəbul etdiyi normativ xarakterli aktlarla müəyyən edilir.”;

5.2.2. 3.3-cü maddəyə “İnvestisiya fondu” sözlərindən sonra “və ya “Vençur kapitalı fondu” sözləri, “fondları” sözündən sonra “(vençur kapitalı fondları)” sözləri əlavə edilsin və həmin maddədə “qanunvericiliyinə müvafiq” sözləri “normativ hüquqi aktlarına uyğun” sözləri ilə əvəz edilsin;

5.3. aşağıdakı məzmunda II-I fəsil əlavə edilsin:

“II-I fəsil

Vençur kapitalı fondunun fəaliyyət rejimləri və fəaliyyətinin tənzimlənməsi

Maddə 9-1. Vençur kapitalı fonduna dair ümumi müddəalar

9-1.1. Vençur kapitalı fondunun nizamnaməsində və ya onun təsis sənədlərində fondun fəaliyyətinin müstəsna predmetinin cəlb edilən vəsaitlərinin 70 faizindən az olmayan hissəsinin bu Qanunun 9-1.3-cü maddəsində göstərilən məqsədlərə yatırılmasından ibarət olduğu göstərilməlidir. Qalan vəsait likvidliyin idarə edilməsi məqsədilə digər maliyyə alətlərinə yatırıla bilər.

9-1.2. Vençur kapitalı fondları bu Qanunun II-I fəslinə uyğun olaraq azad hesabatlı vençur kapitalı fondu və ya lisenziyalaşdırılan vençur kapitalı fondu rejimində fəaliyyət göstərirlər. Vençur kapitalı fondu məhdud məsuliyyətli cəmiyyət, qapalı səhmdar cəmiyyəti, kommandit ortaqlığı və ya qapalı paylı investisiya fondu formasında yaradıla bilər. Vençur kapitalı fondu sahibkarlıq fəaliyyətinin digər növləri ilə məşğul ola bilməz.

9-1.3. Vençur kapitalı fondu investorlardan cəlb olunmuş pul vəsaitlərinin yalnız rəqəmsal texnologiyaların və innovasiya məhsulunun (iqtisadi və ya sosial səmərə əldə etmək məqsədilə yeni yaradılmış və ya təkmilləşdirilmiş məhsul (iş, xidmət), texnoloji proses, həmçinin ictimai münasibətlərin müxtəlif sahələrində (təşkilati-texniki, maliyyə-iqtisadi və digər sahələrdə) tətbiq edilən inzibati, kommersiya, texnoloji və digər xarakterli yeniliklər) hazırlanması, istehsalı və təkmilləşdirilməsini həyata keçirən, mikro, kiçik və orta sahibkarlıq subyekti olan, habelə Azərbaycan Respublikasında “Startap” şəhadətnaməsini və ya texnologiyalar parkının və texnoloji biznes inkubatorunun və ya sənaye və azad iqtisadi zonaların qeydiyyat şəhadətnaməsini alan sahibkarların innovativ layihələrinə bu Qanunla müəyyən edilmiş qaydada  yatırılması ilə məşğul olur.

9-1.4. Vençur kapitalı fondunun borc götürməsinə dair məhdudiyyətlər fondun rejimindən asılı olaraq aşağıdakı kimi müəyyən edilir:

9-1.4.1. azad hesabatlı vençur kapitalı fondu yalnız qısamüddətli likvidlik ehtiyaclarını (investisiyaların maliyyələşdirilməsi və ya əməliyyat xərclərinin ödənilməsi) ödəmək məqsədilə borc götürə bilər. Ümumi borc öhdəlikləri fondun ümumi kapital öhdəliklərinin (cəlb edilmiş və ödənilməmiş kapital öhdəliklərinin cəmi) 30 faizindən çox, hər borcun müddəti isə 12 aydan artıq ola bilməz;

9-1.4.2. lisenziyalaşdırılan vençur kapitalı fondu aktivlərinin 10 faizini keçməyən məbləğdə və üç aydan artıq olmayan müddətə borc götürə bilər.

9-1.5. Lisenziyalaşdırılan vençur kapitalı fondunun nizamnamə (şərikli) kapitalının minimum miqdarı və nizamnamə (şərikli) kapitalının formalaşdırması qaydaları Mərkəzi Bank tərəfindən müəyyən edilir.

9-1.6. Vençur kapitalı fondunun pay mülkiyyətçilərinin (səhmdarlarının) reyestri mərkəzi depozitar tərəfindən aparılır.

9-1.7. Vençur kapitalı fondu ildə azı bir dəfə idarə edilən aktivlərin həcmini hesablamalıdır. İdarə edilən aktivlərin həcminin hesablanması qaydası Mərkəzi Bank tərəfindən müəyyən edilir.

9-1.8. Vençur kapitalı fondu öz investisiyalarını Azərbaycan Respublikasında, həmçinin “Valyuta tənzimi haqqında” Azərbaycan Respublikası Qanunun tələbləri nəzərə alınmaqla Azərbaycan Respublikasından kənarda həyata keçirə bilər.

9-1.9. Vençur kapitalı fondunun fəaliyyət müddətinin uzadılması, idarəçisinin dəyişdirilməsi, habelə idarəçi tərəfindən əvvəlki fondun fəaliyyət müddəti bitdikdən sonra və ya onun investisiya strategiyasını davam etdirmək məqsədilə yeni varis vençur kapitalı fondunun təsis edilməsi məsələləri bu Qanunun tələbləri nəzərə alınmaqla fondun nizamnaməsi və (və ya) investisiya bəyannaməsi ilə müəyyən edilir.

Maddə 9-2. Azad hesabatlı vençur kapitalı fondu rejimi və meyarları

9-2.1. Azad hesabatlı vençur kapitalı fondu aşağıdakı meyarların hamısına cavab verdikdə azad hesabatlı vençur kapitalı fondu rejimində fəaliyyət göstərə bilər:

9-2.1.1. bu Qanunun 9-1.7-ci maddəsi nəzərə alınmaqla, idarə etdiyi aktivlərin həcmi 50 (əlli) milyon manat ekvivalentini keçmirsə;

9-2.1.2. investorlarının ümumi sayı əllidən çox deyilsə (fondun təşkilati-hüquqi forması üçün normativ hüquqi aktlarda daha az say müəyyən edildiyi hallar istisna olmaqla).

9-2.2. Azad hesabatlı vençur kapitalı fondunun fəaliyyəti lisenziyalaşdırılmır. Azad hesabatlı vençur kapitalı fondu fəaliyyətə başlamazdan əvvəl Mərkəzi Bank tərəfindən bu Qanunun 9-6-cı maddəsində müəyyən edilmiş qaydada reyestrdə qeydə alınmalıdır.

9-2.3. Azad hesabatlı vençur kapitalı fondu Mərkəzi Banka illik əsasda bu Qanunun 9-7-ci maddəsində müəyyən edilmiş məzmunda hesabat təqdim etməlidir.

Maddə 9-3. Lisenziyalaşdırılan vençur kapitalı fondu rejimi və meyarları

9-3.1. Bu Qanunun 9-2.1-ci maddəsində nəzərdə tutulan meyarlara cavab verməyən vençur kapitalı fondu yalnız lisenziyalaşdırılan vençur kapitalı fondu rejimində fəaliyyət göstərə bilər. Vençur kapitalı fondu həmçinin könüllü olaraq lisenziyalaşdırılan vençur kapitalı fondu rejimində fəaliyyət göstərmək barədə qərar qəbul edə bilər.

9-3.2. Bu Qanunun 3.2-1-ci maddəsinin tələbləri nəzərə alınmaqla, lisenziyalaşdırılan vençur kapitalı fondu bu Qanunun VIII fəslinə uyğun olaraq Mərkəzi Bankdan lisenziya almalıdır.

Maddə 9-4. Vençur kapitalı fondunun fəaliyyət rejiminin dəyişdirilməsi

9-4.1. Azad hesabatlı vençur kapitalı fondu bu Qanunun 9-1.7-ci maddəsində qeyd edilən hesablamanı həyata keçirərkən bu Qanunun 9-2.1-ci maddəsində  nəzərdə tutulan meyarlara uyğun olmadığı təqdirdə, bu barədə 10 iş günü ərzində Mərkəzi Banka və investorlarına məlumat verməli və bu halın baş verdiyi tarixdən etibarən 90  təqvim günü (keçid dövrü) ərzində lisenziyalaşdırılan vençur kapitalı fondu lisenziyası almaq üçün Mərkəzi Banka müraciət etməlidir.

9-4.2. Keçid dövründə fond yeni investor cəlb edə bilməz, lakin mövcud investisiya fəaliyyətini, o cümlədən mövcud investorlardan ödənilməmiş kapital öhdəliklərini tələb etməyi və mövcud portfel şirkətlərinə əlavə investisiyalar etməyi davam etdirə bilər.

9-4.3. Mərkəzi Bank əsaslandırılmış müraciət əsasında keçid dövrünü əlavə 90 təqvim günədək uzada bilər.

9-4.4. Bu Qanunun 9-4.1-ci maddəsində göstərilən müddət ərzində lisenziya üçün müraciət edilmədikdə və ya ona lisenziya verilməsindən bu Qanunla nəzərdə tutulmuş hallarda imtina edildikdə vençur kapitalı fondu fəaliyyətini dayandırmalı, Mərkəzi Bank isə azad hesabatlı vençur kapitalı fondunu reyestrdən çıxarılma barədə qərar qəbul etməli və bu barədə məlumatı reyestrdən qeydi çıxarılmış azad hesabatlı vençur kapitalı fonduna və ya onun idarəçisinə, onun depozitarına və vergi orqanlarına dərhal göndərməli və mediada dərc etdirməlidir.

9-4.5. Reyestrdə müvafiq qeydi ləğv edilmiş azad hesabatlı vençur kapitalı fondunun təsisçiləri (iştirakçıları, səhmdarları, tam ortaqları) Mərkəzi Bankın qərarının qəbul edildiyi tarixdən 30 (otuz) təqvim günü müddətində Azərbaycan Respublikası Mülki Məcəlləsinin 59.2.1-ci maddəsinə uyğun olaraq fondun ləğv edilməsi və ya adından “vençur kapitalı fondu” sözləri çıxarılmaqla fəaliyyət predmetinin dəyişdirilməsi barədə qərar qəbul etməlidirlər. Bu müddət ərzində müvafiq qərar qəbul edilmədikdə, Mərkəzi Bank həmin hüquqi şəxsin məhkəmə qaydasında məcburi ləğv edilməsi tələbi ilə iddia qaldırır.

Maddə 9-5. Vençur kapitalı fondunun idarəçilərinə dair tələblər

9-5.1. Vençur kapitalı fondu daxili idarəetmə formasında (fondun  icra orqanı və ya tam ortaq tərəfindən) və ya kənar idarəçi cəlb etməklə idarə oluna bilər.

9-5.2. Lisenziyalaşdırılan vençur kapitalı fondunun idarə edilməsi kənar idarəçi tərəfindən həyata keçirildikdə, həmin kənar idarəçi bu Qanunun IV və VIII fəsillərinə uyğun olaraq investisiya fondlarının idarə edilməsi üzrə lisenziyaya malik olan şəxs olmalıdır.

9-5.3. İdarəçi vençur kapitalı fondunun nizamnamə (şərikli) kapitalının və ya investorların cəlb edilmiş kapital öhdəliklərinin azı 1 – 5 faizinə bərabər məbləğdə öz vəsaiti ilə fondda iştirak etməlidir.    

9-5.4. Azad hesabatlı vençur kapitalı fondunun idarə edilməsi üçün bu Qanunla   nəzərdə tutulmuş investisiya fondlarının idarə edilməsi üzrə lisenziya tələb olunmur. Aşağıdakı tələblərə cavab verən idarəçi (fondun icra orqanı və ya tam ortaq istisna olmaqla) fondun reyestrə qeydə alınması zamanı Mərkəzi Bank tərəfindən aparılan reyestrdə qeydə alınmalıdır:

9-5.4.1. idarəçinin nizamnamə kapitalı azı 50.000 manat olmalı və ya 3 aylıq əməliyyat xərclərini qarşılamaq üçün kifayət edən likvid aktivlərə malik olmalıdır (hansı daha yüksəkdirsə);

9-5.4.2. idarəçinin rəhbər şəxsləri (və ya tam ortaqlar) bu Qanunun 40-cı maddəsində nəzərdə tutulan məqbul və lazımi keyfiyyətlərə malik olmalıdırlar.

9-5.5. Bu Qanunun 9-5.4-cü maddəsinə əsasən idarəetməni həyata keçirən şəxsin reyestrdə qeydə alınması bu Qanunun 9-6.3 – 9-6.11-ci maddələrində qeyd edilmiş qaydada aparılır.

9-5.6. Azad hesabatlı vençur kapitalı fondunun idarəçisi eyni zamanda ondan artıq vençur kapitalı fondunu idarə edə bilməz.

Maddə 9-6. Azad hesabatlı vençur kapitalı fondunun reyestri

9-6.1. Bu Qanunun 3.2-1-ci maddəsinin tələbləri nəzərə alınmaqla, azad hesabatlı vençur kapitalı fondu (və ya onun idarəçisi) tərəfindən fəaliyyətə başlamazdan əvvəl Mərkəzi Bankda reyestrdə qeydə alınmaq üçün ərizə və aşağıdakı sənədlər (məlumatlar) təqdim edilməlidir:

9-6.1.1. fondun və idarəçinin (kənar idarəçi olduqda) təsis sənədlərinin surətləri;

9-6.1.2. fondun investisiya bəyannaməsi və ya əsas investisiya şərtlərini əks etdirən sənəd;

9-6.1.3. idarəçinin bu Qanunun 9-5.3-cü və 9-5.4-cü maddələrinin tələblərinə uyğunluğunu təsdiq edən məlumatlar (rəhbər şəxslər və kapital (likvidlik) barədə).

9-6.2. Bu maddədə nəzərdə tutulmuş sənədlərin və məlumatların Elektron Hökumət İnformasiya Sistemi vasitəsilə müvafiq dövlət orqanından (qurumundan) əldə edilməsi mümkün olduqda, həmin sənədlər və məlumatlar müraciət edəndən tələb edilmir. Belə sənədlərin və məlumatların Elektron Hökumət İnformasiya Sistemi vasitəsilə əldə edilməsi mümkün olmadığı hallarda onların təqdim edilməsi müraciət edənin razılığı ilə sorğu əsasında müvafiq dövlət orqanından (qurumundan) tələb olunur və ya müraciət edən tərəfindən təmin edilir.

9-6.3. Mərkəzi Bank təqdim edilmiş sənədlərə 15  iş günü ərzində baxır.

9-6.4. Sənədlərdə və ya məlumatlarda çatışmazlıq aşkar edildikdə, ərizənin qeydiyyata alındığı tarixdən 3  iş günündən gec olmayaraq Mərkəzi Bank bu barədə məlumatı müraciət edənə təqdim edir. Bütün çatışmazlıqlar müraciət edənə eyni zamanda bildirilməlidir.

9-6.5. Müraciət edən həmin çatışmazlıqları məlumatı aldığı vaxtdan ən geci 10 iş günü ərzində aradan qaldırmalıdır. Bu zaman azad hesabatlı vençur kapitalı fondunun reyestrdə qeydə alınması ilə bağlı müddətin axımı dayandırılır və dayandırılmış müddət reyestrdə qeydə alınma müddətinə daxil edilmir. Çatışmazlıqların aradan qaldırılması barədə müraciət edənin müraciətindən sonra müddətin axımı bərpa olunur.

9-6.6. Müraciət edən ərizədə və ona əlavə edilmiş sənədlərdə və məlumatlarda aşkar olunmuş çatışmazlıqları bu Qanunun 9-6.5-ci maddəsində göstərilən müddətdə aradan qaldırmadıqda ərizən baxılmamış saxlanılır və bu barədə məlumatı 2 iş günü müddətində müraciət edənə təqdim edilir.

9-6.7. Müraciət edən aşkar olunmuş çatışmazlıqları aradan qaldırdıqdan sonra reyestrdə qeydə alınma üçün təkrar ərizə ilə Mərkəzi Banka müraciət edə bilər. Bu halda müraciətə yeni müraciət kimi baxılır.

9-6.8. Təqdim edilən sənədlərdə və məlumatlarda çatışmazlıq olmadıqda, Mərkəzi Bank fondu azad hesabatlı vençur kapitalı fondu reyestrinə daxil edir və bu barədə 5 iş günü müddətində fonda yazılı bildiriş göndərir.

9-6.9. Mərkəzi Bank aşağıdakı hallarda fondu azad hesabatlı vençur kapitalı fondu kimi reyestrdə qeydə almaqdan imtina edir:

9-6.9.1. ərizədə və ona əlavə olunmuş sənədlərdə bu Qanunun 9-6.1-ci maddəsində nəzərdə tutulmuş tələblərə uyğun olmayan məlumatlar olduqda (bu Qanunun 9-6.4-cü maddəsində nəzərdə tutulmuş hal istisna olmaqla);

9-6.9.2. çatışmazlıqların aradan qaldırılması barədə müraciət edən müraciətindən sonra çatışmazlıqların aradan qaldırılmadığı müəyyən edildikdə.

9-6.10. Fondu azad hesabatlı vençur kapitalı fondu kimi reyestrdə qeydə alınmasından imtina haqqında Mərkəzi Bankın qərarını aldıqdan sonra müraciət edənlər inzibati qaydada və məhkəməyə şikayət edə bilərlər.

Maddə 9-7. Azad hesabatlı vençur kapitalı fondunun hesabatlılığı

9-7.1. Azad hesabatlı vençur kapitalı fondu Mərkəzi Banka hesabat təqdim etməlidir.

9-7.2. Hesabatda aşağıdakı məlumatlar göstərilir:

9-7.2.1. hesabat dövrünün sonuna bu Qanunun 9-1.7-ci maddəsinə uyğun hesablanmış idarə edilən aktivlərin həcmi və komponentləri;

9-7.2.2. investorların ümumi sayı və onların hamısının peşəkar investor olduğuna dair təsdiqedici sənədlər;

9-7.2.3. investisiya portfeli haqqında icmal məlumat (əsas investisiya sahələri və coğrafi bölgüsü);

9-7.2.4. fondun borclanma səviyyəsi və bu Qanunun 9-1.4.1-ci maddəsinin tələblərinə uyğunluğunu təsdiq edən sənədlər.

9-7.3. Azad hesabatlı vençur kapitalı fondu bu Qanunun 9-7.2.1-ci maddəsində nəzərdə tutulan məlumatları hər təqvim ili üzrə növbəti ilin birinci rübü ərzində, bu Qanunun 9-7.2.2 – 9-7.2.4-cü maddələrində nəzərdə tutulan məlumatları isə yarımildə bir dəfə (avqust və fevral aylarında), habelə bu Qanunun 9-7.6.2-ci maddəsində investorlara təqdim olunması nəzərdə tutulan illik maliyyə hesabatlarını Mərkəzi Banka təqdim edir.

9-7.4. Hesabatın forması Mərkəzi Bank tərəfindən müəyyən edilir.

9-7.5. Azad hesabatlı vençur kapitalı fondu investisiya strategiyası, risklər, xərclər və kapital itkisi ehtimalı barədə investorları yazılı şəkildə məlumatlandırmalı və onlardan bu riskləri qəbul etdiklərinə dair yazılı təsdiq almalıdır. İnvestorlara təqdim edilən bütün təklif sənədlərində və marketinq materiallarında fondun fəaliyyət rejimi, o cümlədən azad hesabatlı vençur kapitalı fondunun lisenziyalaşdırılmamış statusu barədə investorlara aydın şəkildə məlumat verilməlidir.

9-7.6. Azad hesabatlı vençur kapitalı fondu investorlarına aşağıdakı dövrilikdə və məzmunda hesabat təqdim etməlidir:

9-7.6.1. rüblük əsasda aktivlərin xalis dəyəri, idarəetməsində olan müəssisələrin vəziyyəti və idarəetmə xərcləri barədə hesabat;

9-7.6.2. illik əsasda Maliyyə Hesabatlarının  Beynəlxalq Standartlarına uyğun hazırlanmış və kənar auditor tərəfindən təsdiq edilmiş maliyyə hesabatları və idarə edilən aktivlərin həcmi barədə məlumat.

Maddə 9-8. Azad hesabatlı vençur kapitalı fonduna dair nəzarət mexanizmləri 

9-8.1. Mərkəzi Bankın azad hesabatlı vençur kapitalı fondu üzərində nəzarəti bu Qanunun 9-7-ci maddəsinə əsasən təqdim edilən illik hesabatların monitorinqi vasitəsilə həyata keçirilir.

9-8.2. Mərkəzi Bank azad hesabatlı vençur kapitalı fondunda və ya onun idarəçisində yalnız aşağıdakı hallarda “Azərbaycan Respublikasının Mərkəzi Bankı haqqında” Azərbaycan Respublikasının Qanununa uyğun olaraq yoxlama apara bilər:

9-8.2.1. fondun azad hesabatlı vençur kapitalı fondu meyarlarını pozduğuna dair əsaslı şübhələr olduqda;

9-8.2.2. fondun fəaliyyətində investorların və digər üçüncü şəxslərin hüquqlarının pozulması barədə şikayət və ya məlumat daxil olduqda.              

Maddə 9-9. Akkreditə olunmuş investor statusunun yoxlanılması qaydaları

9-9.1. Vençur kapitalı fondu, investorun akkreditə olunmuş investor statusunu müəyyən etmək üçün onun tərəfindən imzalanmış yazılı bəyannaməyə əsaslana bilər. Bəyannamədə investorun bu Qanunun 1.1.7-3-cü maddəsindəki hansı meyara (meyarlara) cavab verdiyi göstərilməlidir. Fondun bu bəyanatın yanlış olduğuna dair faktiki məlumatı olduqda, investorun ona əsaslanmasına yol verilmir.

9-9.2. Vençur kapitalı fondu investorların akkreditə olunmuş investor statusunu yoxlamaq üçün investorlar tərəfindən aşağıdakı sənədlərdən  azı biri təqdim edilir:

9-9.2.1. fiziki şəxslərin gəlirlərini və ya xalis aktivlərini təsdiq edən rəsmi sənədlər (vergi bəyannamələri, bank (depozitar) çıxarışları, əmlak qiymətləndirmə hesabatları);

9-9.2.2. hüquqi şəxslərin audit yoxlamasından keçmiş maliyyə hesabatları;

9-9.2.3. investorun akkreditə olunmuş investor statusunu göstərən auditor rəyi.

9-9.4. Akkreditə olunmuş investor statusunun yoxlanılmasına dair sənədlər fond tərəfindən  azı 5 il müddətində saxlanılmalıdır.

9-9.5. Fəaliyyətlərin dəstəklənməsi və əlaqələndirilməsi habelə ümumi mənafelərinin (əmlak mənafeləri daxil olmaqla) təmsil və müdafiə edilməsi (o cümlədən, müəssisə, idarə və təşkilatlarda, dövlət orqanlarında (qurumlarında), beynəlxalq təşkilatlarda) məqsədi lə akkreditə olunmuş investor statusuna malik şəxslər qeyri-kommersiya hüquqi şəxsi formasında (akkreditə olunmuş investor birlikləri) birləşə bilər.

Maddə 9-10. Qapalı səhmdar cəmiyyəti formasında yaradılan vençur kapitalı fondunun təşkili və fəaliyyəti

9-10.1. Qapalı səhmdar cəmiyyəti formasında yaradılan vençur kapitalı fondu azı üç hüquqi və (və ya) fiziki şəxs tərəfindən yaradılır.

9-10.2. Qapalı səhmdar cəmiyyəti formasında yaradılan vençur kapitalı fondunun təsisçilərinin (iştirakçılarının) ümumi sayı əllidən çox ola bilməz.

9-10.3. Qapalı səhmdar cəmiyyəti formasında yaradılan vençur kapitalı fondu bu Qanunun 9-2-ci və 9-3-cü maddələrinə uyğun olaraq azad hesabatlı vençur kapitalı fondu və ya lisenziyalaşdırılan vençur kapitalı fondu rejimində fəaliyyət göstərə bilər.

9-10.3. Qapalı səhmdar cəmiyyəti formasında yaradılan vençur kapitalı fondunun iştirakçıları (səhmdarları) onun öhdəlikləri üçün cavabdeh deyildirlər və cəmiyyətin fəaliyyəti ilə bağlı zərər üçün onlara mənsub səhmlərin dəyəri həddində risk daşıyırlar.

Maddə 9-11. Qapalı səhmdar cəmiyyəti formasında yaradılan vençur kapitalı fondunda idarəetmə

9-11.1. Qapalı səhmdar cəmiyyəti formasında yaradılan vençur kapitalı fondunun səhmdarlarının ümumi yığıncağının müstəsna səlahiyyətlərinə Azərbaycan Respublikası Mülki Məcəlləsinin 107.1-ci maddəsi ilə nəzərdə tutulmuş səlahiyyətlərdən əlavə aşağıdakılar aiddir:

9-11.1.1. idarəçinin və ya depozitarın dəyişdirilməsi barədə qərarın qəbul edilməsi;

9-11.1.2. fondun xərclərinin artırılması barədə qərarın qəbul edilməsi.

9-11.2. Qapalı səhmdar cəmiyyəti formasında yaradılan vençur kapitalı fondunun səhmdarlarının ümumi yığıncağında iştirak etmək hüququna malik olan şəxslərin siyahısı vençur kapitalı fondunun səhmdarlarının reyestri əsasında müəyyənləşdirilir. Həmin siyahı səhmdarların ümumi yığıncağının keçirilməsi tarixinədək 60 gündən gec və 45 gündən tez olmayan müddətdə tərtib edilməlidir.

9-11.3. Qapalı səhmdar cəmiyyəti formasında yaradılan vençur kapitalı fondunun səhmdarların ümumi yığıncağının çağırılmasına azı 45 gün qalmış bu barədə məlumat verilməli, habelə tərtib edilmiş siyahı əsasında səhmdarlara, idarəçiyə, depozitara, həmçinin lisenziyalaşdırılan vençur kapitalı fondu tərəfindən Mərkəzi Banka yazılı bildiriş göndərilməlidir.

9-11.4. Qapalı səhmdar cəmiyyəti formasında yaradılan vençur kapitalı fondu ilə müvafiq müqavilələr bağlamış idarəçinin, depozitarın, auditorun və qiymətləndiricinin əməkdaşları, habelə onlara aidiyyəti olan şəxslər vençur kapitalı fondunun icra orqanının üzvü ola bilməzlər.

9-11.5. Qapalı səhmdar cəmiyyəti formasında yaradılan vençur kapitalı fondunun idarəetmə orqanlarının səlahiyyətləri, onların qərarları qəbul etmə prosedurları, o cümlədən barəsində qərarların yekdilliklə və ya şərtləşdirilmiş səs çoxluğu ilə qəbul edildiyi məsələlər səhmdar cəmiyyətlərə dair müvafiq normativ hüquqi aktlarla tənzimlənir.

9-11.6. Qapalı səhmdar cəmiyyəti formasında yaradılan vençur kapitalı fondunun icra orqanının üzvlərinin şəxsi marağı ilə vençur kapitalı fondunun maraqları arasında ziddiyyətlərə gətirib çıxara bilən hallarda məlumat verilməsi, habelə vençur kapitalı fondunun maraqlarına zidd olan əqdlərin bağlanması Azərbaycan Respublikasının Mülki Məcəlləsinin 107-10.5-ci maddəsinin tələblərinə uyğun olaraq həyata keçirilir.

Maddə 9-12. Qapalı səhmdar cəmiyyəti formasında yaradılan vençur kapitalı  fondunun investisiya bəyannaməsi

9-12.1. Qapalı səhmdar cəmiyyəti formasında yaradılan vençur kapitalı fondunun investisiya bəyannaməsi fondun təsis yığıncağının qərarı ilə, fond yaradıldıqdan sonra isə səhmdarların ümumi yığıncağının qərarı ilə qəbul edilir.

9-12.2. Qapalı səhmdar cəmiyyəti formasında yaradılan vençur kapitalı fondunun investisiya bəyannaməsində aşağıdakılar göstərilir:

9-12.2.1. vençur kapitalı fondunun, idarəçinin (olduqda), depozitarın və auditorun tam adı və yerləşdiyi ünvan;

9-12.2.2. qiymətləndiricinin və ya qiymətləndirici təşkilatın (olduqda) tam adı, fəaliyyət və ya hüquqi ünvanları;

9-12.2.3. vençur kapitalı fondunun investisiya strategiyası, şərtləri, istiqamətləri və sahələri haqqında məlumat;

9-12.2.4. vençur kapitalı fondunun aktivlərinin diversifikasiyası şərtləri;

9-12.2.5. investisiyaların həyata keçirilməsi ilə bağlı risklər;

9-12.2.6. investisiya fəaliyyətinə dair məhdudiyyətlər;

9-12.2.7. fondun aktivləri hesabına idarəçiyə, depozitara və digər şəxslərə ödəniləcək mükafatların, xərclərin və xidmət haqlarının hesablanma qaydaları və maksimum həcmi;

9-12.2.8. dividendlərin ödənilməsi qaydası;

9-12.2.9. vençur kapitalı fondundan və səhmdarlardan qanunla nəzərdə tutulmuş vergilər və onların ödənilməsi qaydası barədə məlumat;

9-12.2.10. vençur kapitalı fondunun fəaliyyətinə dair məlumatların açıqlanması qaydaları;

9-12.2.11. vençur kapitalı fondunun müddəti və investisiyalardan çıxış strategiyası;

9-12.2.12. investisiya bəyannaməsinə əlavə və dəyişikliklərin edilmə proseduru və investorların məlumatlandırılması qaydası;

9-12.2.13. investisiya portfelinə dair tərtib olunan hesabatın əsas valyutası.

9-12.3. Qapalı səhmdar cəmiyyəti formasında yaradılan lisenziyalaşdırılan vençur kapitalı fondunun investisiya bəyannaməsi onun səhm buraxılışı ilə birgə dövlət qeydiyyatına alınır. Səhm buraxılışının dövlət qeydiyyatı “Qiymətli kağızlar bazarı haqqında” Azərbaycan Respublikasının Qanununa uyğun olaraq həyata keçirilir. Azad hesabatlı vençur kapitalı fondunun investisiya bəyannaməsi isə fondun reyestrdə qeydə alılnmasızamanı Mərkəzi Banka təqdim edilir. 

9-12.4. Qapalı səhmdar cəmiyyəti formasında yaradılan vençur kapitalı fondunun investisiya bəyannaməsi hər bir potensial investora təqdim edilməlidir.

Maddə 9-13. Kommandit ortaqlığı formasında yaradılan vençur kapitalı fondunun təşkili və fəaliyyəti

9-13.1. Kommandit ortaqlığı formasında yaradılan vençur kapitalı fondu bu Qanunun 9-2-ci və 9-3-cü maddələrinə uyğun olaraq azad hesabatlı vençur kapitalı fondu və ya lisenziyalaşdırılan vençur kapitalı fondu rejimində fəaliyyət göstərə bilər.

9-13.2. Kommandit ortaqlığı formasında yaradılan vençur kapitalı fondunun tam ortaqları istisna olmaqla, digər ortaqlar (kommanditçi) fondun öhdəlikləri üzrə məsuliyyət daşımır və fondun fəaliyyəti ilə bağlı zərər üçün qoyduqları mayaların dəyəri həddində risk daşıyırlar.

Maddə 9-14. Kommandit ortaqlığı formasında yaradılan vençur kapitalı fondunda idarəetmə

9-14.1. Kommandit ortaqlığı formasında yaradılan vençur kapitalı fondunda idarəetmə Azərbaycan Respublikasının Mülki Məcəlləsinə uyğun həyata keçirilir.

9-14.2. Kommandit ortaqlığı formasında yaradılan vençur kapitalı fondu ilə müvafiq müqavilələr bağlamış idarəçi, depozitar, auditor və qiymətləndirici, habelə onlara aidiyyəti olan şəxslər və onların nümayəndələri fondun iştirakçısı ola bilməz.

Maddə 9-15. Kommandit ortaqlığı formasında yaradılan vençur kapitalı fondunun investisiya bəyannaməsi

9-15.1. Kommandit ortaqlığı formasında yaradılan vençur kapitalı fondunun investisiya bəyannaməsi fondun tam ortaqlarının qərarı ilə qəbul edilir.

9-15.2. Kommandit ortaqlığı formasında yaradılan vençur kapitalı fondunun investisiya bəyannaməsində aşağıdakılar göstərilir:

9-15.2.1. vençur kapitalı fondunun və idarəçinin (olduqda) tam adı və yerləşdiyi ünvan;

9-15.2.2. qiymətləndiricinin və ya qiymətləndirici təşkilatın (olduqda) tam adı, fəaliyyəti və hüquqi ünvanları;

9-15.2.3. fondun investisiya strategiyası, şərtləri, istiqamətləri və sahələri haqqında məlumat;

9-15.2.4. fondun aktivlərinin diversifikasiyası şərtləri;

9-15.2.5. investisiyaların həyata keçirilməsi ilə bağlı risklər;

9-15.2.6. investisiya fəaliyyətinə dair məhdudiyyətlər;

9-15.2.7. fondun aktivləri hesabına idarəçiyə digər şəxslərə ödəniləcək mükafatların, xərclərin və xidmət haqlarının hesablanma qaydaları və maksimum həcmi;

9-15.2.8. mənfəət və zərərin bölüşdürülməsi qaydası;

9-15.2.9. vençur kapitalı fondundan və iştirakçılardan qanun vericiliklə nəzərdə tutulmuş vergilər və onların ödənilməsi qaydası barədə məlumat;

9-15.2.10. fondun fəaliyyətinə dair məlumatların açıqlanması qaydaları;

9-15.2.11. vençur kapitalı fondunun müddəti və investisiyalardan çıxış strategiyası;

9-15.2.12. investisiya bəyannaməsinə əlavə və dəyişikliklərin edilmə proseduru və investorların məlumatlandırılması qaydası;

9-15.2.13. investisiya portfelinə dair tərtib olunan hesabatın əsas valyutası.

9-15.3. Kommandit ortaqlığı formasında yaradılan vençur kapitalı fondunun investisiya bəyannaməsinin təsdiq edilməsi barədə qərar fondun tam ortaqları tərəfindən qəbul edildikdən sonra 5 iş günü ərzində Mərkəzi Banka təqdim edilir. Mərkəzi Bank investisiya bəyannaməsini 10 iş günü ərzində qeydiyyata alır.

9-15.4. Kommandit ortaqlığı formasında yaradılan vençur kapitalı fondunun investisiya bəyannaməsi ictimaiyyətə açıqlanmır (dərc edilmir), lakin bütün iştirakçılara təqdim edilməlidir.

Maddə 9-16. Məhdud məsuliyyətli cəmiyyət formasında yaradılan vençur kapitalı fondunun təşkili və fəaliyyəti

9-16.1. Məhdud məsuliyyətli cəmiyyət formasında yaradılan vençur kapitalı fondu yalnız azad hesabatlı vençur kapitalı fondu rejimində fəaliyyət göstərə bilər.

9-16.2. Məhdud məsuliyyətli cəmiyyət formasında yaradılan azad hesabatlı vençur kapitalı fondunun nizamnamə kapitalı iştirakçıların bəyan etdiyi ödənilməmiş kapital öhdəliyi prinsipi əsasında formalaşdırıla bilər. İştirakçılar nizamnamə kapitalındakı paylarını (kapital öhdəliyini) fondun nizamnaməsində və ya investisiya bəyannaməsində müəyyən edilmiş investisiya dövrü ərzində, vençur kapitalı fondunun və ya onun idarəçisinin yazılı tələbi əsasında, tələbdə göstərilən və 30 (otuz) iş günündən çox olmayan müddətdə ödəyirlər. İnvestisiya dövrü başa çatdıqda iştirakçıların tələb olunmamış və ödənilməmiş kapital öhdəliklərinə xitam verilir və fondun nizamnamə kapitalı faktiki ödənilmiş məbləğə qədər azaldılır.

9-16.3. İştirakçı kapital öhdəliyini yazılı tələbdə müəyyən edilmiş müddətdə icra etmədikdə, fondun nizamnaməsində və ya təsis sənədlərində nəzərdə tutulmuş qaydada həmin iştirakçıya qarşı aşağıdakı tədbirlərdən biri və ya bir neçəsi tətbiq edilə bilər:

9-16.3.1. ödənilməmiş məbləğə münasibətdə cərimələrin və ya dəbbə pulunun hesablanması;

9-16.3.2. fondun idarə edilməsində səsvermə hüququnun və fondun mənfəətindən (gəlirindən) pay almaq hüququnun məhdudlaşdırılması və ya dayandırılması;

9-16.3.3. iştirakçının fonddakı ödənilməmiş pay hissəsinin və ya əvvəllər ödəmiş olduğu məbləğlərin məcburi qaydada fondun digər iştirakçılarına, yaxud üçüncü şəxslərə (peşəkar investorlara) satılması.

9-16.4. Fondun iştirakçılarının sayı əllidən çox ola bilməz.

9-16.5. İştirakçılar fondun öhdəlikləri üzrə məsuliyyət daşımır və fondun fəaliyyəti ilə bağlı zərər üçün qoyduqları mayaların dəyəri həddində risk daşıyırlar.

9-16.6. Fondun fəaliyyət müddəti ərzində iştirakçının cəmiyyətdən çıxmaq və payının dəyərini tələb etmək hüququ nizamnamə ilə məhdudlaşdırıla bilər.

9-16.7. Məhdud məsuliyyətli cəmiyyət formasında yaradılan vençur kapitalı fondu azı iki iştirakçı tərəfindən yaradılır.

Maddə 9-17. Məhdud məsuliyyətli cəmiyyət formasında yaradılan vençur kapitalı fondunda idarəetmə

9-17.1. Fondun ali idarəetmə orqanı iştirakçıların ümumi yığıncağıdır. Ümumi yığıncağın səlahiyyətləri Azərbaycan Respublikasının Mülki Məcəlləsinin 91.3-cü maddəsinə uyğun olaraq müəyyən edilir. Ümumi yığıncaq, o cümlədən, fondun idarəçisinin (icra orqanının və ya kənar idarəçinin) təyini və azad edilməsi məsələlərini həll edir.

9-17.2. Fondun cari fəaliyyətinə rəhbərlik təkbaşına icra orqanı (direktor) və ya kollegial icra orqanı tərəfindən həyata keçirilir. Fondun idarə edilməsi müqavilə əsasında kənar idarəçiyə verilə bilər.

9-17.3. Təsis sənədlərində nəzərdə tutulduğu halda fondun mənfəəti və zərəri iştirakçılar arasında onların nizamnamə kapitalındakı paylarına mütənasib olmayan qaydada bölüşdürülə bilər.

Maddə 9-18. Məhdud məsuliyyətli cəmiyyət formasında yaradılan vençur kapitalı fondunun investisiya bəyannaməsi

9-18.1. İnvestisiya bəyannaməsi iştirakçıların ümumi yığıncağının qərarı ilə qəbul edilir.

9-18.2. Məhdud məsuliyyətli cəmiyyət formasında yaradılan vençur kapitalı fondunun  investisiya bəyannaməsində bu Qanunun 9-12.2-ci maddəsində qeyd edilən məlumatlar   göstərilir.

9-18.3. İnvestisiya bəyannaməsi ictimaiyyətə açıqlanmır (dərc edilmir), lakin fondun reyestrdə qeydə alınması zamanı Mərkəzi Banka və hər bir investora təqdim edilməlidir.”;

5.4. aşağıdakı məzmunda 10.8-ci, 13.2-1-ci və 14.1.1-1-ci maddələr əlavə edilsin:

“10.8. Vençur kapitalı fondu kimi fəaliyyət göstərən  qapalı paylı investisiya fondunun pay mülkiyyətçilərinin (peşəkar investorlarının) ümumi sayı yüzdən çox ola bilməz.”;

“13.2-1. Vençur kapitalı fondu fəaliyyəti ilə məşğul olan qapalı paylı investisiya fondunun idarə edilməsi qaydalarında bu Qanunun 13.2-ci maddəsində qeyd olunan məlumatlardan əlavə idarəçinin peşəkar investorlardan cəlb edilən pul vəsaitlərinin bu Qanunun 9-1.3-cü maddəsində nəzərdə tutulan məqsədlərə və Mərkəzi Bank tərəfindən müəyyən edilmiş qaydada investisiya qiymətli kağızlarına investisiya edəcəyi ilə bağlı şərt əlavə edilməlidir.”;

“14.1.1-1. vençur kapitalı fondu fəaliyyəti ilə məşğul olan qapalı paylı investisiya fondunun peşəkar investorlardan cəlb edilən pul vəsaitlərinin bu Qanunun 9-1.3-cü maddəsində nəzərdə tutulan məqsədlərə və Mərkəzi Bank tərəfindən müəyyən edilmiş qaydada investisiya qiymətli kağızlarına investisiya edilməsi haqqında məlumat;”;

5.5. 24-cü maddə üzrə:

5.5.1. 24.2-ci maddənin birinci cümləsinə “İdarəçi” sözündən sonra “(investisiya şirkətləri istisna olmaqla)” sözləri əlavə edilsin;

5.5.2. aşağıdakı məzmunda 24.13-cü maddə əlavə edilsin:

“24.13. Vençur kapitalı fondları müvafiq olaraq məhdud məsuyliyyətli cəmiyyətinin və ya qapalı səhmdar cəmiyyətinin icra orqanı və ya komandit ortaqlığının tam ortağı (ortaqları) tərəfindən idarə olunduğu halda kənar idarəçi cəlb etməyə bilər.”;

5.6. 25.11.5-ci maddənin birinci abzasına və 25.11.6-cı maddəyə “idarəçi” sözündən sonra “, kommandit ortaqlığı formasında yaradılan vençur kapitalı fondunun işlərini aparan tam ortağı (ortaqları)” sözləri əlavə edilsin;

5.7. 27-ci maddə üzrə:

5.7.1. 27.1.1-ci və 27.2.4-cü maddələrə “üzvü” sözündən sonra “(kommandit ortaqlığı formasında yaradılan vençur kapitalı fondunun işlərini aparan tam ortağı (ortaqları)” sözləri əlavə edilsin;

5.7.2. 27.2.5-ci maddəyə “yığıncağının” sözündən sonra “(kommandit ortaqlığı formasında yaradılan vençur kapitalı fondunun tam ortağı (ortaqları)” sözləri əlavə edilsin;

5.7.3. 27.2.5-1-ci maddəyə “orqanı” sözündən sonra “(kommandit ortaqlığı formasında yaradılan vençur kapitalı fondunun işlərini aparan tam ortağı (ortaqları)” sözləri əlavə edilsin;

5.7.4. 27.2.9-cu maddəyə “üzvləri” sözündən sonra “(kommandit ortaqlığı formasında yaradılan vençur kapitalı fondunun işlərini aparan tam ortağı (ortaqları)” sözləri əlavə edilsin;

5.8. aşağıdakı məzmunda 29.1-1-ci maddə əlavə edilsin:

“29.1-1. Vençur kapitalı fondunun aktivləri pul vəsaitlərindən, hüquqi şəxslərin nizamnamə (şərikli) kapitalında iştirak paylarından (səhmlərindən), investisiya qiymətli kağızlardan və portfel şirkətlərinə verilən borclardan, gələcəkdə kapitala çevrilmə hüququ verən borc alətlərindən, digər investisiya fondlarında (o cümlədən vençur fondlarında) iştirak paylarından, habelə investisiya strategiyasına uyğun olaraq digər maliyyə aktivlərindən və digər maliyyə alətlərindən ibarət ola bilər. Vençur kapitalı fondunun aktivlərinin tərkibinə və strukturuna dair tələblər Mərkəzi Bank tərəfindən qəbul olunmuş normativ xarakterli aktlarla müəyyən edilir.”;

5.9. 30.2-ci maddəyə “edilməsini” sözündən sonra “, vençur kapitalı fondları həmçinin maliyyə hesabatlarının təqdim və dərc edilməsini” sözləri əlavə edilsin;

5.10. 36-cı maddə üzrə:

5.10.1. aşağıdakı məzmunda 36.1.9-1-ci və 36.1.9-2-ci maddələr əlavə edilsin:

“36.1.9-1. vençur kapitalı fondunun idarəçi tərəfindən idarə edilməsi nəzərdə tutulduqda vençur kapitalı fondunun idarə edilməsini həyata keçirəcək idarəçi barədə məlumat;

36.1.9-2. vençur kapitalı fondunun öz idarəetmə orqanları tərəfindən idarə olunması nəzərdə tutulduqda həmin idarəetmə orqanları barədə məlumat;”;

5.10.2. 36.1.13-cü maddəyə “əməkdaşlarının” sözündən sonra “(vençur kapitalı fondlarında baş mühasib (bu vəzifələri icra edən şəxs mövcud olduqda)” sözləri əlavə edilsin;

5.10.3. 36.1.15-ci maddədə “səhmdarları” sözü “iştirakçıları” sözü ilə əvəz edilsin;

5.11. 38.2.1-ci maddəyə “fondunun” sözündən sonra “və bu Qanunun 24.13-cü maddəsində göstərilən hal istisna olmaqla vençur kapitalı fondunun” sözləri əlavə edilsin;

5.12. 40-cı maddə üzrə:

5.12.1. 40.2-ci maddəyə “üzvü” sözündən sonra “, habelə kommandit ortaqlığı formasında yaradılan vençur kapitalı fondunun işlərini aparan tam ortağı (ortaqları)” sözləri əlavə edilsin;

5.12.2. 40.4-cü maddəyə “barəsində” sözündən sonra “, habelə kommandit ortaqlığı formasında yaradılan vençur kapitalı fondunun işlərini aparan tam ortaq (ortaqlar) müəyyən olunduqda və dəyişdirildikdə” sözləri əlavə edilsin;

5.12.3. 40.4-2-ci maddədə “verməlidir” sözü “verməli, habelə kommandit ortaqlığı formasında yaradılan vençur kapitalı fondunun tam ortağının (ortaqlarının) işlərin aparılması səlahiyyətinə xitam verməlidir” sözləri ilə əvəz edilsin;

5.13. 41-ci maddə üzrə:

5.13.1. 41.1.1-ci maddəyə “orqanının” sözündən sonra “(kommandit ortaqlığı formasında yaradılan vençur kapitalı fondunun tam ortağının (ortaqlarının)” sözləri əlavə edilsin;

5.13.2. aşağıdakı məzmunda 41.1.1-1-ci maddə əlavə edilsin:

“41.1.1-1. idarəçi tərəfindən idarə olunan vençur kapitalı fondunun idarəçisi tərəfindən vençur kapitalı fondunun bütün səhmləri və ya payları satın alındıqda;”;

5.13.3. 41.3-cü maddənin ikinci cümləsinə “fondu” sözündən sonra “və bu Qanunun 24.13-cü maddəsinin tələbi nəzərə alınmaqla vençur kapitalı fondu” sözləri əlavə edilsin;

5.14. 45-ci maddə üzrə:

5.14.1. 45.2.1-ci maddədə, 45.3-cü maddənin birinci cümləsində və 45.8-ci maddədə ismin müvafiq hallarında “yığıncağı” sözündən sonra ismin müvafiq hallarında “(kommandit ortaqlığı formasında yaradılan vençur kapitalı fondunun tam ortağı (ortaqları)” sözləri əlavə edilsin;

5.14.2. 45.9-cu maddəyə “orqanına” sözündən sonra “(kommandit ortaqlığı formasında yaradılan vençur kapitalı fondunun tam ortağına (ortaqlarına)” sözləri əlavə edilsin;

5.14.3. 45.14-cü maddənin ikinci cümləsinə “səhmdarlar” sözündən sonra “(kommandit ortaqlığı formasında yaradılan vençur kapitalı fondunun tam ortağı (ortaqları)” sözləri əlavə edilsin;

5.15. 46-cı maddə üzrə:

5.15.1. 46.4-cü maddənin birinci cümləsinə “yığıncağının” sözündən sonra “(kommandit ortaqlığı formasında yaradılan vençur kapitalı fondunun tam ortağının (ortaqlarının)” sözləri əlavə edilsin;

5.15.2. 46.16-cı maddəyə “orqanına” sözündən sonra “(kommandit ortaqlığı formasında yaradılan vençur kapitalı fondunun işlərini aparan tam ortağına (ortaqlarına)” sözləri əlavə edilsin;

5.15.3. 46.17.2-ci maddəyə “səhmdarlarının” sözündən sonra “(kommandit ortaqlığı formasında yaradılan vençur kapitalı fondunun iştirakçılarının)” sözləri əlavə edilsin;

5.16. 46.25-ci maddənin üçüncü cümləsinə “səhmdarlar” sözündən sonra “(kommandit ortaqlığı formasında yaradılan vençur kapitalı fondunun iştirakçıları)” sözləri əlavə edilsin;

5.17. 48-ci maddə üzrə:

5.17.1. 48.1.4-cü maddəyə “mülkiyyətçilərinin” sözündən sonra “(səhmdarlarının)” sözü əlavə edilsin;

5.17.2. 48.1.6-cı maddəyə “üzvləri” sözündən sonra “(kommandit ortaqlığı formasında yaradılan vençur kapitalı fondunun işlərini aparan tam ortağı (ortaqları)” sözləri əlavə edilsin;

5.17.3. 48.4-cü maddənin birinci cümləsinə “fondları” sözündən sonra “(vençur kapitalı fondları istisna olmaqla)” sözləri əlavə edilsin.

Maddə 6. “Qiymətli kağızlar bazarı haqqında” Azərbaycan Respublikasının Qanununda (Azərbaycan Respublikasının Qanunvericilik Toplusu, 2015, № 7, maddə 813 (Cild I); 2025, № 4 (I kitab), maddə 318, № 5, maddə 432, № 7, maddə 613) aşağıdakı dəyişikliklər edilsin:

6.1. aşağıdakı məzmunda 1.0.7-1-ci maddə əlavə edilsin:

“1.0.7-1. peşəkar investor – institusional investorlar da daxil olmaqla Azərbaycan Respublikasının Mərkəzi Bankı tərəfindən müəyyən olunan tələblərə cavab verən hüquqi və fiziki şəxslər;”;

6.2. 5.5.5-ci maddədə “institusional” sözü “peşəkar” sözü ilə əvəz edilsin.

Azərbaycan Respublikasının Prezidenti

13 iyul 2026

Layihə

AZƏRBAYCAN RESPUBLİKASININ QANUNU

Azərbaycan Respublikasının Əmək Məcəlləsində, Azərbaycan Respublikasının Mülki Məcəlləsində, "Valyuta tənzimi haqqında", "İnvestisiya fondları haqqında" və "Qiymətli kağızlar bazarı haqqında" Azərbaycan Respublikasının qanunlarında dəyişiklik edilməsi barədə

Azərbaycan Respublikasının Milli Məclisi Azərbaycan Respublikası Konstitusiyasının 94-cü maddəsinin I hissəsinin 10-cu, 12-ci, 13-cü, 15-ci, 16-cı, 20-ci və 27-ci bəndlərini rəhbər tutaraq qərara alır:

Maddə 1. Azərbaycan Respublikasının Əmək Məcəlləsində (Azərbaycan Respublikasının Qanunvericilik Toplusu, 1999, № 4, maddə 213 (Cild I); 2024, № 1, maddə 6, № 4, maddə 365, № 7, maddə 744, № 8, maddə 934; 2025, № 1, maddələr 1, 16, № 2, maddə 96, № 4 (I kitab), maddə 322, № 7, maddələr 606, 608; 2026, № 1, maddələr 8, 16, № 2, maddə 110, № 3, maddə 209; Azərbaycan Respublikasının 2026-cı il 3 mart tarixli 376-VIIQD nömrəli, 10 aprel tarixli 383-VIIQD nömrəli, 27 aprel tarixli 394-VIIQD və 1 may tarixli 401-VIIQD nömrəli qanunları) aşağıdakı dəyişikliklər edilsin:

1.1. 3-cü maddəyə aşağıdakı məzmunda 7-1-ci hissə əlavə edilsin:

"7-1. İşçilərin pay (səhm) iştirakı planı haqqında müqavilə - kommersiya hüquqi şəxsin  təsisçisinin (iştirakçısının) və ya onun verdiyi səlahiyyət əsasında işəgötürənin təşəbbüsü ilə işçiyə güzəştli şərtlərlə və ya ödənişsiz əsasla müəssisənin paylarının (səhmlərinin) verilməsi və ya gələcəkdə onları əldə etmək (almaq) hüququnun tanınması ilə bağlı məsələləri tənzimləyən ayrıca müqavilə.";

1.2. aşağıdakı məzmunda 7-1-ci və 76-1-ci maddələr əlavə edilsin:

"Maddə 7-1. İşçilərin pay (səhm) iştirakı planı haqqında müqavilənin şərtləri

7-1.1. Təsisçi və ya işəgötürənlə işçi arasında bağlanan işçilərin pay (səhm) iştirakı planı haqqında müqavilədə payların (səhmlərin) işçinin tam mülkiyyətinə keçməsi üçün aşağıdakı xüsusi şərtlərdən biri müəyyən edilə bilər:

7-1.1.1. zamana əsaslanan şərt: tərəflər arasında müəyyən edilmiş müddət ərzində işçinin işəgötürənlə əmək münasibətlərində olması şərtilə paya (səhmə) olan hüququnun hissə-hissə və ya müddətin sonunda tam qüvvəyə minməsi;

7-1.1.2. hədəfə əsaslanan şərt: işçinin və ya kommersiya hüquqi şəxsin fəaliyyətində müəyyən hədəflərə nail olunması şərtilə paya (səhmə) olan hüququnun qüvvəyə minməsi.

7-1.2. Tərəflər işçilərin pay (səhm) iştirakı planı haqqında müqavilədə bu Məcəllənin 76-1.1-ci maddəsinə uyğun olaraq, əmək münasibətlərinə xitam verilməsi əsaslarından asılı olaraq paya (səhmə) olan hüquqlarının əldə edilib-edilməməsi nəticələrini müəyyən edə bilərlər.";

"Maddə 76-1. Əmək münasibətlərinə xitam verilməsinin işçilərin pay (səhm)

iştirakı planı haqqında müqaviləyə təsiri

76-1.1. İşçilərin pay (səhm) iştirakı planı haqqında müqavilədə işçi ilə əmək münasibətlərinə xitam verildikdə, həmin xitamın əsaslarından asılı olaraq işçinin paya (səhmə) olan hüquqlarına və ya əldə etdiyi paylara (səhmlərə) fərqli hüquqi nəticələr nəzərdə tutula bilər.

76-1.2. Bu Məcəllənin 69-cu maddəsi, 70-ci maddəsinin "a", "b", "d" və "e" bəndləri, 73-cü maddəsi, 74-cü maddəsinin birinci hissəsinin "a", "b", "c", "d", "e" və "ə" bəndləri ilə əmək müqaviləsinə xitam verilməsi hallarında işçinin əldə edilməmiş paya (səhmə) olan hüquqlarının hamısının və ya bir hissəsinin əldə edilmiş hesab edilməsi və ya əldə edilmiş payların (səhmlərin) ədalətli bazar dəyəri ilə kommersiya hüquqi şəxsə və ya təsisçiyə (iştirakçıya) geri satılması öhdəliyi nəzərdə tutula bilər.

76-1.3. Bu Məcəllənin 70-ci maddəsinin "c" və "ç" bəndləri, 74-cü maddəsinin birinci hissəsinin "ç" və "f" bəndləri ilə əmək müqaviləsinə xitam verilməsi hallarında işçilərin pay (səhm) iştirakı planı haqqında müqavilədə işçinin bütün əldə edilməmiş paya (səhmə) olan hüquqlarını itirməsi və ya əldə etdiyi payları (səhmləri) nominal və ya daha aşağı dəyərlə kommersiya hüquqi şəxsə və ya təsisçiyə (iştirakçıya) geri satılması ilə bağlı hüquqi nəticələr nəzərdə tutula bilər.";

1.3. 154-cü maddəyə aşağıdakı məzmunda 4-cü hissə əlavə edilsin:

"4. İşçinin pay (səhm) iştirakı planı haqqında müqavilənin tələblərinə uyğun olaraq əldə edilən pay (səhm) əmək haqqına daxil edilmir və əmək haqqı əvəzi kimi ödənilmir.".

Maddə 2. Azərbaycan Respublikasının Mülki Məcəlləsində (Azərbaycan Respublikasının Qanunvericilik Toplusu, 2000, № 4 (I kitab), maddə 250 (Cild I); 2024, № 2, maddə 138, № 4, maddə 365, № 5 (I kitab), maddə 493, № 7, maddə 744, № 12 (I kitab), maddə 1281; 2025, № 1, maddə 17, № 3, maddə 216, № 4 (I kitab), maddələr 315, 318, № 6, maddələr 523, 524, 536, № 7, maddələr 610, 626, № 8, maddələr 738, 741, 743, 744, № 11, maddə 1004; 2026, № 1, maddə 2, № 3, maddə 208) aşağıdakı dəyişikliklər edilsin:

2.1. aşağıdakı məzmunda 61.7-1-ci, 64.10-cu, 65-1-ci, 65-2-ci və 88.3-cü maddələr əlavə edilsin:

"61.7-1. Bu Məcəllənin 404-4.3-cü maddəsində nəzərdə tutulan halda gələcək iştirak payı (səhm) haqqında müqavilə üzrə investorun ödəniş tələbləri, hüquqi şəxsin digər təminatsız kreditorlarının tələblərindən sonra, lakin hüquqi şəxsin iştirakçılarına (səhmdarlarına) qalıq əmlakın verilməsindən (bölüşdürülməsindən) əvvəl yerinə yetirilir.";

 "64.10. Bu Məcəllənin 90.4-cü və 104.1-ci maddələrinin tələblərindən fərqli olaraq təsərrüfat cəmiyyətinin nizamnaməsi ilə direktorlar şurasına (müşahidə şurasına) təsisçilərin (iştirakçıların) ümumi yığıncağını çağırmadan, nizamnamədə əvvəlcədən yuxarı həddi nəzərdə tutulmuş, lakin şərtləri (hüquqları, imtiyazları və məhdudiyyətləri) hələ müəyyən edilməmiş yeni payların ayrılması və ya səhmlərin buraxılması barədə qərar qəbul etmək səlahiyyəti verilə bilər. Bu payların (səhmlərin) emissiya şərtləri direktorlar şurasının (müşahidə şurasının) qərarı ilə müəyyən edilir və bununla bağlı nizamnaməyə edilən dəyişikliklər qanunla müəyyən edilmiş qaydada dövlət qeydiyyatına alınır.";

 "Maddə 65-1. Korporativ müqavilə

65-1.1. Məhdud məsuliyyətli cəmiyyətin iştirakçıları və ya səhmdar cəmiyyətinin səhmdarları, habelə korporativ müqavilədən irəli gələn öhdəliklərin icrasında iştirakı zəruri olduğu hallarda cəmiyyətin özü, öz aralarında və ya cəmiyyətlə öz korporativ hüquqlarının həyata keçirilməsi qaydasını və cəmiyyətin fəaliyyətinin təmin edilməsi və idarə edilməsi ilə bağlı məsələləri müəyyən edən korporativ müqavilə bağlaya bilərlər. Korporativ müqaviləyə əsasən həmin subyektlər öz hüquqlarını bu müqavilə ilə müəyyən edilmiş qaydada həyata keçirməyi və ya onların həyata keçirilməsindən çəkinməyi (imtina etməyi) öhdələrinə götürürlər.

65-1.2. Korporativ müqavilədə təsisçilərin (iştirakçıların) aşağıdakı məsələlərlə bağlı hüquq və vəzifələri bu Məcəllə ilə və digər normativ hüquqi aktlarla müəyyən edilmiş tələblərə zidd olmamaq şərtilə tənzimlənə bilər:

65-1.2.1. təsərrüfat cəmiyyətinin təsisçilərinin (iştirakçılarının) ümumi yığıncağında səsvermə qaydaları və şərtləri;

65-1.2.2. təsərrüfat cəmiyyətinin nizamnamə kapitalındakı payların (səhmlərin) özgəninkiləşdirilməsi qaydaları, müəyyən qiymətə və ya müəyyən hallar baş verdikdə həmin payların (səhmlərin) alınması, yaxud da onların əldə edilməsindən və ya özgəninkiləşdirilməsindən imtinanı, o cümlədən payların (səhmlərin) qiymətinin müəyyən edilməsi qaydasını və bu Məcəllənin 93-cü və 101-ci maddələrində nəzərdə tutulan qaydalardan fərqli olaraq bu Məcəllənin 65-2-ci maddəsində nəzərdə tutulan xüsusi hüquqların tətbiqi;

65-1.2.3. təsərrüfat cəmiyyətinin idarə edilməsi üzrə, o cümlədən cəmiyyətin idarəetmə orqanlarının formalaşdırılması və fəaliyyətinin təşkili üzrə şərtlər;

65-1.2.4. korporativ müqavilənin tərəfi olan təsərrüfat cəmiyyətinin təsisçilərinə (iştirakçılarına) məxsus payların (səhmlərin) tam mülkiyyət hüququnun korporativ müqavilədə nəzərdə tutulmuş hədəflərə çatmaqdan asılı olaraq tədricən yaranması qaydaları və şərtləri, o cümlədən həmin müddət bitənədək və ya hədəflərə çatılmadıqda payların (səhmlərin) cəmiyyət və ya digər iştirakçılar tərəfindən geri alınması mexanizmləri;

65-1.2.5. korporativ müqavilənin tərəfi olan və eyni zamanda təsərrüfat cəmiyyəti ilə əmək münasibətlərində olan təsisçinin (iştirakçının) onunla olan əmək münasibətlərinə xitam verilməsinin əsaslarından asılı olaraq paylarını (səhmlərini) digər iştirakçılara və ya cəmiyyətə geri satması və həmin satış üzrə qiyməti və şərtləri müəyyən edən müddəalar;

65-1.2.6. mübahisələrin həlli qaydası, tərəflər arasında fikir ayrılığı yarandıqda tətbiq ediləcək mübahisələrin həlli üsulları, o cümlədən arbitraj və tətbiq ediləcək hüquq barədə şərtlər;

65-1.2.7. cəmiyyətin idarə edilməsində korporativ müqavilə iştirakçıları üçün xüsusi əhəmiyyət kəsb edən məsələlərin (qorunan məsələlərin) siyahısı, habelə bu məsələlər üzrə qərar qəbulu və səsvermə qaydaları;

65-1.2.8. təsərrüfat cəmiyyətinin idarəetmə orqanlarına namizədlərin təyinatının razılaşdırılması və şərtləri, habelə müəyyən iştirakçıların nümayəndələrinin cəmiyyətin idarəetmə orqanlarının iclaslarında səs hüququ olmadan iştirak etmək və iclas materialları ilə tanış olmaq hüququ;

65-1.2.9. təsərrüfat cəmiyyətinə investisiya edilmiş vəsaitlərin istifadə istiqamətləri və xərclənməsinə nəzarət mexanizmləri;

65-1.2.10. payların (səhmlərin) özgəninkiləşdirilməsi zamanı payı (səhmi) əldə edən yeni iştirakçının (səhmdarın) həmin müqaviləyə qoşulması proseduru;

65-1.2.11. korporativ müqavilənin şərtlərinin pozulmasının hüquqi nəticələri;

65-1.2.12. korporativ müqavilə iştirakçılarının razılığı ilə müəyyən edilən və normativ hüquqi aktlara zidd olmayan digər şərtlər.

65-1.3. Korporativ müqavilə yazılı formada bağlanır və möhürlə (iştirakçı (səhmdar) hüquqi şəxs olduqda həmçinin onun möhürü ilə) təsdiqlənir. Korporativ müqavilənin notariat qaydasında təsdiqi tələb olunmur. Müqavilənin müddəaları yalnız onu imzalamış tərəflər üçün məcburi qüvvəyə malikdir və cəmiyyətin nizamnaməsinin müddəalarına zidd olduqda, müqaviləni imzalamış tərəflər arasındakı daxili münasibətlərdə korporativ müqavilənin müddəaları üstün hüquqi qüvvəyə malikdir (bir şərtlə ki, bu, normativ hüquqi aktlara zidd olmasın və üçüncü şəxslərin hüquqlarına xələl gətirməsin), cəmiyyət (tərəflərdən birinin təsərrüfat cəmiyyəti olduğu hallar istisna olmaqla) və üçüncü şəxslərlə münasibətlərdə isə nizamnamənin müddəaları tətbiq edilir.

65-1.4. Korporativ müqavilənin şərtlərinin pozulması müqavilənin digər tərəfləri üçün dəymiş zərərin ödənilməsinə və müqavilədə nəzərdə tutulmuş digər hüquqi nəticələrin yaranmasına səbəb olur.

65-1.5. Korporativ müqavilənin tərəfləri müqavilənin bağlanmasından sonra on beş gündən gec olmayaraq təsərrüfat cəmiyyətini bu barədə yazılı şəkildə məlumatlandırmağa borcludurlar.

65-1.6. Korporativ müqavilədə başqa hal nəzərdə tutulmayıbsa, müqavilə tərəflərindən birinin təsərrüfat cəmiyyətinin nizamnamə kapitalındakı paylarına (səhmlərinə) olan hüququna xitam verilməsi və ya müqavilədən çıxması müqavilənin digər tərəflər üçün qüvvədən düşməsinə səbəb olmur.

65-1.7. Korporativ müqavilə ilə ondan irəli gələn öhdəliklərin icrasının təmin edilməsi üsulları (dəbbə pulu, girov, zaminlik və s.) və belə öhdəliklərin icra edilməməsi və ya lazımınca icra edilməməsinə görə məsuliyyət müəyyən edilə bilər. Tərəflər həmçinin müqavilənin pozulmasına görə dəymiş zərərin ödənilməsini, cərimələrin tətbiqini və ya öhdəliyin naturada icrasını tələb etmək hüququnu nəzərdə tuta bilərlər.

65-1.8. Korporativ müqavilədə fərqli səs, dividend və ləğvetmə hüquqları verən aşağıdakı xüsusi hüquqlar müəyyən edilə bilər:

65-1.8.1. ləğvetmə və ya özgəninkiləşdirmə zamanı üstünlük: təsərrüfat cəmiyyəti ləğv edildikdə və ya nəzarət zərfinin və ya bütün aktivlərin satışı (özgəninkiləşdirilməsi) həyata keçirildikdə, səhmdar cəmiyyətində imtiyazlı səhmlərə, məhdud məsuliyyətli cəmiyyətdə isə nizamnamədə nəzərdə tutulmuş xüsusi hüquqlu paylara (səhmlərə) sahib olan təsisçilərin (iştirakçıların) öz qoyduqları vəsaiti (nizamnamədə və ya korporativ müqavilədə müəyyən edilmiş əmsalla) digər təsisçilərdən (iştirakçılardan) əvvəl geri almaq hüququ (səhmdar cəmiyyətlərində imtiyazlı səhmlərin hüquqi rejimi üzrə bu Məcəllənin 106.2-ci maddəsi ilə müəyyən edilmiş hallar nəzərə alınmaqla);

65-1.8.2. payın (səhmin) dəyərsizləşməsi əleyhinə müddəalar: təsərrüfat cəmiyyəti tərəfindən gələcəkdə pay (səhm) nominal dəyərindən aşağı olmamaqla, əvvəlki buraxılış (yerləşdirmə) qiymətindən daha aşağı yerləşdirmə qiyməti iləburaxıldıqda, müəyyən kateqoriya paylara (səhmlərə) sahib olan təsisçilərin (iştirakçıların) paylarının (səhmlərinin) dəyər itkisindən qorunması üçün konvertasiya qiymətinin və ya konvertasiya nisbətinin yenidən hesablanması mexanizmi;

65-1.8.3. xüsusi məsələlər: təsərrüfat cəmiyyətinin imtiyazlı səhmlərinə (paylarına) və (və ya) nizamnamə və ya korporativ müqavilə ilə nəzərdə tutulmuş xüsusi hüquqlu paylara (səhmlərə) sahib olan təsisçilərin (iştirakçıların) razılığı olmadan qəbul edilə bilməyəcək qərarların siyahısı və ya veto hüququ;

65-1.8.4. konvertasiya hüququ: imtiyazlı səhmləri (payları) istənilən zaman nizamnamədə müəyyən edilmiş şərtlərlə və nisbətdə adi səhmlərə (paylara) çevirmək;

65-1.8.5. təsərrüfat cəmiyyətinin fəaliyyətinə və digər təsisçilərin (iştirakçıların) hüquq və qanuni mənafelərinə əhəmiyyətli təsir göstərən qərarlar qəbul edildikdə, kiçik həcmdə paya (səhmə) malik olan təsisçilərin (iştirakçıların) hüquqlarının qorunması mexanizmləri, o cümlədən onlara öz paylarını (səhmlərini) ədalətli bazar qiymətinə satmaq və ya zəmanətli kompensasiya almaq hüququnun verilməsi;

65-1.8.6. ümumi yığıncaqda fərqli sayda səs vermək hüququnun müəyyən edilməsi, təsərrüfat cəmiyyətinin direktorlar şurasının (müşahidə şurasının) üzvlərinin seçilməsi və ya təyin edilməsi ilə bağlı xüsusi hüquqlar;

65-1.8.7. təsərrüfat cəmiyyəti tərəfindən yeni paylar (səhmlər) buraxıldıqda, müəyyən kateqoriya təsisçilərin (iştirakçıların) öz mülkiyyət paylarına (səhmlərinə) mütənasib şəkildə həmin payların (səhmlərin) əldə edilməsində üstünlük hüququnun bu Məcəllə ilə müəyyən edilmiş qaydada verilməsi.

65-1.9. Tərəflər, Azərbaycan Respublikasının rezidenti və ya qeyri-rezidenti olmalarından asılı olmayaraq, korporativ müqavilədə aralarında yaranacaq mübahisələrin həlli üzrə xarici dövlətin hüququnun tətbiq edilməsi barədə razılığa gələ bilərlər.

Maddə 65-2. Payın (səhmin) özgəninkiləşdirilməsi ilə bağlı xüsusi hüquqlar

65-2.1. Təsərrüfat cəmiyyətinin nizamnaməsi və ya iştirakçılar arasında bağlanmış korporativ müqavilə ilə payların (səhmlərin) özgəninkiləşdirilməsi ilə bağlı aşağıdakı xüsusi hüquqlar müəyyən edilə bilər:

65-2.1.1. birgə satış hüququ: təsərrüfat cəmiyyətinin nizamnamə kapitalında onun nizamnaməsi və ya korporativ müqavilə ilə müəyyən edilmiş həddən çox paya (səhmə) malik olan və öz paylarını (səhmlərini) üçüncü tərəfə satan təsisçi (iştirakçı) alış təklifi aldıqda, digər təsisçilərin (iştirakçıların) öz paylarını eyni şərtlərlə və eyni qiymətə həmin alıcıya satmaq hüququna dair şərt. Satıcı təsisçi (iştirakçı) bu barədə digər təsisçiləri (iştirakçıları) məlumatlandırmağa və onların da satışda iştirakını təmin etməyə borcludur;

65-2.1.2. məcburi satış hüququ: təsərrüfat cəmiyyətinin nizamnamə kapitalındanizamnamə və ya korporativ müqavilə ilə müəyyən edilmiş həddən çox paya (səhmə) malik olan təsisçi (iştirakçı) təsərrüfat cəmiyyətinin paylarının (səhmlərinin) hamısının və ya nəzarət zərfinin üçüncü şəxsə satışı (özgəninkiləşdirilməsi) barədəüçüncü şəxslə razılığa gəldikdə, digər təsisçiləri (iştirakçıları) öz paylarını (səhmlərini) eyni şərtlərlə və eyni qiymətə satmağa məcbur etmək hüququna dair şərt;

65-2.1.3. ilk imtina hüququ: açıq səhmdar cəmiyyətləri istisna olmaqla, digər təsərrüfat cəmiyyətlərinin hər hansı təsisçisi (iştirakçısı) öz payını (səhmini) üçüncü şəxsə satmaq niyyətində olduqda, həmin payı (səhmi) eyni şərtlərlə ilk növbədə təsərrüfat cəmiyyətinin nizamnaməsi və ya korporativ müqavilə ilə müəyyən edilmiş müəyyən kateqoriya təsisçisinə (iştirakçısına) təklif etməyə dair şərt.";

"88.3. Məhdud məsuliyyətli cəmiyyətin iştirakçılarının normativ hüquqi aktlarla müəyyən edilmiş qaydada aşağıdakı hüquqları vardır:

88.3.1. bu Məcəllə və cəmiyyətin təsis sənədləri ilə müəyyən edilmiş qaydada cəmiyyətin idarə edilməsində iştirak etmək, onun idarəetmə və icra orqanlarını seçmək və həmin orqanlara seçilmək;

88.3.2. normativ hüquqi aktlarda və cəmiyyətin təsis sənədlərində müəyyən edilmiş qaydada cəmiyyətin fəaliyyəti haqqında məlumat almaq, ildə bir dəfə onun illik hesabatı və maliyyə hesabatları ilə tanış olmaq;

88.3.3. mənfəətin bölüşdürülməsində iştirak etmək;

88.3.4. bu Məcəllə və cəmiyyətin nizamnaməsi ilə nəzərdə tutulmuş qaydada cəmiyyətin nizamnamə kapitalındakı payını və ya onun bir hissəsini bu cəmiyyətin bir və ya bir neçə iştirakçısına satmaq və ya başqa şəkildə güzəştə getmək;

88.3.5. bu Məcəllə və cəmiyyətin təsis sənədləri ilə nəzərdə tutulmuş qaydada digər iştirakçıların razılığından asılı olmayaraq istənilən vaxt cəmiyyətdən çıxmaq;

88.3.6. cəmiyyət ləğv edildiyi halda kreditorlarla hesablaşmalardan, hesablanmış, lakin ödənilməmiş dividendlər ödənildikdən sonra qalan əmlakın bir hissəsini və ya onun dəyərini almaq;

88.3.7. cəmiyyətin təsisçiləri (iştirakçıları) arasında onların hüquqlarının bu Məcəllə ilə müəyyən edilmiş qaydada həyata keçirilməsi barədə korporativ müqavilə bağlamaq;

88.3.8. cəmiyyətin ümumi yığıncağının çağırılmasını, ümumi yığıncağının gündəliyində dəyişikliklərin edilməsini və gündəliyə yeni müzakirə mövzularının əlavə olunmasını tələb etmək;

88.3.9. cəmiyyətin ümumi yığıncağında səsvermə hüququ ilə iştirak etmək (bu Məcəllənin 49-1.2-ci və 49-1.3-cü maddələrində nəzərdə tutulmuş hallar istisna olmaqla) və onun protokolunun surətini tələb etmək;

88.3.10. cəmiyyətin fəaliyyətinin təftiş komissiyası və ya auditor tərəfindən yoxlanılmasını tələb etmək;

88.3.11. cəmiyyətin xalis mənfəətindən dividend almaq;

88.3.12. icra orqanının və direktorlar şurasının (müşahidə şurasının) üzvlərinin səhlənkarlığına və cəmiyyətə qəsdən vurduğu zərərə görə məsuliyyətə cəlb edilməsini tələb etmək;

88.3.13. cəmiyyətin paylarının satışı prosesində iştirak etmək;

88.3.14. bağlanmış əqd nəticəsində cəmiyyətə və ya səhmdarlara dəyən zərərin və bununla bağlı məsrəflərin ödənilməsi barədə məhkəməyə və ya digər səlahiyyətli quruma müraciət etmək;

88.3.15. bağlanacaq əqdlərin (o cümlədən aidiyyəti şəxslərlə əqdlərin və xüsusi əhəmiyyətli əqdlərin) əlavələri ilə tanış olmaq;

88.3.16. bu Məcəllədə və cəmiyyətin nizamnaməsində nəzərdə tutulmuş digər hüquqlara malik olmaq.";

2.2. 90-cı maddə üzrə:

2.2.1. 90.2-ci maddənin birinci və ikinci cümlələrinə "Məhdud məsuliyyətli cəmiyyətin" sözlərindən sonra "(məhdud məsuliyyətli cəmiyyət formasında yaradılan vençur kapitalı fondu istisna olmaqla)" sözləri əlavə edilsin;

2.2.2. aşağıdakı məzmunda 90.3-2-ci maddə əlavə edilsin:

"90.3-2. Məhdud məsuliyyətli cəmiyyətin iştirakçılarına, idarəetmə orqanlarının üzvlərinə və ya işçilərinə həvəsləndirmə məqsədilə paylar bu Məcəllənin 404-5-ci maddəsinə uyğun olaraq bağlanmış işçilərin pay iştirakı planı haqqında müqavilə əsasında ödənişsiz verildikdə, bu Məcəllənin 90.3-cü maddəsi tətbiq edilmir.";

2.3. 90-1.2-ci maddəyə "Məhdud məsuliyyətli cəmiyyətin" sözlərindən sonra "(məhdud məsuliyyətli cəmiyyət formasında yaradılan vençur kapitalı fondu istisna olmaqla)" sözləri əlavə edilsin;

2.4. 95-ci maddə üzrə:

2.4.1. mətni 95.1-ci maddə hesab edilsin və həmin maddəyə "Məhdud məsuliyyətli cəmiyyətin" sözlərindən sonra "(məhdud məsuliyyətli cəmiyyət formasında yaradılan vençur kapitalı fondu istisna olmaqla)" sözləri əlavə edilsin;

2.4.2. aşağıdakı məzmunda 95.2-ci maddə əlavə edilsin:

"95.2. "İnvestisiya fondları haqqında" Azərbaycan Respublikasının Qanunu ilə müəyyən edilmiş hallarda, iştirakçının cəmiyyətdən çıxmaq hüququnun həyata keçirilməsi müddəti, hesablaşma vaxtı, şərtləri və qaydası cəmiyyətin nizamnaməsi ilə müəyyən edilə və məhdudlaşdırıla bilər.";

2.5. aşağıdakı məzmunda 103.4-2-ci maddə əlavə edilsin:

"103.4-2. Səhmdar cəmiyyətinin iştirakçılarına, idarəetmə orqanlarının üzvlərinə və ya işçilərinə həvəsləndirmə məqsədilə səhmlər bu Məcəllənin 404-5-ci maddəsinə uyğun olaraq bağlanmış işçilərin səhm iştirakı planı haqqında müqavilə əsasında ödənişsiz verildikdə, bu Məcəllənin 103.4-cü maddəsi tətbiq edilmir.";

2.6. 106-1.3.9-cu maddənin sonunda nöqtə işarəsi nöqtəli vergül işarəsi ilə əvəz edilsin və aşağıdakı məzmunda 106-1.3.10-cu maddə əlavə edilsin:

"106-1.3.10. cəmiyyətin səhmdarları arasında onların hüquqlarının bu Məcəllə ilə müəyyən edilmiş qaydada həyata keçirilməsi barədə korporativ müqavilə bağlamaq.";

2.7. 107-3.5-ci maddə aşağıdakı redaksiyada verilsin:

"107-3.5. Bu Məcəllənin 65-1.8.6-cı maddəsində nəzərdə tutulmuş hallar istisna olmaqla, səhmdarların ümumi yığıncağında səsvermə "bir səsli səhm - bir səsdir" prinsipi əsasında həyata keçirilir.";

2.8. aşağıdakı məzmunda 404-2 - 404-5-ci maddələr əlavə edilsin:

"Maddə 404-2. Konvertasiya edilən maliyyə alətləri

404-2.1. Təsərrüfat cəmiyyəti gələcəkdə əvvəlcədən müəyyən edilmiş hallar baş verdikdə, cəlb edilən vəsaitin cəmiyyətin payına (səhmlərinə) çevrilməsini (konvertasiyasını) nəzərdə tutan maliyyə alətlərindən istifadə edə bilər.

404-2.2. Konvertasiya edilən maliyyə alətləri borc öhdəliyi (konvertasiya edilən borc müqaviləsi) və ya borc öhdəliyi yaratmayan müqavilə (gələcək iştirak payı (səhm) haqqında müqavilələr) formasında ola bilər.

404-2.3. Konvertasiya edilən maliyyə alətlərinin tətbiqi nəzərdə tutulduğu hallarda, konvertasiya edilən maliyyə alətlərinin buraxılması və konvertasiyası qaydaları cəmiyyətin nizamnaməsi və ya cəmiyyətin iştirakçılarının ümumi yığıncağının qərarı ilə müəyyən edilə bilər.

404-2.4. Konvertasiya edilən maliyyə alətləri üzrə vəsait cəlb edən cəmiyyət, investorun tələbi ilə ona öz fəaliyyəti, maliyyə vəziyyəti və cəlb edilmiş vəsaitlərin istifadəsi haqqında mütəmadi olaraq, dövriliyi cəmiyyətin nizamnaməsi və ya korporativ müqavilə ilə müəyyən edilən qaydada hesabat təqdim edir.

404-2.5. Bu Məcəllənin 404-3-cü və 404-4-cü maddələrində nəzərdə tutulan alətlər (müqavilələr) və onlarda təsbit edilən hüquqlar konvertasiya edilənədək qiymətli kağız və ya törəmə maliyyə aləti hesab olunmur, onların bağlanması qiymətli kağızların emissiyası (kütləvi təklifi) sayılmır.

404-2.6. Cəmiyyət tərəfindən bağlanmış konvertasiya edilən maliyyə alətlərinin daxili reyestri aparılmalıdır. Konvertasiya baş verdikdə nizamnamə kapitalının artırılması və payların (səhmlərin) bölüşdürülməsi qanunvericiliklə müəyyən edilmiş ümumi qaydada dövlət qeydiyyatına alınır.

Maddə 404-3. Konvertasiya edilən borc müqaviləsi

404-3.1. Konvertasiya edilən borc müqaviləsi investordan cəmiyyətə borc qismində pul vəsaitinin verilməsini və müqavilədə göstərilən qaytarılma müddəti çatdıqda, yaxud cəmiyyət tərəfindən yeni investorlardan əlavə vəsaitin cəlb edildiyi maliyyələşmə mərhələsi (kvalifikasiyalı maliyyələşmə) baş verdikdə, həmin borcun (əsas məbləğ və faizlərin) qaytarılmaq əvəzinə tərəflərin razılaşdırdığı şərtlərlə cəmiyyətin paylarına (səhmlərinə) çevrilməsini nəzərdə tutan müqavilədir. Konvertasiya edilən borc müqaviləsi yazılı formada bağlanır və möhürlə (investor hüquqi şəxs olduqda həmçinin onun möhürü ilə) təsdiqlənir və onun notariat qaydasında təsdiqi tələb olunmur.

404-3.2. Borcun paya (səhmə) konvertasiyası zamanı ilkin investorun risklərini kompensasiya etmək üçün müqavilədə aşağıdakı qoruyucu mexanizmlərdən azı biri müəyyən edilməlidir:

404-3.2.1. qiymətləndirmənin yuxarı həddi - konvertasiya anında investorun əldə edəcəyi payın həcminin hesablanması üçün tətbiq edilən, cəmiyyətin dəyərinin müqavilə ilə əvvəlcədən razılaşdırılmış maksimal miqdarı;

404-3.2.2. endirim dərəcəsi - kvalifikasiyalı maliyyələşmə mərhələsində cəmiyyətə daxil olan yeni investorların bir pay (səhm) üçün ödədikləri qiymətə ilkin borcverən üçün tətbiq edilən güzəşt faizi.

404-3.3. Müqavilənin müddəti bitdikdə və paya çevrilməni şərtləndirən hadisə baş vermədikdə, investor öz seçimi ilə borcun (faizlərlə birlikdə) pul şəklində geri qaytarılmasını və ya borcun müqavilədə əvvəlcədən razılaşdırılmış qiymətləndirmə əsasında cəmiyyətin payına (səhmlərinə) çevrilməsini tələb edə bilər.

Maddə 404-4. Gələcək iştirak payı (səhm) haqqında müqavilə

404-4.1. Gələcək iştirak payı (səhm) haqqında müqavilə investorun cəmiyyətə pul vəsaiti ödəməsini, bunun müqabilində cəmiyyətin hər hansı borc öhdəliyi, faiz və ya ödəmə müddəti yaratmadan investora həmin vəsait müqabilində gələcəkdə cəmiyyətin paylarını (səhmlərini) almaq hüququ verməsini nəzərdə tutan müqavilədir. Gələcək iştirak payı (səhm) haqqında müqavilə yazılı formada bağlanır və möhürlə (investor hüquqi şəxs olduqda həmçinin onun möhürü ilə) təsdiqlənir və onun notariat qaydasında təsdiqi tələb olunmur.

404-4.2. Gələcək iştirak payı (səhm) haqqında müqavilə üzrə investorun vəsaitinin paya (səhmə) konvertasiyası cəmiyyətin nizamnamə kapitalını artıraraq yeni investorlara pay (səhm) satdığı yeni maliyyələşmə mərhələsi (kvalifikasiyalı maliyyələşmə) baş verdikdə və ya cəmiyyətin nəzarət zərfinin və ya bütün aktivlərinin satılması, cəmiyyətin başqa hüquqi şəxsə qoşulması, ləğvi kimi likvidlik hadisəsi baş verdikdə həyata keçirilir.

404-4.3. Gələcək iştirak payı (səhm) haqqında müqavilə üzrə paya (səhmə) çevrilmə zamanı investorun payının həcminin hesablanması tərəflərin razılaşdırdığı qiymətləndirmənin yuxarı həddi və (və ya) endirim dərəcəsi əsasında bu Məcəllənin 404-3.2-ci maddəsinə uyğun olaraq hesablanır. İnvestor bu iki şərtdən onun üçün daha sərfəli olanını seçmək hüququna malikdir.

404-4.4. Likvidlik hadisəsi (cəmiyyətin ləğvi və ya satışı) konvertasiyadan əvvəl baş verdikdə, bu müqavilə üzrə vəsaiti ödəmiş investorun ödəniş (investisiyanın geri qaytarılması) tələbləri cəmiyyətin digər təminatsız kreditorlarının tələblərindən sonra, lakin cəmiyyətin təsisçilərinə (iştirakçılarına, səhmdarlarına) qalıq əmlakın bölüşdürülməsindən əvvəl yerinə yetirilir.

Maddə 404-5. İşçilərin pay (səhm) iştirakı planı haqqında müqavilə

404-5.1. Təsərrüfat cəmiyyəti işçilərini və idarəetmə orqanının üzvlərini həvəsləndirmək məqsədilə, onlara cəmiyyətin paylarını (səhmlərini) gələcəkdə müəyyən edilmiş qiymətə (icra qiyməti) və ya ödənişsiz əsaslarla əldə etmək (almaq) hüququ verən pay (səhm) iştirakı planı haqqında müqavilələr bağlaya bilər. Müqavilə yazılı formada bağlanır və cəmiyyətin möhürü ilə təsdiqlənir və onun notariat qaydasında təsdiqi tələb olunmur.

404-5.2. Planın tərtibi tarixi, hüququn qüvvəyə minməsi şərtləri, icra qiyməti (payların (səhmlərin) güzəştli ödənişli əsaslarla əldə edilməsi nəzərdə tutulduğu hallarda) və müddəti müqavilədə aydın şəkildə göstərilməlidir. Cəmiyyət tərəfindən bağlanmış işçilərin pay (səhm) iştirakı planı müqavilələrinin daxili reyestri aparılmalıdır.

404-5.3. Bu müqavilələrin icrası üçün cəmiyyət nizamnamə kapitalının tərkibində səlahiyyət verilmiş (lakin buraxılmamış) xüsusi pay (səhm) fondu yarada bilər.".

Maddə 3. "Valyuta tənzimi haqqında" Azərbaycan Respublikası Qanununun (Azərbaycan Respublikası Ali Sovetinin Məlumatı, 1995, № 7, maddə 116; Azərbaycan Respublikasının Qanunvericilik Toplusu (Cild I); 2024, № 2, maddə 138, № 3, maddə 250; 2025, № 2, maddə 100, № 5, maddə 432) 11-ci maddəsində aşağıdakı dəyişikliklər edilsin:

3.1. birinci və ikinci hissələrə "Qeyri-rezidentlər" sözlərindən sonra ", o cümlədən rəqəmsal səyyahlar" sözləri əlavə edilsin;

3.2. aşağıdakı məzmunda 9-cu hissə əlavə edilisin:

"9. Vençur kapitalı fondları və akkreditə olunmuş investorlar tərəfindən Azərbaycan Respublikasından kənarda fəaliyyət göstərən innovativ layihələrdə (startaplarda) gələcək iştirak payının əldə edilməsi (gələcək iştirak payı (səhm) haqqında müqavilə, konvertasiya olunan borc və analoji maliyyə alətləri) məqsədilə investisiyaların qoyulması üzrə köçürmələr Mərkəzi Bankın müəyyən etdiyi qaydada və həddə həyata keçirilir.".

Maddə 4. "İnvestisiya fondları haqqında" Azərbaycan Respublikasının Qanununda (Azərbaycan Respublikasının Qanunvericilik Toplusu, 2010, № 11, maddə 950 (Cild I); 2025, № 4 (I kitab), maddələr 315, 318, № 5, maddə 432) aşağıdakı dəyişikliklər edilsin

4.1.  1.1-ci maddə üzrə:

4.1.1. aşağıdakı məzmunda 1.1.7-1 - 1.1.7-8-ci maddələr əlavə edilsin:

"1.1.7-1. vençur kapitalı fondu - fəaliyyətinin müstəsna predmeti investorların mənfəət əldə etməsi məqsədilə yalnız peşəkar investorlardan cəlb edilmiş pul vəsaitlərinin investisiya bəyannaməsinə uyğun olaraq investisiya edilməsi olan və aşağıdakı meyarlara cavab verən, habelə bu Qanunla nəzərdə tutulmuş təşkilati-hüquqi formalarda yaradılan investisiya fondudur:

1.1.7-1.1. əsas fəaliyyətinin investisiya qoyuluşundan ibarət olması və bu Qanunda nəzərdə tutulan hallar istisna olmaqla digər kommersiya fəaliyyəti həyata keçirməməsi;

1.1.7-1.2. fondun investorları üçün ortaq gəlir əldə etmək məqsədilə cəlb edilmiş kapitalı birləşdirməsi;

1.1.7-1.3. maliyyə və əməliyyat fəaliyyəti istiqamətlərinin müəyyən edilməsində, investisiya qərarların qəbulunda bütün təsisçilərin (iştirakçıların) birgə şəkildə davamlı iştirakının olmaması;

1.1.7-2. peşəkar investor - "Qiymətli kağızlar bazarı haqqında" Azərbaycan Respublikası Qanununun 1.0.7-ci maddəsi ilə müəyyən edilmiş institusional investorlar, iqtisadiyyatın, o cümlədən sahibkarlığın inkişafının maliyyələşdirilməsi və innovasiya fəaliyyətinin həyata keçirilməsi məqsədilə fəaliyyət göstərən dövlət adından yaradılan publik hüquqi şəxslər və ya paylarının (səhmlərinin) nəzarət zərfi dövlətə məxsus olan hüquqi şəxslər və ya bu Qanunun 1.1.7-3-cü maddəsində müəyyən edilmiş tələblərə cavab verən  akkreditə olunmuş investorlardır;

1.1.7-3. akkreditə olunmuş investor - bu Qanunun 9-1.3-cü maddəsində göstərilən fəaliyyətə vençur kapitalı fondu vasitəsilə investisiya edən, investisiya ilə bağlı riskləri dərk etmək üçün maliyyə təcrübəsinə və ya potensial itkiləri qarşılamaq üçün maliyyə imkanlarına malik olan və aşağıdakı meyarlardan azı birinə cavab verən fiziki və ya hüquqi şəxsdir:

1.1.7-3.1. son 2 ilin hər birində illik gəliri 150.000 (yüz əlli min) manatdan çox olan və cari ildə də eyni gəlir səviyyəsini əldə edəcəyini əsaslı şəkildə gözləyən fiziki şəxslər;

1.1.7-3.2. əsas yaşayış yeri olan daşınmaz əmlakının dəyəri istisna olmaqla, xalis maliyyə aktivlərinin dəyəri 500.000 (beş yüz min) manatdan çox olan fiziki şəxslər;

1.1.7-3.3. siyahısı Mərkəzi Bank tərəfindən müəyyən edilmiş sertifikatlara malik olan şəxslər;

1.1.7-3.4. xalis aktivlərinin dəyəri 5.000.000 (beş milyon) manatdan çox olan və ya bütün iştirakçıları bu Qanunun 1.1.7-3.1 - 1.1.7-3.3-cü maddələri ilə müəyyən edilmiş meyarlardan birinə cavab verən hüquqi şəxslər;

1.1.7-3.5. bütün iştirakçıları akkreditə olunmuş investorlardan ibarət olan hüquqi şəxslər;

1.1.7-3.6. vençur kapitalı fondunun idarəçisi (hüquqi şəxs olduqda isə onun rəhbər şəxsləri) və investisiya qərarlarının qəbulunda bilavasitə iştirak edən şəxslər;

1.1.7-4. azad hesabatlı vençur kapitalı fondu - bu Qanunun 9-2-ci maddəsində müəyyən edilmiş meyarlara cavab verən, fəaliyyəti üçün lisenziya tələb olunmayan və Mərkəzi Bank tərəfindən aparılan reyestrdə qeydə alınan vençur kapitalı fondudur;

1.1.7-5. lisenziyalaşdırılan vençur kapitalı fondu- bu Qanunun 9-3-cü maddəsinə uyğun olaraq Mərkəzi Bank lisenziyası əsasında fəaliyyət göstərən  vençur kapitalı fondudur;

1.1.7-6. idarə edilən aktivlərin həcmi - vençur kapitalı fondunun idarə etdiyi bütün aktivlərinin, o cümlədən cəlb edilmiş, lakin hələ investisiya edilməmişkapitalın və investorların ödənilməmiş kapital öhdəliklərinin bu Qanunun 9-1.7-ci maddəsinə əsasənhesablanan ümumi dəyəridir;

1.1.7-7. ödənilməmiş kapital öhdəliyi - vençur kapitalı fondunun təsis sənədlərinə (müqaviləsinə) əsasən fondun çağırışı əsasında investorun gələcəkdə fonda ödəməyi öhdəsinə götürdüyü, lakin hələ ödənilməmiş vəsaitin məbləğidir;

1.1.7-8.investorlardan pul vəsaitlərinin cəlb edilməsi - fond (və ya onun adından çıxış edən şəxs) tərəfindən kənar investorlardan (onların fondun təsisçisi qismində çıxış edib-etməməsindən asılı olmayaraq) investisiya məqsədilə fonda vəsaitin köçürülməsini (və ya bu barədə öhdəliyin götürülməsini) təmin etmək üçün həyata keçirilən fəaliyyətdir;";

4.1.2. 1.1.10-cu maddədə "şəxsdir" sözü "şəxs və ya investisiya şirkətləridir" sözləri ilə əvəz edilsin;

4.1.3. 1.1.17-ci maddəyə "müşahidə şurası" sözlərindən sonra "(olduqda)" sözü əlavə edilsin, "üzvlükdür" sözü "üzvlük və ya kommandit ortaqlığı formasında yaradılan vençur kapitalı fondunda işləri aparan tam ortaqdır (ortaqlardır)" sözləri ilə əvəz edilsin;

4.1.4. aşağıdakı məzmunda 1.2-ci maddə əlavə edilsin:

"1.2. Bu Qanunda xüsusi olaraq fərqləndirilmədikdə, bu Qanunun investisiya fondlarına, o cümlədən səhmdar investisiya fondlarına, qapalı paylı investisiya fondlarına, onların idarəçilərinə, depozitarlarına və investorlarına dair müddəaları (bu Qanunun 42-ci və 43-cü maddələri istisna olmaqla) vençur kapitalı fondlarına, onların idarəçilərinə, depozitarlarına və peşəkar investorlarına da şamil edilir. Bu Qanunun lisenziyalaşdırmaya, habelə prudensial tənzimləməyə və nəzarətə dair müddəaları yalnız lisenziyalaşdırılan vençur kapitalı fondlarına şamil edilir. Azad hesabatlı vençur kapitalı fondlarının fəaliyyəti bu Qanunun II-I fəslində nəzərdə tutulmuş rejimə əsasən tənzimlənir.";

4.2. 3-cü maddə üzrə:

4.2.1. aşağıdakı məzmunda 3.2-1-ci maddə əlavə edilsin:

"3.2-1. Vençur kapitalı fondunun adında "vençur kapitalı fondu" sözləri olmalıdır. Hüquqi şəxs statusu almaq istəyən azad hesabatlı vençur kapitalı fondunun dövlət qeydiyyatına alınması və ya mövcud hüquqi şəxsin nizamnaməsində (adında) dəyişiklik edilməsi zamanı bu sözlərdən istifadə edilməsi üçün Mərkəzi Bankın ilkin razılığı alınmalıdır. İlkin razılığın alınması qaydası Mərkəzi Bankın qəbul etdiyi normativ xarakterli aktlarla müəyyən edilir.";

4.2.2. 3.3-cü maddəyə "İnvestisiya fondu" sözlərindən sonra "və ya "Vençur kapitalı fondu" sözləri, "fondları" sözündən sonra "(vençur kapitalı fondları)" sözləri əlavə edilsin və həmin maddədə "qanunvericiliyinə müvafiq" sözləri "normativ hüquqi aktlarına uyğun" sözləri ilə əvəz edilsin;

4.3. aşağıdakı məzmunda II-I fəsil əlavə edilsin:

"II-I fəsil

Vençur kapitalı fondunun fəaliyyət rejimləri və fəaliyyətinin tənzimlənməsi

Maddə 9-1. Vençur kapitalı fonduna dair ümumi müddəalar

9-1.1. Vençur kapitalı fondunun nizamnaməsində və ya onun təsis sənədlərində fondun fəaliyyətinin müstəsna predmetinin cəlb edilən vəsaitlərinin 70 faizindən az olmayan hissəsinin bu Qanunun 9-1.3-cü maddəsində göstərilən məqsədlərə yatırılmasından ibarət olduğu göstərilməlidir. Qalan vəsait likvidliyin idarə edilməsi məqsədilə digər maliyyə alətlərinə yatırıla bilər.

9-1.2. Vençur kapitalı fondları bu Qanunun II-I fəslinə uyğun olaraq azad hesabatlı vençur kapitalı fondu və ya lisenziyalaşdırılan vençur kapitalı fondu rejimində fəaliyyət göstərirlər. Vençur kapitalı fondu məhdud məsuliyyətli cəmiyyət, qapalı səhmdar cəmiyyəti, kommandit ortaqlığı və ya qapalı paylı investisiya fondu formasında yaradıla bilər. Vençur kapitalı fondu sahibkarlıq fəaliyyətinin digər növləri ilə məşğul ola bilməz.

9-1.3. Vençur kapitalı fondu investorlardan cəlb olunmuş pul vəsaitlərinin yalnız rəqəmsal texnologiyaların və innovasiya məhsulunun (iqtisadi və ya sosial səmərə əldə etmək məqsədilə yeni yaradılmış və ya təkmilləşdirilmiş məhsul (iş, xidmət), texnoloji proses, həmçinin ictimai münasibətlərin müxtəlif sahələrində (təşkilati-texniki, maliyyə-iqtisadi və digər sahələrdə) tətbiq edilən inzibati, kommersiya, texnoloji və digər xarakterli yeniliklər) hazırlanması, istehsalı və təkmilləşdirilməsini həyata keçirən, mikro, kiçik və orta sahibkarlıq subyekti olan, habelə Azərbaycan Respublikasında "Startap" şəhadətnaməsini və ya texnologiyalar parkının və texnoloji biznes inkubatorunun və ya sənaye və azad iqtisadi zonaların qeydiyyat şəhadətnaməsini alan sahibkarların innovativ layihələrinə bu Qanunla müəyyən edilmiş qaydada  yatırılması ilə məşğul olur.

9-1.4. Vençur kapitalı fondunun borc götürməsinə dair məhdudiyyətlər fondun rejimindən asılı olaraq aşağıdakı kimi müəyyən edilir:

9-1.4.1. azad hesabatlı vençur kapitalı fondu yalnız qısamüddətli likvidlik ehtiyaclarını (investisiyaların maliyyələşdirilməsi və ya əməliyyat xərclərinin ödənilməsi) ödəmək məqsədilə borc götürə bilər. Ümumi borc öhdəlikləri fondun ümumi kapital öhdəliklərinin (cəlb edilmiş və ödənilməmiş kapital öhdəliklərinin cəmi) 30 faizindən çox, hər borcun müddəti isə 12 aydan artıq ola bilməz;

9-1.4.2. lisenziyalaşdırılan vençur kapitalı fondu aktivlərinin 10 faizini keçməyən məbləğdə və üç aydan artıq olmayan müddətə borc götürə bilər.

9-1.5. Lisenziyalaşdırılan vençur kapitalı fondunun nizamnamə (şərikli) kapitalının minimum miqdarı və nizamnamə (şərikli) kapitalının formalaşdırması qaydaları Mərkəzi Bank tərəfindən müəyyən edilir.

9-1.6. Vençur kapitalı fondunun pay mülkiyyətçilərinin (səhmdarlarının) reyestri mərkəzi depozitar tərəfindən aparılır.

9-1.7. Vençur kapitalı fondu ildə azı bir dəfə idarə edilən aktivlərin həcmini hesablamalıdır. İdarə edilən aktivlərin həcminin hesablanması qaydası Mərkəzi Bank tərəfindən müəyyən edilir.

9-1.8. Vençur kapitalı fondu öz investisiyalarını Azərbaycan Respublikasında, həmçinin "Valyuta tənzimi haqqında" Azərbaycan Respublikası Qanunun tələbləri nəzərə alınmaqla Azərbaycan Respublikasından kənarda həyata keçirə bilər.

9-1.9. Vençur kapitalı fondu tərəfindən hüquqi şəxs təsis edildikdə, 5 iş günü müddətində Mərkəzi Banka məlumat verir.

9-1.10. Vençur kapitalı fondunun fəaliyyət müddətinin uzadılması, idarəçisinin dəyişdirilməsi, habelə idarəçi tərəfindən əvvəlki fondun fəaliyyət müddəti bitdikdən və ya kapitalının (fondun təsis sənədlərində və ya idarə edilməsi qaydalarında müəyyən edilmiş hissəsinin) investisiya edilməsindən sonra yeni varis vençur kapitalı fondunun təsis edilməsi məhdudiyyətləri bu Qanunun tələbləri nəzərə alınmaqla fondun nizamnaməsi, paylı investisiya fondunun idarə edilməsi qaydaları və (və ya) investisiya bəyannaməsi ilə müəyyən edilir. Vençur kapitalı fondunun fəaliyyət müddətinin uzadılması və idarəçinin dəyişdirilməsi investorların (səhmdarların, pay mülkiyyətçilərinin, iştirakçıların) razılığı əsasında həyata keçirilir. Bu maddədə göstərilən hallar baş verdikdə bu barədə 5 (beş) iş günü müddətində Mərkəzi Banka yazılı məlumat verilməlidir.

9-1.11. Yeni varis vençur kapitalı fondu bu Qanunla müəyyən edilmiş qaydada Mərkəzi Bank tərəfindən reyestrdə qeydə alınmalı və ya lisenziya almalıdır.

Maddə 9-2. Azad hesabatlı vençur kapitalı fondu rejimi və meyarları

9-2.1. Azad hesabatlı vençur kapitalı fondu aşağıdakı meyarların hamısına cavab verdikdə azad hesabatlı vençur kapitalı fondu rejimində fəaliyyət göstərə bilər:

9-2.1.1. bu Qanunun 9-1.7-ci maddəsi nəzərə alınmaqla, idarə etdiyi aktivlərin həcmi 50 (əlli) milyon manat ekvivalentini keçmirsə;

9-2.1.2. investorlarının ümumi sayı əllidən çox deyilsə (fondun təşkilati-hüquqi forması üçün normativ hüquqi aktlarda daha az say müəyyən edildiyi hallar istisna olmaqla).

9-2.2. Azad hesabatlı vençur kapitalı fondunun fəaliyyəti lisenziyalaşdırılmır. Azad hesabatlı vençur kapitalı fondu fəaliyyətə başlamazdan əvvəl Mərkəzi Bank tərəfindən bu Qanunun 9-6-cı maddəsində müəyyən edilmiş qaydada reyestrdə qeydə alınmalıdır.

9-2.3. Azad hesabatlı vençur kapitalı fondu Mərkəzi Banka illik əsasda bu Qanunun 9-7-ci maddəsində müəyyən edilmiş məzmunda hesabat təqdim etməlidir.

Maddə 9-3. Lisenziyalaşdırılan vençur kapitalı fondu rejimi və meyarları

9-3.1. Bu Qanunun 9-2.1-ci maddəsində nəzərdə tutulan meyarlara cavab verməyən vençur kapitalı fondu yalnız lisenziyalaşdırılan vençur kapitalı fondu rejimində fəaliyyət göstərə bilər. Vençur kapitalı fondu həmçinin könüllü olaraq lisenziyalaşdırılan vençur kapitalı fondu rejimində fəaliyyət göstərmək barədə qərar qəbul edə bilər.

9-3.2. Lisenziyalaşdırılan vençur kapitalı fondu bu Qanunun VIII fəslinə uyğun olaraq Mərkəzi Bankdan lisenziya almalıdır.

Maddə 9-4. Vençur kapitalı fondunun fəaliyyət rejiminin dəyişdirilməsi

9-4.1. Azad hesabatlı vençur kapitalı fondu bu Qanunun 9-1.7-ci maddəsində qeyd edilən hesablamanı həyata keçirərkən bu Qanunun 9-2.1-ci maddəsində  nəzərdə tutulan meyarlara uyğun olmadığı təqdirdə, bu barədə 10 iş günü ərzində Mərkəzi Banka və investorlarına məlumat verməli və bu halın baş verdiyi tarixdən etibarən 90  təqvim günü (keçid dövrü) ərzində lisenziyalaşdırılan vençur kapitalı fondu lisenziyası almaq üçün Mərkəzi Banka müraciət etməlidir.

9-4.2. Keçid dövründə fond yeni investor cəlb edə bilməz, lakin mövcud investisiya fəaliyyətini, o cümlədən mövcud investorlardan ödənilməmiş kapital öhdəliklərini tələb etməyi və mövcud portfel şirkətlərinə əlavə investisiyalar etməyi davam etdirə bilər.

9-4.3. Mərkəzi Bank əsaslandırılmış müraciət əsasında keçid dövrünü əlavə 90 təqvim günədək uzada bilər.

9-4.4. Bu Qanunun 9-4.1-ci maddəsində göstərilən müddət ərzində lisenziya üçün müraciət edilmədikdə və ya ona lisenziya verilməsindən bu Qanunla nəzərdə tutulmuş hallarda imtina edildikdə vençur kapitalı fondu fəaliyyətini dayandırmalı, Mərkəzi Bank isə azad hesabatlı vençur kapitalı fondunu reyestrdən çıxarılma barədə qərar qəbul etməli və bu barədə məlumatı reyestrdən qeydi çıxarılmış azad hesabatlı vençur kapitalı fonduna və ya onun idarəçisinə, onun depozitarına və vergi orqanlarına dərhal göndərməli və mediada dərc etdirməlidir.

9-4.5. Reyestrdə müvafiq qeydi ləğv edilmiş azad hesabatlı vençur kapitalı fondunun təsisçiləri (iştirakçıları, səhmdarları, tam ortaqları) Mərkəzi Bankın qərarının qəbul edildiyi tarixdən 30 (otuz) təqvim günü müddətində Azərbaycan Respublikası Mülki Məcəlləsinin 59.2.1-ci maddəsinə uyğun olaraq fondun ləğv edilməsi və ya adından "vençur kapitalı fondu" sözləri çıxarılmaqla fəaliyyət predmetinin dəyişdirilməsi barədə qərar qəbul etməlidirlər. Bu müddət ərzində müvafiq qərar qəbul edilmədikdə, müvafiq icra hakimiyyəti orqanının müəyyən etdiyi orqan (qurum) həmin hüquqi şəxsin məhkəmə qaydasında məcburi ləğv edilməsi tələbi ilə iddia qaldırır.

Maddə 9-5. Vençur kapitalı fondunun idarəçilərinə dair tələblər

9-5.1. Vençur kapitalı fondu daxili idarəetmə formasında (fondun  icra orqanı və ya tam ortaq tərəfindən) və ya kənar idarəçi cəlb etməklə idarə oluna bilər.

9-5.2. Lisenziyalaşdırılan vençur kapitalı fondunun idarə edilməsi kənar idarəçi tərəfindən həyata keçirildikdə , həmin kənar idarəçi bu Qanunun IV və VIII fəsillərinə uyğun olaraq investisiya fondlarının idarə edilməsi üzrə lisenziyaya malik olan şəxs olmalıdır.

9-5.3. İdarəçi vençur kapitalı fondunun nizamnamə (şərikli) kapitalının və ya investorların cəlb edilmiş kapital öhdəliklərinin azı 1 - 5 faizinə bərabər məbləğdə öz vəsaiti ilə fondda iştirak etməlidir.

9-5.4. Azad hesabatlı vençur kapitalı fondunun idarə edilməsi üçün bu Qanunla   nəzərdə tutulmuş investisiya fondlarının idarə edilməsi üzrə lisenziya tələb olunmur. Aşağıdakı tələblərə cavab verən idarəçi (fondun icra orqanı və ya tam ortaq istisna olmaqla) fondun reyestrə qeydə alınması zamanı Mərkəzi Bank tərəfindən aparılan reyestrdə qeydə alınmalıdır:

9-5.4.1. idarəçinin nizamnamə kapitalı azı 50.000 manat olmalı və ya 3 aylıq əməliyyat xərclərini qarşılamaq üçün kifayət edən likvid aktivlərə malik olmalıdır (hansı daha yüksəkdirsə);

9-5.4.2. idarəçinin rəhbər şəxsləri (və ya tam ortaqlar) bu Qanunun 40-cı maddəsində nəzərdə tutulan məqbul və lazımi keyfiyyətlərə malik olmalıdırlar.

9-5.5. Bu Qanunun 9-5.4-cü maddəsinə əsasən idarəetməni həyata keçirən şəxsin reyestrdə qeydə alınması bu Qanunun 9-6.3 - 9-6.11-ci maddələrində qeyd edilmiş qaydada aparılır.

9-5.6. Azad hesabatlı vençur kapitalı fondunun idarəçisi eyni zamanda ondan artıq vençur kapitalı fondunu idarə edə bilməz.

Maddə 9-6. Azad hesabatlı vençur kapitalı fondunun reyestri

9-6.1. Bu Qanunun 3.2-1-ci maddəsinin tələbləri nəzərə alınmaqla, azad hesabatlı vençur kapitalı fondu (və ya onun idarəçisi) tərəfindən fəaliyyətə başlamazdan əvvəl Mərkəzi Bankda reyestrdə qeydə alınmaq üçün ərizə və aşağıdakı sənədlər (məlumatlar) təqdim edilməlidir:

9-6.1.1. fondun və idarəçinin (kənar idarəçi olduqda) təsis sənədlərinin surətləri;

9-6.1.2. fondun investisiya bəyannaməsi və ya əsas investisiya şərtlərini əks etdirən sənəd;

9-6.1.3. idarəçinin bu Qanunun 9-5.3-cü və 9-5.4-cü maddələrinin tələblərinə uyğunluğunu təsdiq edən məlumatlar (rəhbər şəxslər və kapital (likvidlik) barədə).

9-6.2. Bu maddədə nəzərdə tutulmuş sənədlərin və məlumatların Elektron Hökumət İnformasiya Sistemi vasitəsilə müvafiq dövlət orqanından (qurumundan) əldə edilməsi mümkün olduqda, həmin sənədlər və məlumatlar müraciət edəndən tələb edilmir. Belə sənədlərin və məlumatların Elektron Hökumət İnformasiya Sistemi vasitəsilə əldə edilməsi mümkün olmadığı hallarda onların təqdim edilməsi müraciət edənin razılığı ilə sorğu əsasında müvafiq dövlət orqanından (qurumundan) tələb olunur və ya müraciət edən tərəfindən təmin edilir.

9-6.3. Mərkəzi Bank təqdim edilmiş sənədlərə 15 iş günü ərzində baxır.

9-6.4. Sənədlərdə və ya məlumatlarda çatışmazlıq aşkar edildikdə, ərizənin qeydiyyata alındığı tarixdən 3 iş günündən gec olmayaraq Mərkəzi Bank bu barədə məlumatı müraciət edənə təqdim edir. Bütün çatışmazlıqlar müraciət edənə eynizamanda bildirilməlidir.

9-6.5. Müraciət edən həmin çatışmazlıqları məlumatı aldığı vaxtdan ən geci 10 iş günü ərzində aradan qaldırmalıdır. Bu zaman azad hesabatlı vençur kapitalı fondunun reyestrdə qeydə alınması ilə bağlı müddətin axımı dayandırılır və dayandırılmış müddət reyestrdə qeydə alınma müddətinə daxil edilmir. Çatışmazlıqların aradan qaldırılması barədə müraciət edənin müraciətindən sonra müddətin axımı bərpa olunur.

9-6.6. Müraciət edən ərizədə və ona əlavə edilmiş sənədlərdə və məlumatlarda aşkar olunmuş çatışmazlıqları bu Qanunun 9-6.5-ci maddəsində göstərilən müddətdə aradan qaldırmadıqda ərizə baxılmamış saxlanılır və bu barədə məlumatı 2 iş günü müddətində müraciət edənə təqdim edilir.

9-6.7. Müraciət edən aşkar olunmuş çatışmazlıqları aradan qaldırdıqdan sonra reyestrdə qeydə alınma üçün təkrar ərizə ilə Mərkəzi Banka müraciət edə bilər. Bu halda müraciətə yeni müraciət kimi baxılır.

9-6.8. Təqdim edilən sənədlərdə və məlumatlarda çatışmazlıq olmadıqda, Mərkəzi Bank fondu azad hesabatlı vençur kapitalı fondu reyestrinə daxil edir və bu barədə 5 iş günü müddətində fonda yazılı bildiriş göndərir.

9-6.9. Mərkəzi Bank aşağıdakı hallarda fondu azad hesabatlı vençur kapitalı fondu kimi reyestrdə qeydə almaqdan imtina edir:

9-6.9.1. ərizədə və ona əlavə olunmuş sənədlərdə bu Qanunun 9-6.1-ci maddəsində nəzərdə tutulmuş tələblərə uyğun olmayan məlumatlar olduqda (bu Qanunun 9-6.4-ci maddəsində nəzərdə tutulmuş hal istisna olmaqla);

9-6.9.2. çatışmazlıqların aradan qaldırılması barədə müraciət edən müraciətindən sonra çatışmazlıqların aradan qaldırılmadığı müəyyən edildikdə.

9-6.10. Fondu azad hesabatlı vençur kapitalı fondu kimi reyestrdə qeydə alınmasından imtina haqqında Mərkəzi Bankın qərarını aldıqdan sonra müraciət edənlər inzibati qaydada və məhkəməyə şikayət edə bilərlər.

Maddə 9-7. Azad hesabatlı vençur kapitalı fondunun hesabatlılığı

9-7.1. Azad hesabatlı vençur kapitalı fondu Mərkəzi Banka hesabat təqdim etməlidir.

9-7.2. Hesabatda aşağıdakı məlumatlar göstərilir:

9-7.2.1. hesabat dövrünün sonuna bu Qanunun 9-1.7-ci maddəsinə uyğun hesablanmış idarə edilən aktivlərin həcmi və komponentləri;

9-7.2.2. investorların ümumi sayı və onların hamısının peşəkar investor olduğuna dair təsdiqedici sənədlər;

9-7.2.3. investisiya portfeli haqqında icmal məlumat (əsas investisiya sahələri və coğrafi bölgüsü);

9-7.2.4. fondun borclanma səviyyəsi və bu Qanunun 9-1.4.1-ci maddəsinin tələblərinə uyğunluğunu təsdiq edən sənədlər.

9-7.3. Azad hesabatlı vençur kapitalı fondu bu Qanunun 9-7.2.1-ci maddəsində nəzərdə tutulan məlumatları hər təqvim ili üzrə növbəti ilin birinci rübü ərzində, bu Qanunun 9-7.2.2 - 9-7.2.4-cü maddələrində nəzərdə tutulan məlumatları isə yarımildə bir dəfə (avqust və fevral aylarında), habelə bu Qanunun 9-7.6.2-ci maddəsində investorlara təqdim olunması nəzərdə tutulan illik maliyyə hesabatlarını Mərkəzi Banka təqdim edir.

9-7.4. Hesabatın forması Mərkəzi Bank tərəfindən müəyyən edilir.

9-7.5. Azad hesabatlı vençur kapitalı fondu investisiya strategiyası, risklər, xərclər və kapital itkisi ehtimalı barədə investorları yazılı şəkildə məlumatlandırmalı və onlardan bu riskləri qəbul etdiklərinə dair yazılı təsdiq almalıdır. İnvestorlara təqdim edilən bütün təklif sənədlərində və marketinq materiallarında fondun fəaliyyət rejimi, o cümlədən azad hesabatlı vençur kapitalı fondunun lisenziyalaşdırılmamış statusu barədə investorlara aydın şəkildə məlumat verilməlidir.

9-7.6. Azad hesabatlı vençur kapitalı fondu investorlarına aşağıdakı dövrilikdə və məzmunda hesabat təqdim etməlidir:

9-7.6.1. rüblük əsasda aktivlərin xalis dəyəri, idarəetməsində olan müəssisələrin vəziyyəti və idarəetmə xərcləri barədə hesabat;

9-7.6.2. illik əsasda Maliyyə Hesabatlarının Beynəlxalq Standartlarına uyğun hazırlanmış və kənar auditor tərəfindən təsdiq edilmiş maliyyə hesabatları və idarə edilən aktivlərin həcmi barədə məlumat.

Maddə 9-8. Azad hesabatlı vençur kapitalı fonduna dair nəzarət mexanizmləri

9-8.1. Mərkəzi Bankın azad hesabatlı vençur kapitalı fondu üzərində nəzarəti bu Qanunun 9-7-ci maddəsinə əsasən təqdim edilən illik hesabatların monitorinqi vasitəsilə həyata keçirilir.

9-8.2. Mərkəzi Bank azad hesabatlı vençur kapitalı fondunda və ya onun idarəçisində yalnız aşağıdakı hallarda "Azərbaycan Respublikasının Mərkəzi Bankı haqqında" Azərbaycan Respublikasının Qanununa uyğun olaraq yoxlama apara bilər:

9-8.2.1. fondun azad hesabatlı vençur kapitalı fondu meyarlarını pozduğuna dair əsaslı şübhələr olduqda;

9-8.2.2. fondun fəaliyyətində investorların və digər üçüncü şəxslərin hüquqlarının pozulması barədə şikayət və ya məlumat daxil olduqda.

Maddə 9-9. Akkreditə olunmuş investor statusunun yoxlanılması qaydaları

9-9.1. Vençur kapitalı fondu, investorun akkreditə olunmuş investor statusunu müəyyən etmək üçün onun tərəfindən imzalanmış yazılı bəyannaməyə əsaslana bilər. Bəyannamədə investorun bu Qanunun 1.1.7-3-cü maddəsindəki hansı meyara (meyarlara) cavab verdiyi göstərilməlidir. Fondun bu bəyanatın yanlış olduğuna dair faktiki məlumatı olduqda, investorun ona əsaslanmasına yol verilmir.

9-9.2. Vençur kapitalı fondu investorların akkreditə olunmuş investor statusunu yoxlamaq üçün investorlar tərəfindən aşağıdakı sənədlərdən  azı biri təqdim edilir:

9-9.2.1. fiziki şəxslərin gəlirlərini və ya xalis aktivlərini təsdiq edən rəsmi sənədlər (vergi bəyannamələri, bank (depozitar) çıxarışları, əmlak qiymətləndirmə hesabatları);

9-9.2.2. hüquqi şəxslərin audit yoxlamasından keçmiş maliyyə hesabatları;

9-9.2.3. investorun akkreditə olunmuş investor statusunu göstərən auditor rəyi.

9-9.3. Akkreditə olunmuş investor statusunun yoxlanılmasına dair sənədlər fond tərəfindən azı 5 il müddətində saxlanılmalıdır.

9-9.4. Fəaliyyətlərin dəstəklənməsi və əlaqələndirilməsi habelə ümumi mənafelərinin (əmlak mənafeləri daxil olmaqla) təmsil və müdafiə edilməsi (o cümlədən, müəssisə, idarə və təşkilatlarda, dövlət orqanlarında (qurumlarında), beynəlxalq təşkilatlarda) məqsədilə akkreditə olunmuş investor statusuna malik şəxslər qeyri-kommersiya hüquqi şəxsi formasında (akkreditə olunmuş investor birlikləri) birləşə bilər.

Maddə 9-10. Qapalı səhmdar cəmiyyəti formasında yaradılan vençur kapitalı

fondunun təşkili və fəaliyyəti

9-10.1. Qapalı səhmdar cəmiyyəti formasında yaradılan vençur kapitalı fondu azı üç hüquqi və (və ya) fiziki şəxs tərəfindən yaradılır.

9-10.2. Qapalı səhmdar cəmiyyəti formasında yaradılan vençur kapitalı fondunun təsisçilərinin (iştirakçılarının) ümumi sayı əllidən çox ola bilməz.

9-10.3. Qapalı səhmdar cəmiyyəti formasında yaradılan vençur kapitalı fondu bu Qanunun 9-2-ci və 9-3-cü maddələrinə uyğun olaraq azad hesabatlı vençur kapitalı fondu və ya lisenziyalaşdırılan vençur kapitalı fondu rejimində fəaliyyət göstərə bilər.

9-10.4. Qapalı səhmdar cəmiyyəti formasında yaradılan vençur kapitalı fondunun iştirakçıları (səhmdarları) onun öhdəlikləri üçün cavabdeh deyildirlər və cəmiyyətin fəaliyyəti ilə bağlı zərər üçün onlara mənsub səhmlərin dəyəri həddində risk daşıyırlar.

Maddə 9-11. Qapalı səhmdar cəmiyyəti formasında yaradılan vençur kapitalı fondunda idarəetmə

9-11.1. Qapalı səhmdar cəmiyyəti formasında yaradılan vençur kapitalı fondunun səhmdarlarının ümumi yığıncağının müstəsna səlahiyyətlərinə Azərbaycan Respublikası Mülki Məcəlləsinin 107.1-ci maddəsi ilə nəzərdə tutulmuş səlahiyyətlərdən əlavə aşağıdakılar aiddir:

9-11.1.1. idarəçinin və ya depozitarın dəyişdirilməsi barədə qərarın qəbul edilməsi;

9-11.1.2. fondun xərclərinin artırılması barədə qərarın qəbul edilməsi.

9-11.2. Qapalı səhmdar cəmiyyəti formasında yaradılan vençur kapitalı fondunun səhmdarlarının ümumi yığıncağında iştirak etmək hüququna malik olan şəxslərin siyahısı vençur kapitalı fondunun səhmdarlarının reyestri əsasında müəyyənləşdirilir. Həmin siyahı səhmdarların ümumi yığıncağının keçirilməsi tarixinədək 60 gündən gec və 45 gündən tez olmayan müddətdə tərtib edilməlidir.

9-11.3. Qapalı səhmdar cəmiyyəti formasında yaradılan vençur kapitalı fondunun səhmdarların ümumi yığıncağının çağırılmasına azı 45 gün qalmış bu barədə məlumat verilməli, habelə tərtib edilmiş siyahı əsasında səhmdarlara, idarəçiyə, depozitara, həmçinin lisenziyalaşdırılan vençur kapitalı fondu tərəfindən Mərkəzi Banka yazılı bildiriş göndərilməlidir.

9-11.4. Qapalı səhmdar cəmiyyəti formasında yaradılan vençur kapitalı fondu ilə müvafiq müqavilələr bağlamış idarəçinin, depozitarın, auditorun və qiymətləndiricinin əməkdaşları, habelə onlara aidiyyəti olan şəxslər vençur kapitalı fondunun icra orqanının üzvü ola bilməzlər.

9-11.5. Qapalı səhmdar cəmiyyəti formasında yaradılan vençur kapitalı fondunun idarəetmə orqanlarının səlahiyyətləri, onların qərarları qəbul etmə prosedurları, o cümlədən barəsində qərarların yekdilliklə və ya şərtləşdirilmiş səs çoxluğu ilə qəbul edildiyi məsələlər səhmdar cəmiyyətlərə dair müvafiq normativ hüquqi aktlarla tənzimlənir.

9-11.6. Qapalı səhmdar cəmiyyəti formasında yaradılan vençur kapitalı fondunun icra orqanının üzvlərinin şəxsi marağı ilə vençur kapitalı fondunun maraqları arasında ziddiyyətlərə gətirib çıxara bilən hallarda məlumat verilməsi, habelə vençur kapitalı fondunun maraqlarına zidd olan əqdlərin bağlanması Azərbaycan Respublikasının Mülki Məcəlləsinin 107-10.5-ci maddəsinin tələblərinə uyğun olaraq həyata keçirilir.

Maddə 9-12. Qapalı səhmdar cəmiyyəti formasında yaradılan vençur kapitalı

fondunun investisiya bəyannaməsi

9-12.1. Qapalı səhmdar cəmiyyəti formasında yaradılan vençur kapitalı fondunun investisiya bəyannaməsi fondun təsis yığıncağının qərarı ilə, fond yaradıldıqdan sonra isə səhmdarların ümumi yığıncağının qərarı ilə qəbul edilir.

9-12.2. Qapalı səhmdar cəmiyyəti formasında yaradılan vençur kapitalı fondunun investisiya bəyannaməsində aşağıdakılar göstərilir:

9-12.2.1. vençur kapitalı fondunun, idarəçinin (olduqda), depozitarın və auditorun tam adı və yerləşdiyi ünvan;

9-12.2.2. qiymətləndiricinin və ya qiymətləndirici təşkilatın (olduqda) tam adı, fəaliyyət və ya hüquqi ünvanları;

9-12.2.3. vençur kapitalı fondunun investisiya strategiyası, şərtləri, istiqamətləri və sahələri haqqında məlumat;

9-12.2.4. vençur kapitalı fondunun aktivlərinin diversifikasiyası şərtləri;

9-12.2.5. investisiyaların həyata keçirilməsi ilə bağlı risklər;

9-12.2.6. investisiya fəaliyyətinə dair məhdudiyyətlər;

9-12.2.7. fondun aktivləri hesabına idarəçiyə, depozitara və digər şəxslərə ödəniləcək mükafatların, xərclərin və xidmət haqlarının hesablanma qaydaları və maksimum həcmi;

9-12.2.8. dividendlərin ödənilməsi qaydası;

9-12.2.9. vençur kapitalı fondundan və səhmdarlardan qanunla nəzərdə tutulmuş vergilər və onların ödənilməsi qaydası barədə məlumat;

9-12.2.10. vençur kapitalı fondunun fəaliyyətinə dair məlumatların açıqlanması qaydaları;

9-12.2.11. vençur kapitalı fondunun müddəti və investisiyalardan çıxış strategiyası;

9-12.2.12. investisiya bəyannaməsinə əlavə və dəyişikliklərin edilmə proseduru və investorların məlumatlandırılması qaydası;

9-12.2.13. investisiya portfelinə dair tərtib olunan hesabatın əsas valyutası;

9-12.2.14. bu Qanunun 9-1.10-cu maddəsində göstərilən məlumatlar.

9-12.3. Qapalı səhmdar cəmiyyəti formasında yaradılan lisenziyalaşdırılan vençur kapitalı fondunun investisiya bəyannaməsi onun səhm buraxılışı ilə birgə dövlət qeydiyyatına alınır. Səhm buraxılışının dövlət qeydiyyatı "Qiymətli kağızlar bazarı haqqında" Azərbaycan Respublikasının Qanununa uyğun olaraq həyata keçirilir. Azad hesabatlı vençur kapitalı fondunun investisiya bəyannaməsi isə fondun reyestrdə qeydə alınması zamanı Mərkəzi Banka təqdim edilir. 

9-12.4. Qapalı səhmdar cəmiyyəti formasında yaradılan vençur kapitalı fondununinvestisiya bəyannaməsi hər bir potensial investora təqdim edilməlidir.

Maddə 9-13. Kommandit ortaqlığı formasında yaradılan vençur kapitalı

fondunun təşkili və fəaliyyəti

9-13.1. Kommandit ortaqlığı formasında yaradılan vençur kapitalı fondu bu Qanunun 9-2-ci və 9-3-cü maddələrinə uyğun olaraq azad hesabatlı vençur kapitalı fondu və ya lisenziyalaşdırılan vençur kapitalı fondu rejimində fəaliyyət göstərə bilər.

9-13.2. Kommandit ortaqlığı formasında yaradılan vençur kapitalı fondunun tam ortaqları istisna olmaqla, digər ortaqlar (kommanditçi) fondun öhdəlikləri üzrə məsuliyyət daşımır və fondun fəaliyyəti ilə bağlı zərər üçün qoyduqları mayaların dəyəri həddində risk daşıyırlar.

Maddə 9-14. Kommandit ortaqlığı formasında yaradılan vençur kapitalı

fondunda idarəetmə

9-14.1. Kommandit ortaqlığı formasında yaradılan vençur kapitalı fondunda idarəetmə Azərbaycan Respublikasının Mülki Məcəlləsinə uyğun həyata keçirilir.

9-14.2. Kommandit ortaqlığı formasında yaradılan vençur kapitalı fondu ilə müvafiq müqavilələr bağlamış idarəçi, depozitar, auditor və qiymətləndirici, habelə onlara aidiyyəti olan şəxslər və onların nümayəndələri fondun iştirakçısı ola bilməz.

Maddə 9-15. Kommandit ortaqlığı formasında yaradılan vençur kapitalı

fondunun investisiya bəyannaməsi

9-15.1. Kommandit ortaqlığı formasında yaradılan vençur kapitalı fondunun investisiya bəyannaməsi fondun tam ortaqlarının qərarı ilə qəbul edilir.

9-15.2. Kommandit ortaqlığı formasında yaradılan vençur kapitalı fondunun investisiya bəyannaməsində aşağıdakılar göstərilir:

9-15.2.1. vençur kapitalı fondunun və idarəçinin (olduqda) tam adı və yerləşdiyi ünvan;

9-15.2.2. qiymətləndiricinin və ya qiymətləndirici təşkilatın (olduqda) tam adı, fəaliyyəti və hüquqi ünvanları;

9-15.2.3. fondun investisiya strategiyası, şərtləri, istiqamətləri və sahələri haqqında məlumat;

9-15.2.4. fondun aktivlərinin diversifikasiyası şərtləri;

9-15.2.5. investisiyaların həyata keçirilməsi ilə bağlı risklər;

9-15.2.6. investisiya fəaliyyətinə dair məhdudiyyətlər;

9-15.2.7. fondun aktivləri hesabına idarəçiyə digər şəxslərə ödəniləcək mükafatların, xərclərin və xidmət haqlarının hesablanma qaydaları və maksimum həcmi;

9-15.2.8. mənfəət və zərərin bölüşdürülməsi qaydası;

9-15.2.9. vençur kapitalı fondundan və iştirakçılardan qanunvericiliklə nəzərdə tutulmuş vergilər və onların ödənilməsi qaydası barədə məlumat;

9-15.2.10. fondun fəaliyyətinə dair məlumatların açıqlanması qaydaları;

9-15.2.11. vençur kapitalı fondunun müddəti və investisiyalardan çıxış strategiyası;

9-15.2.12. investisiya bəyannaməsinə əlavə və dəyişikliklərin edilmə proseduru və investorların məlumatlandırılması qaydası;

9-15.2.13. investisiya portfelinə dair tərtib olunan hesabatın əsas valyutası;

9-15.2.14. bu Qanunun 9-1.10-cu maddəsində göstərilən məlumatlar.

9-15.3. Kommandit ortaqlığı formasında yaradılan vençur kapitalı fondunun investisiya bəyannaməsinin təsdiq edilməsi barədə qərar fondun tam ortaqları tərəfindən qəbul edildikdən sonra 5 iş günü ərzində Mərkəzi Banka təqdim edilir. Mərkəzi Bank investisiya bəyannaməsini 10 iş günü ərzində qeydiyyata alır.

9-15.4. Kommandit ortaqlığı formasında yaradılan vençur kapitalı fondunun investisiya bəyannaməsi ictimaiyyətə açıqlanmır (dərc edilmir), lakin bütün iştirakçılara təqdim edilməlidir.

Maddə 9-16. Məhdud məsuliyyətli cəmiyyət formasında yaradılan vençur

kapitalı fondunun təşkili və fəaliyyəti

9-16.1. Məhdud məsuliyyətli cəmiyyət formasında yaradılan vençur kapitalı fondu yalnız azad hesabatlı vençur kapitalı fondu rejimində fəaliyyət göstərə bilər.

9-16.2. Məhdud məsuliyyətli cəmiyyət formasında yaradılan azad hesabatlı vençur kapitalı fondunun nizamnamə kapitalı iştirakçıların bəyan etdiyi ödənilməmiş kapital öhdəliyi prinsipi əsasında formalaşdırıla bilər. İştirakçılar nizamnamə kapitalındakı paylarını (kapital öhdəliyini) fondun nizamnaməsində və ya investisiya bəyannaməsində müəyyən edilmiş investisiya dövrü ərzində, vençur kapitalı fondunun və ya onun idarəçisinin yazılı tələbi əsasında, tələbdə göstərilən və 30 (otuz) iş günündən çox olmayan müddətdə ödəyirlər. İnvestisiya dövrü başa çatdıqda iştirakçıların tələb olunmamış və ödənilməmiş kapital öhdəliklərinə xitam verilir və fondun nizamnamə kapitalı faktiki ödənilmiş məbləğə qədər azaldılır.

9-16.3. İştirakçı kapital öhdəliyini yazılı tələbdə müəyyən edilmiş müddətdə icra etmədikdə, fondun nizamnaməsində və ya təsis sənədlərində nəzərdə tutulmuş qaydada həmin iştirakçıya qarşı aşağıdakı tədbirlərdən biri və ya bir neçəsi tətbiq edilə bilər:

9-16.3.1. ödənilməmiş məbləğə münasibətdə cərimələrin və ya dəbbə pulunun hesablanması;

9-16.3.2. fondun idarə edilməsində səsvermə hüququnun və fondun mənfəətindən (gəlirindən) pay almaq hüququnun məhdudlaşdırılması və ya dayandırılması;

9-16.3.3. iştirakçının fonddakı ödənilməmiş pay hissəsinin və ya əvvəllər ödəmiş olduğu məbləğlərin məcburi qaydada fondun digər iştirakçılarına, yaxud üçüncü şəxslərə (peşəkar investorlara) satılması.

9-16.4. Fondun iştirakçılarının sayı əllidən çox ola bilməz.

9-16.5. İştirakçılar fondun öhdəlikləri üzrə məsuliyyət daşımır və fondun fəaliyyəti ilə bağlı zərər üçün qoyduqları mayaların dəyəri həddində risk daşıyırlar.

9-16.6. Fondun fəaliyyət müddəti ərzində iştirakçının cəmiyyətdən çıxmaq və payının dəyərini tələb etmək hüququ nizamnamə ilə məhdudlaşdırıla bilər.

9-16.7. Məhdud məsuliyyətli cəmiyyət formasında yaradılan vençur kapitalı fondu azı iki iştirakçı tərəfindən yaradılır.

Maddə 9-17. Məhdud məsuliyyətli cəmiyyət formasında yaradılan vençur

kapitalı fondunda idarəetmə

9-17.1. Fondun ali idarəetmə orqanı iştirakçıların ümumi yığıncağıdır. Ümumi yığıncağın səlahiyyətləri Azərbaycan Respublikasının Mülki Məcəlləsinin 91.3-cü maddəsinə uyğun olaraq müəyyən edilir. Ümumi yığıncaq, o cümlədən, fondun idarəçisinin (icra orqanının və ya kənar idarəçinin) təyini və azad edilməsi məsələlərini həll edir.

9-17.2. Fondun cari fəaliyyətinə rəhbərlik təkbaşına icra orqanı (direktor) və ya kollegial icra orqanı tərəfindən həyata keçirilir. Fondun idarə edilməsi müqavilə əsasında kənar idarəçiyə verilə bilər.

9-17.3. Təsis sənədlərində nəzərdə tutulduğu halda fondun mənfəəti və zərəri iştirakçılar arasında onların nizamnamə kapitalındakı paylarına mütənasib olmayan qaydada bölüşdürülə bilər.

Maddə 9-18. Məhdud məsuliyyətli cəmiyyət formasında yaradılan vençur

kapitalı fondunun investisiya bəyannaməsi

9-18.1. İnvestisiya bəyannaməsi iştirakçıların ümumi yığıncağının qərarı ilə qəbul edilir.

9-18.2. Məhdud məsuliyyətli cəmiyyət formasında yaradılan vençur kapitalı fondunun investisiya bəyannaməsində bu Qanunun 9-12.2-ci maddəsində qeyd edilən məlumatlar göstərilir.

9-18.3. İnvestisiya bəyannaməsi ictimaiyyətə açıqlanmır (dərc edilmir), lakin fondun reyestrdə qeydə alınması zamanı Mərkəzi Banka və hər bir investora təqdim edilməlidir.";

4.4. aşağıdakı məzmunda 10.8-ci, 13.2-1-ci və 14.1.1-1-ci maddələr əlavə edilsin:

"10.8. Vençur kapitalı fondu kimi fəaliyyət göstərən qapalı paylı investisiya fondunun pay mülkiyyətçilərinin (peşəkar investorlarının) ümumi sayı yüzdən çox ola bilməz.";

"13.2-1. Vençur kapitalı fondu fəaliyyəti ilə məşğul olan qapalı paylı investisiya fondunun idarə edilməsi qaydalarında bu Qanunun 13.2-ci maddəsində qeyd olunan məlumatlardan əlavə idarəçinin peşəkar investorlardan cəlb edilən pul vəsaitlərinin bu Qanunun 9-1.3-cü maddəsində nəzərdə tutulan məqsədlərə və Mərkəzi Bank tərəfindən müəyyən edilmiş qaydada investisiya qiymətli kağızlarına investisiya edəcəyi ilə bağlı şərt əlavə edilməlidir.";

"14.1.1-1. vençur kapitalı fondu fəaliyyəti ilə məşğul olan qapalı paylı investisiya fondunun peşəkar investorlardan cəlb edilən pul vəsaitlərinin bu Qanunun 9-1.3-cü maddəsində nəzərdə tutulan məqsədlərə və Mərkəzi Bank tərəfindən müəyyən edilmiş qaydada investisiya qiymətli kağızlarına investisiya edilməsi haqqında məlumat;";

4.5. 24-cü maddə üzrə:

4.5.1. 24.2-ci maddənin birinci cümləsinə "İdarəçi" sözündən sonra "(investisiya şirkətləri istisna olmaqla)" sözləri əlavə edilsin;

4.5.2. aşağıdakı məzmunda 24.13-cü maddə əlavə edilsin:

"24.13. Vençur kapitalı fondları müvafiq olaraq məhdud məsuliyyətli cəmiyyətinin və ya qapalı səhmdar cəmiyyətinin icra orqanı və ya kommandit ortaqlığının tam ortağı (ortaqları) tərəfindən idarə olunduğu halda kənar idarəçi cəlb etməyə bilər.";

4.6. 25.11.5-ci maddənin birinci abzasına və 25.11.6-cı maddəyə "idarəçi" sözündən sonra ", kommandit ortaqlığı formasında yaradılan vençur kapitalı fondunun işlərini aparan tam ortağı (ortaqları)" sözləri əlavə edilsin;

4.7. 27-ci maddə üzrə:

4.7.1. 27.1.1-ci və 27.2.4-cü maddələrə "üzvü" sözündən sonra "(kommandit ortaqlığı formasında yaradılan vençur kapitalı fondunun işlərini aparan tam ortağı (ortaqları)" sözləri əlavə edilsin;

4.7.2. 27.2.5-ci maddəyə "yığıncağının" sözündən sonra "(kommandit ortaqlığı formasında yaradılan vençur kapitalı fondunun tam ortağı (ortaqları)" sözləri əlavə edilsin;

4.7.3. 27.2.5-1-ci maddəyə "orqanı" sözündən sonra "(kommandit ortaqlığı formasında yaradılan vençur kapitalı fondunun işlərini aparan tam ortağı (ortaqları)" sözləri əlavə edilsin;

4.7.4. 27.2.9-cu maddəyə "üzvləri" sözündən sonra "(kommandit ortaqlığı formasında yaradılan vençur kapitalı fondunun işlərini aparan tam ortağı (ortaqları)" sözləri əlavə edilsin;

4.8. aşağıdakı məzmunda 29.1-1-ci maddə əlavə edilsin:

"29.1-1. Vençur kapitalı fondunun aktivləri pul vəsaitlərindən, hüquqi şəxslərin nizamnamə (şərikli) kapitalında iştirak paylarından (səhmlərindən), investisiya qiymətli kağızlardan və portfel şirkətlərinə verilən borclardan, gələcəkdə kapitala çevrilmə hüququ verən borc alətlərindən, digər investisiya fondlarında (o cümlədən vençur fondlarında) iştirak paylarından, habelə investisiya strategiyasına uyğun olaraq digər maliyyə aktivlərindən və digər maliyyə alətlərindən ibarət ola bilər. Vençur kapitalı fondunun aktivlərinin tərkibinə və strukturuna dair tələblər Mərkəzi Bank tərəfindən qəbul olunmuş normativ xarakterli aktlarla müəyyən edilir.";

4.9. 30.2-ci maddəyə "edilməsini" sözündən sonra ", vençur kapitalı fondları həmçinin maliyyə hesabatlarının təqdim və dərc edilməsini" sözləri əlavə edilsin;

4.10. 36-cı maddə üzrə:

4.10.1. aşağıdakı məzmunda 36.1.9-1-ci və 36.1.9-2-ci maddələr əlavə edilsin:

"36.1.9-1. vençur kapitalı fondunun idarəçi tərəfindən idarə edilməsi nəzərdə tutulduqda vençur kapitalı fondunun idarə edilməsini həyata keçirəcək idarəçi barədə məlumat;

36.1.9-2. vençur kapitalı fondunun öz idarəetmə orqanları tərəfindən idarə olunması nəzərdə tutulduqda həmin idarəetmə orqanları barədə məlumat;";

4.10.2. 36.1.13-cü maddəyə "əməkdaşlarının" sözündən sonra "(vençur kapitalı fondlarında baş mühasib (bu vəzifələri icra edən şəxs mövcud olduqda)" sözləri əlavə edilsin;

4.10.3. 36.1.15-ci maddədə "səhmdarları" sözü "iştirakçıları" sözü ilə əvəz edilsin;

4.11. 38.2.1-ci maddəyə "fondunun" sözündən sonra "və bu Qanunun 24.13-cü maddəsində göstərilən hal istisna olmaqla vençur kapitalı fondunun" sözləri əlavə edilsin;

4.12. 40-cı maddə üzrə:

4.12.1. 40.2-ci maddəyə "üzvü" sözündən sonra ", habelə kommandit ortaqlığı formasında yaradılan vençur kapitalı fondunun işlərini aparan tam ortağı (ortaqları)" sözləri əlavə edilsin;

4.12.2. 40.4-cü maddəyə "barəsində" sözündən sonra ", habelə kommandit ortaqlığı formasında yaradılan vençur kapitalı fondunun işlərini aparan tam ortaq (ortaqlar) müəyyən olunduqda və dəyişdirildikdə" sözləri əlavə edilsin;

4.12.3. 40.4-2-ci maddədə "verməlidir" sözü "verməli, habelə kommandit ortaqlığı formasında yaradılan vençur kapitalı fondunun tam ortağının (ortaqlarının) işlərin aparılması səlahiyyətinə xitam verməlidir" sözləri ilə əvəz edilsin;

4.13. 41-ci maddə üzrə:

4.13.1. 41.1.1-ci maddəyə "orqanının" sözündən sonra "(kommandit ortaqlığı formasında yaradılan vençur kapitalı fondunun tam ortağının (ortaqlarının)" sözləri əlavə edilsin;

4.13.2. aşağıdakı məzmunda 41.1.1-1-ci maddə əlavə edilsin:

"41.1.1-1. idarəçi tərəfindən idarə olunan vençur kapitalı fondunun idarəçisi tərəfindən vençur kapitalı fondunun bütün səhmləri və ya payları satın alındıqda;";

4.13.3. 41.3-cü maddənin ikinci cümləsinə "fondu" sözündən sonra "və bu Qanunun 24.13-cü maddəsinin tələbi nəzərə alınmaqla vençur kapitalı fondu" sözləri əlavə edilsin;

4.14. 45-ci maddə üzrə:

4.14.1. 45.2.1-ci maddədə, 45.3-cü maddənin birinci cümləsində və 45.8-ci maddədə ismin müvafiq hallarında "yığıncağı" sözündən sonra ismin müvafiq hallarında "(kommandit ortaqlığı formasında yaradılan vençur kapitalı fondunun tam ortağı (ortaqları)" sözləri əlavə edilsin;

4.14.2. 45.9-cu maddəyə "orqanına" sözündən sonra "(kommandit ortaqlığı formasında yaradılan vençur kapitalı fondunun tam ortağına (ortaqlarına)" sözləri əlavə edilsin;

4.14.3. 45.14-cü maddənin ikinci cümləsinə "səhmdarlar" sözündən sonra "(kommandit ortaqlığı formasında yaradılan vençur kapitalı fondunun tam ortağı (ortaqları)" sözləri əlavə edilsin;

4.15. 46-cı maddə üzrə:

4.15.1. 46.4-cü maddənin birinci cümləsinə "yığıncağının" sözündən sonra "(kommandit ortaqlığı formasında yaradılan vençur kapitalı fondunun tam ortağının (ortaqlarının)" sözləri əlavə edilsin;

4.15.2. 46.16-cı maddəyə "orqanına" sözündən sonra "(kommandit ortaqlığı formasında yaradılan vençur kapitalı fondunun işlərini aparan tam ortağına (ortaqlarına)" sözləri əlavə edilsin;

4.15.3. 46.17.2-ci maddəyə "səhmdarlarının" sözündən sonra "(kommandit ortaqlığı formasında yaradılan vençur kapitalı fondunun iştirakçılarının)" sözləri əlavə edilsin;

4.16. 46.25-ci maddənin üçüncü cümləsinə "səhmdarlar" sözündən sonra "(kommandit ortaqlığı formasında yaradılan vençur kapitalı fondunun iştirakçıları)" sözləri əlavə edilsin;

4.17. 48-ci maddə üzrə:

5.17.1. 48.1.4-cü maddəyə "mülkiyyətçilərinin" sözündən sonra "(səhmdarlarının)" sözü əlavə edilsin;

4.17.2. 48.1.6-cı maddəyə "üzvləri" sözündən sonra "(kommandit ortaqlığı formasında yaradılan vençur kapitalı fondunun işlərini aparan tam ortağı (ortaqları)" sözləri əlavə edilsin;

4.17.3. 48.4-cü maddənin birinci cümləsinə "fondları" sözündən sonra "(vençur kapitalı fondları istisna olmaqla)" sözləri əlavə edilsin.

Maddə 5. "Qiymətli kağızlar bazarı haqqında" Azərbaycan Respublikasının Qanununda (Azərbaycan Respublikasının Qanunvericilik Toplusu, 2015, № 7, maddə 813 (Cild I); 2025, № 4 (I kitab), maddə 318, № 5, maddə 432, № 7, maddə 613) aşağıdakı dəyişikliklər edilsin:

5.1. aşağıdakı məzmunda 1.0.7-1-ci maddə əlavə edilsin:

"1.0.7-1. peşəkar investor - institusional investorlar da daxil olmaqla Azərbaycan Respublikasının Mərkəzi Bankı tərəfindən müəyyən olunan tələblərə cavab verən hüquqi və fiziki şəxslər;";

5.2. 5.5.5-ci maddədə "institusional" sözü "peşəkar" sözü ilə əvəz edilsin.

Azərbaycan Respublikasının Prezidenti

14 iyul 2026

Layihə

AZƏRBAYCAN RESPUBLİKASININ QANUNU

Azərbaycan Respublikasının Əmək Məcəlləsində, Azərbaycan Respublikasının Mülki Məcəlləsində, "Valyuta tənzimi haqqında", "İnvestisiya fondları haqqında" və "Qiymətli kağızlar bazarı haqqında" Azərbaycan Respublikasının qanunlarında dəyişiklik edilməsi barədə

Azərbaycan Respublikasının Milli Məclisi Azərbaycan Respublikası Konstitusiyasının 94-cü maddəsinin I hissəsinin 10-cu, 12-ci, 13-cü, 15-ci, 16-cı, 20-ci və 27-ci bəndlərini rəhbər tutaraq qərara alır:

Maddə 1. Azərbaycan Respublikasının Əmək Məcəlləsində (Azərbaycan Respublikasının Qanunvericilik Toplusu, 1999, № 4, maddə 213 (Cild I); 2024, № 1, maddə 6, № 4, maddə 365, № 7, maddə 744, № 8, maddə 934; 2025, № 1, maddələr 1, 16, № 2, maddə 96, № 4 (I kitab), maddə 322, № 7, maddələr 606, 608; 2026, № 1, maddələr 8, 16, № 2, maddə 110, № 3, maddə 209; Azərbaycan Respublikasının 2026-cı il 3 mart tarixli 376-VIIQD nömrəli, 10 aprel tarixli 383-VIIQD nömrəli, 27 aprel tarixli 394-VIIQD və 1 may tarixli 401-VIIQD nömrəli qanunları) aşağıdakı dəyişikliklər edilsin:

1.1. 3-cü maddəyə aşağıdakı məzmunda 7-1-ci hissə əlavə edilsin:

"7-1. İşçilərin pay (səhm) iştirakı planı haqqında müqavilə - kommersiya hüquqi şəxsin  təsisçisinin (iştirakçısının) və ya onun verdiyi səlahiyyət əsasında işəgötürənin təşəbbüsü ilə işçiyə güzəştli şərtlərlə və ya ödənişsiz əsasla müəssisənin paylarının (səhmlərinin) verilməsi və ya gələcəkdə onları əldə etmək (almaq) hüququnun tanınması ilə bağlı məsələləri tənzimləyən ayrıca müqavilə.";

1.2. aşağıdakı məzmunda 7-1-ci və 76-1-ci maddələr əlavə edilsin:

"Maddə 7-1. İşçilərin pay (səhm) iştirakı planı haqqında müqavilənin şərtləri

7-1.1. Təsisçi və ya işəgötürənlə işçi arasında bağlanan işçilərin pay (səhm) iştirakı planı haqqında müqavilədə payların (səhmlərin) işçinin tam mülkiyyətinə keçməsi üçün aşağıdakı xüsusi şərtlərdən biri müəyyən edilə bilər:

7-1.1.1. zamana əsaslanan şərt: tərəflər arasında müəyyən edilmiş müddət ərzində işçinin işəgötürənlə əmək münasibətlərində olması şərtilə paya (səhmə) olan hüququnun hissə-hissə və ya müddətin sonunda tam qüvvəyə minməsi;

7-1.1.2. hədəfə əsaslanan şərt: işçinin və ya kommersiya hüquqi şəxsin fəaliyyətində müəyyən hədəflərə nail olunması şərtilə paya (səhmə) olan hüququnun qüvvəyə minməsi.

7-1.2. Tərəflər işçilərin pay (səhm) iştirakı planı haqqında müqavilədə bu Məcəllənin 76-1.1-ci maddəsinə uyğun olaraq, əmək münasibətlərinə xitam verilməsi əsaslarından asılı olaraq paya (səhmə) olan hüquqlarının əldə edilib-edilməməsi nəticələrini müəyyən edə bilərlər.";

"Maddə 76-1. Əmək münasibətlərinə xitam verilməsinin işçilərin pay (səhm)

iştirakı planı haqqında müqaviləyə təsiri

76-1.1. İşçilərin pay (səhm) iştirakı planı haqqında müqavilədə işçi ilə əmək münasibətlərinə xitam verildikdə, həmin xitamın əsaslarından asılı olaraq işçinin paya (səhmə) olan hüquqlarına və ya əldə etdiyi paylara (səhmlərə) fərqli hüquqi nəticələr nəzərdə tutula bilər.

76-1.2. Bu Məcəllənin 69-cu maddəsi, 70-ci maddəsinin "a", "b", "d" və "e" bəndləri, 73-cü maddəsi, 74-cü maddəsinin birinci hissəsinin "a", "b", "c", "d", "e" və "ə" bəndləri ilə əmək müqaviləsinə xitam verilməsi hallarında işçinin əldə edilməmiş paya (səhmə) olan hüquqlarının hamısının və ya bir hissəsinin əldə edilmiş hesab edilməsi və ya əldə edilmiş payların (səhmlərin) ədalətli bazar dəyəri ilə kommersiya hüquqi şəxsə və ya təsisçiyə (iştirakçıya) geri satılması öhdəliyi nəzərdə tutula bilər.

76-1.3. Bu Məcəllənin 70-ci maddəsinin "c" və "ç" bəndləri, 74-cü maddəsinin birinci hissəsinin "ç" və "f" bəndləri ilə əmək müqaviləsinə xitam verilməsi hallarında işçilərin pay (səhm) iştirakı planı haqqında müqavilədə işçinin bütün əldə edilməmiş paya (səhmə) olan hüquqlarını itirməsi və ya əldə etdiyi payları (səhmləri) nominal və ya daha aşağı dəyərlə kommersiya hüquqi şəxsə və ya təsisçiyə (iştirakçıya) geri satılması ilə bağlı hüquqi nəticələr nəzərdə tutula bilər.";

1.3. 154-cü maddəyə aşağıdakı məzmunda 4-cü hissə əlavə edilsin:

"4. İşçinin pay (səhm) iştirakı planı haqqında müqavilənin tələblərinə uyğun olaraq əldə edilən pay (səhm) əmək haqqına daxil edilmir və əmək haqqı əvəzi kimi ödənilmir.".

Maddə 2. Azərbaycan Respublikasının Mülki Məcəlləsində (Azərbaycan Respublikasının Qanunvericilik Toplusu, 2000, № 4 (I kitab), maddə 250 (Cild I); 2024, № 2, maddə 138, № 4, maddə 365, № 5 (I kitab), maddə 493, № 7, maddə 744, № 12 (I kitab), maddə 1281; 2025, № 1, maddə 17, № 3, maddə 216, № 4 (I kitab), maddələr 315, 318, № 6, maddələr 523, 524, 536, № 7, maddələr 610, 626, № 8, maddələr 738, 741, 743, 744, № 11, maddə 1004; 2026, № 1, maddə 2, № 3, maddə 208) aşağıdakı dəyişikliklər edilsin:

2.1. aşağıdakı məzmunda 61.7-1-ci, 64.10-cu, 65-1-ci, 65-2-ci və 88.3-cü maddələr əlavə edilsin:

"61.7-1. Bu Məcəllənin 404-4.3-cü maddəsində nəzərdə tutulan halda gələcək iştirak payı (səhm) haqqında müqavilə üzrə investorun ödəniş tələbləri, hüquqi şəxsin digər təminatsız kreditorlarının tələblərindən sonra, lakin hüquqi şəxsin iştirakçılarına (səhmdarlarına) qalıq əmlakın verilməsindən (bölüşdürülməsindən) əvvəl yerinə yetirilir.";

 "64.10. Bu Məcəllənin 90.4-cü və 104.1-ci maddələrinin tələblərindən fərqli olaraq təsərrüfat cəmiyyətinin nizamnaməsi ilə direktorlar şurasına (müşahidə şurasına) təsisçilərin (iştirakçıların) ümumi yığıncağını çağırmadan, nizamnamədə əvvəlcədən yuxarı həddi nəzərdə tutulmuş, lakin şərtləri (hüquqları, imtiyazları və məhdudiyyətləri) hələ müəyyən edilməmiş yeni payların ayrılması və ya səhmlərin buraxılması barədə qərar qəbul etmək səlahiyyəti verilə bilər. Bu payların (səhmlərin) emissiya şərtləri direktorlar şurasının (müşahidə şurasının) qərarı ilə müəyyən edilir və bununla bağlı nizamnaməyə edilən dəyişikliklər qanunla müəyyən edilmiş qaydada dövlət qeydiyyatına alınır.";

 "Maddə 65-1. Korporativ müqavilə

65-1.1. Məhdud məsuliyyətli cəmiyyətin iştirakçıları və ya səhmdar cəmiyyətinin səhmdarları, habelə korporativ müqavilədən irəli gələn öhdəliklərin icrasında iştirakı zəruri olduğu hallarda cəmiyyətin özü, öz aralarında və ya cəmiyyətlə öz korporativ hüquqlarının həyata keçirilməsi qaydasını və cəmiyyətin fəaliyyətinin təmin edilməsi və idarə edilməsi ilə bağlı məsələləri müəyyən edən korporativ müqavilə bağlaya bilərlər. Korporativ müqaviləyə əsasən həmin subyektlər öz hüquqlarını bu müqavilə ilə müəyyən edilmiş qaydada həyata keçirməyi və ya onların həyata keçirilməsindən çəkinməyi (imtina etməyi) öhdələrinə götürürlər.

65-1.2. Korporativ müqavilədə təsisçilərin (iştirakçıların) aşağıdakı məsələlərlə bağlı hüquq və vəzifələri bu Məcəllə ilə və digər normativ hüquqi aktlarla müəyyən edilmiş tələblərə zidd olmamaq şərtilə tənzimlənə bilər:

65-1.2.1. təsərrüfat cəmiyyətinin təsisçilərinin (iştirakçılarının) ümumi yığıncağında səsvermə qaydaları və şərtləri;

65-1.2.2. təsərrüfat cəmiyyətinin nizamnamə kapitalındakı payların (səhmlərin) özgəninkiləşdirilməsi qaydaları, müəyyən qiymətə və ya müəyyən hallar baş verdikdə həmin payların (səhmlərin) alınması, yaxud da onların əldə edilməsindən və ya özgəninkiləşdirilməsindən imtinanı, o cümlədən payların (səhmlərin) qiymətinin müəyyən edilməsi qaydasını və bu Məcəllənin 93-cü və 101-ci maddələrində nəzərdə tutulan qaydalardan fərqli olaraq bu Məcəllənin 65-2-ci maddəsində nəzərdə tutulan xüsusi hüquqların tətbiqi;

65-1.2.3. təsərrüfat cəmiyyətinin idarə edilməsi üzrə, o cümlədən cəmiyyətin idarəetmə orqanlarının formalaşdırılması və fəaliyyətinin təşkili üzrə şərtlər;

65-1.2.4. korporativ müqavilənin tərəfi olan təsərrüfat cəmiyyətinin təsisçilərinə (iştirakçılarına) məxsus payların (səhmlərin) tam mülkiyyət hüququnun korporativ müqavilədə nəzərdə tutulmuş hədəflərə çatmaqdan asılı olaraq tədricən yaranması qaydaları və şərtləri, o cümlədən həmin müddət bitənədək və ya hədəflərə çatılmadıqda payların (səhmlərin) cəmiyyət və ya digər iştirakçılar tərəfindən geri alınması mexanizmləri;

65-1.2.5. korporativ müqavilənin tərəfi olan və eyni zamanda təsərrüfat cəmiyyəti ilə əmək münasibətlərində olan təsisçinin (iştirakçının) onunla olan əmək münasibətlərinə xitam verilməsinin əsaslarından asılı olaraq paylarını (səhmlərini) digər iştirakçılara və ya cəmiyyətə geri satması və həmin satış üzrə qiyməti və şərtləri müəyyən edən müddəalar;

65-1.2.6. mübahisələrin həlli qaydası, tərəflər arasında fikir ayrılığı yarandıqda tətbiq ediləcək mübahisələrin həlli üsulları, o cümlədən arbitraj və tətbiq ediləcək hüquq barədə şərtlər;

65-1.2.7. cəmiyyətin idarə edilməsində korporativ müqavilə iştirakçıları üçün xüsusi əhəmiyyət kəsb edən məsələlərin (qorunan məsələlərin) siyahısı, habelə bu məsələlər üzrə qərar qəbulu və səsvermə qaydaları;

65-1.2.8. təsərrüfat cəmiyyətinin idarəetmə orqanlarına namizədlərin təyinatının razılaşdırılması və şərtləri, habelə müəyyən iştirakçıların nümayəndələrinin cəmiyyətin idarəetmə orqanlarının iclaslarında səs hüququ olmadan iştirak etmək və iclas materialları ilə tanış olmaq hüququ;

65-1.2.9. təsərrüfat cəmiyyətinə investisiya edilmiş vəsaitlərin istifadə istiqamətləri və xərclənməsinə nəzarət mexanizmləri;

65-1.2.10. payların (səhmlərin) özgəninkiləşdirilməsi zamanı payı (səhmi) əldə edən yeni iştirakçının (səhmdarın) həmin müqaviləyə qoşulması proseduru;

65-1.2.11. korporativ müqavilənin şərtlərinin pozulmasının hüquqi nəticələri;

65-1.2.12. korporativ müqavilə iştirakçılarının razılığı ilə müəyyən edilən və normativ hüquqi aktlara zidd olmayan digər şərtlər.

65-1.3. Korporativ müqavilə yazılı formada bağlanır və möhürlə (iştirakçı (səhmdar) hüquqi şəxs olduqda həmçinin onun möhürü ilə) təsdiqlənir. Korporativ müqavilənin notariat qaydasında təsdiqi tələb olunmur. Müqavilənin müddəaları yalnız onu imzalamış tərəflər üçün məcburi qüvvəyə malikdir və cəmiyyətin nizamnaməsinin müddəalarına zidd olduqda, müqaviləni imzalamış tərəflər arasındakı daxili münasibətlərdə korporativ müqavilənin müddəaları üstün hüquqi qüvvəyə malikdir (bir şərtlə ki, bu, normativ hüquqi aktlara zidd olmasın və üçüncü şəxslərin hüquqlarına xələl gətirməsin), cəmiyyət (tərəflərdən birinin təsərrüfat cəmiyyəti olduğu hallar istisna olmaqla) və üçüncü şəxslərlə münasibətlərdə isə nizamnamənin müddəaları tətbiq edilir.

65-1.4. Korporativ müqavilənin şərtlərinin pozulması müqavilənin digər tərəfləri üçün dəymiş zərərin ödənilməsinə və müqavilədə nəzərdə tutulmuş digər hüquqi nəticələrin yaranmasına səbəb olur.

65-1.5. Korporativ müqavilənin tərəfləri müqavilənin bağlanmasından sonra on beş gündən gec olmayaraq təsərrüfat cəmiyyətini bu barədə yazılı şəkildə məlumatlandırmağa borcludurlar.

65-1.6. Korporativ müqavilədə başqa hal nəzərdə tutulmayıbsa, müqavilə tərəflərindən birinin təsərrüfat cəmiyyətinin nizamnamə kapitalındakı paylarına (səhmlərinə) olan hüququna xitam verilməsi və ya müqavilədən çıxması müqavilənin digər tərəflər üçün qüvvədən düşməsinə səbəb olmur.

65-1.7. Korporativ müqavilə ilə ondan irəli gələn öhdəliklərin icrasının təmin edilməsi üsulları (dəbbə pulu, girov, zaminlik və s.) və belə öhdəliklərin icra edilməməsi və ya lazımınca icra edilməməsinə görə məsuliyyət müəyyən edilə bilər. Tərəflər həmçinin müqavilənin pozulmasına görə dəymiş zərərin ödənilməsini, cərimələrin tətbiqini və ya öhdəliyin naturada icrasını tələb etmək hüququnu nəzərdə tuta bilərlər.

65-1.8. Korporativ müqavilədə fərqli səs, dividend və ləğvetmə hüquqları verən aşağıdakı xüsusi hüquqlar müəyyən edilə bilər:

65-1.8.1. ləğvetmə və ya özgəninkiləşdirmə zamanı üstünlük: təsərrüfat cəmiyyəti ləğv edildikdə və ya nəzarət zərfinin və ya bütün aktivlərin satışı (özgəninkiləşdirilməsi) həyata keçirildikdə, səhmdar cəmiyyətində imtiyazlı səhmlərə, məhdud məsuliyyətli cəmiyyətdə isə nizamnamədə nəzərdə tutulmuş xüsusi hüquqlu paylara (səhmlərə) sahib olan təsisçilərin (iştirakçıların) öz qoyduqları vəsaiti (nizamnamədə və ya korporativ müqavilədə müəyyən edilmiş əmsalla) digər təsisçilərdən (iştirakçılardan) əvvəl geri almaq hüququ (səhmdar cəmiyyətlərində imtiyazlı səhmlərin hüquqi rejimi üzrə bu Məcəllənin 106.2-ci maddəsi ilə müəyyən edilmiş hallar nəzərə alınmaqla);

65-1.8.2. payın (səhmin) dəyərsizləşməsi əleyhinə müddəalar: təsərrüfat cəmiyyəti tərəfindən gələcəkdə pay (səhm) nominal dəyərindən aşağı olmamaqla, əvvəlki buraxılış (yerləşdirmə) qiymətindən daha aşağı yerləşdirmə qiyməti iləburaxıldıqda, müəyyən kateqoriya paylara (səhmlərə) sahib olan təsisçilərin (iştirakçıların) paylarının (səhmlərinin) dəyər itkisindən qorunması üçün konvertasiya qiymətinin və ya konvertasiya nisbətinin yenidən hesablanması mexanizmi;

65-1.8.3. xüsusi məsələlər: təsərrüfat cəmiyyətinin imtiyazlı səhmlərinə (paylarına) və (və ya) nizamnamə və ya korporativ müqavilə ilə nəzərdə tutulmuş xüsusi hüquqlu paylara (səhmlərə) sahib olan təsisçilərin (iştirakçıların) razılığı olmadan qəbul edilə bilməyəcək qərarların siyahısı və ya veto hüququ;

65-1.8.4. konvertasiya hüququ: imtiyazlı səhmləri (payları) istənilən zaman nizamnamədə müəyyən edilmiş şərtlərlə və nisbətdə adi səhmlərə (paylara) çevirmək;

65-1.8.5. təsərrüfat cəmiyyətinin fəaliyyətinə və digər təsisçilərin (iştirakçıların) hüquq və qanuni mənafelərinə əhəmiyyətli təsir göstərən qərarlar qəbul edildikdə, kiçik həcmdə paya (səhmə) malik olan təsisçilərin (iştirakçıların) hüquqlarının qorunması mexanizmləri, o cümlədən onlara öz paylarını (səhmlərini) ədalətli bazar qiymətinə satmaq və ya zəmanətli kompensasiya almaq hüququnun verilməsi;

65-1.8.6. ümumi yığıncaqda fərqli sayda səs vermək hüququnun müəyyən edilməsi, təsərrüfat cəmiyyətinin direktorlar şurasının (müşahidə şurasının) üzvlərinin seçilməsi və ya təyin edilməsi ilə bağlı xüsusi hüquqlar;

65-1.8.7. təsərrüfat cəmiyyəti tərəfindən yeni paylar (səhmlər) buraxıldıqda, müəyyən kateqoriya təsisçilərin (iştirakçıların) öz mülkiyyət paylarına (səhmlərinə) mütənasib şəkildə həmin payların (səhmlərin) əldə edilməsində üstünlük hüququnun bu Məcəllə ilə müəyyən edilmiş qaydada verilməsi.

65-1.9. Tərəflər, Azərbaycan Respublikasının rezidenti və ya qeyri-rezidenti olmalarından asılı olmayaraq, korporativ müqavilədə aralarında yaranacaq mübahisələrin həlli üzrə xarici dövlətin hüququnun tətbiq edilməsi barədə razılığa gələ bilərlər.

Maddə 65-2. Payın (səhmin) özgəninkiləşdirilməsi ilə bağlı xüsusi hüquqlar

65-2.1. Təsərrüfat cəmiyyətinin nizamnaməsi və ya iştirakçılar arasında bağlanmış korporativ müqavilə ilə payların (səhmlərin) özgəninkiləşdirilməsi ilə bağlı aşağıdakı xüsusi hüquqlar müəyyən edilə bilər:

65-2.1.1. birgə satış hüququ: təsərrüfat cəmiyyətinin nizamnamə kapitalında onun nizamnaməsi və ya korporativ müqavilə ilə müəyyən edilmiş həddən çox paya (səhmə) malik olan və öz paylarını (səhmlərini) üçüncü tərəfə satan təsisçi (iştirakçı) alış təklifi aldıqda, digər təsisçilərin (iştirakçıların) öz paylarını eyni şərtlərlə və eyni qiymətə həmin alıcıya satmaq hüququna dair şərt. Satıcı təsisçi (iştirakçı) bu barədə digər təsisçiləri (iştirakçıları) məlumatlandırmağa və onların da satışda iştirakını təmin etməyə borcludur;

65-2.1.2. məcburi satış hüququ: təsərrüfat cəmiyyətinin nizamnamə kapitalındanizamnamə və ya korporativ müqavilə ilə müəyyən edilmiş həddən çox paya (səhmə) malik olan təsisçi (iştirakçı) təsərrüfat cəmiyyətinin paylarının (səhmlərinin) hamısının və ya nəzarət zərfinin üçüncü şəxsə satışı (özgəninkiləşdirilməsi) barədəüçüncü şəxslə razılığa gəldikdə, digər təsisçiləri (iştirakçıları) öz paylarını (səhmlərini) eyni şərtlərlə və eyni qiymətə satmağa məcbur etmək hüququna dair şərt;

65-2.1.3. ilk imtina hüququ: açıq səhmdar cəmiyyətləri istisna olmaqla, digər təsərrüfat cəmiyyətlərinin hər hansı təsisçisi (iştirakçısı) öz payını (səhmini) üçüncü şəxsə satmaq niyyətində olduqda, həmin payı (səhmi) eyni şərtlərlə ilk növbədə təsərrüfat cəmiyyətinin nizamnaməsi və ya korporativ müqavilə ilə müəyyən edilmiş müəyyən kateqoriya təsisçisinə (iştirakçısına) təklif etməyə dair şərt.";

"88.3. Məhdud məsuliyyətli cəmiyyətin iştirakçılarının normativ hüquqi aktlarla müəyyən edilmiş qaydada aşağıdakı hüquqları vardır:

88.3.1. bu Məcəllə və cəmiyyətin təsis sənədləri ilə müəyyən edilmiş qaydada cəmiyyətin idarə edilməsində iştirak etmək, onun idarəetmə və icra orqanlarını seçmək və həmin orqanlara seçilmək;

88.3.2. normativ hüquqi aktlarda və cəmiyyətin təsis sənədlərində müəyyən edilmiş qaydada cəmiyyətin fəaliyyəti haqqında məlumat almaq, ildə bir dəfə onun illik hesabatı və maliyyə hesabatları ilə tanış olmaq;

88.3.3. mənfəətin bölüşdürülməsində iştirak etmək;

88.3.4. bu Məcəllə və cəmiyyətin nizamnaməsi ilə nəzərdə tutulmuş qaydada cəmiyyətin nizamnamə kapitalındakı payını və ya onun bir hissəsini bu cəmiyyətin bir və ya bir neçə iştirakçısına satmaq və ya başqa şəkildə güzəştə getmək;

88.3.5. bu Məcəllə və cəmiyyətin təsis sənədləri ilə nəzərdə tutulmuş qaydada digər iştirakçıların razılığından asılı olmayaraq istənilən vaxt cəmiyyətdən çıxmaq;

88.3.6. cəmiyyət ləğv edildiyi halda kreditorlarla hesablaşmalardan, hesablanmış, lakin ödənilməmiş dividendlər ödənildikdən sonra qalan əmlakın bir hissəsini və ya onun dəyərini almaq;

88.3.7. cəmiyyətin təsisçiləri (iştirakçıları) arasında onların hüquqlarının bu Məcəllə ilə müəyyən edilmiş qaydada həyata keçirilməsi barədə korporativ müqavilə bağlamaq;

88.3.8. cəmiyyətin ümumi yığıncağının çağırılmasını, ümumi yığıncağının gündəliyində dəyişikliklərin edilməsini və gündəliyə yeni müzakirə mövzularının əlavə olunmasını tələb etmək;

88.3.9. cəmiyyətin ümumi yığıncağında səsvermə hüququ ilə iştirak etmək (bu Məcəllənin 49-1.2-ci və 49-1.3-cü maddələrində nəzərdə tutulmuş hallar istisna olmaqla) və onun protokolunun surətini tələb etmək;

88.3.10. cəmiyyətin fəaliyyətinin təftiş komissiyası və ya auditor tərəfindən yoxlanılmasını tələb etmək;

88.3.11. cəmiyyətin xalis mənfəətindən dividend almaq;

88.3.12. icra orqanının və direktorlar şurasının (müşahidə şurasının) üzvlərinin səhlənkarlığına və cəmiyyətə qəsdən vurduğu zərərə görə məsuliyyətə cəlb edilməsini tələb etmək;

88.3.13. cəmiyyətin paylarının satışı prosesində iştirak etmək;

88.3.14. bağlanmış əqd nəticəsində cəmiyyətə və ya səhmdarlara dəyən zərərin və bununla bağlı məsrəflərin ödənilməsi barədə məhkəməyə və ya digər səlahiyyətli quruma müraciət etmək;

88.3.15. bağlanacaq əqdlərin (o cümlədən aidiyyəti şəxslərlə əqdlərin və xüsusi əhəmiyyətli əqdlərin) əlavələri ilə tanış olmaq;

88.3.16. bu Məcəllədə və cəmiyyətin nizamnaməsində nəzərdə tutulmuş digər hüquqlara malik olmaq.";

2.2. 90-cı maddə üzrə:

2.2.1. 90.2-ci maddənin birinci və ikinci cümlələrinə "Məhdud məsuliyyətli cəmiyyətin" sözlərindən sonra "(məhdud məsuliyyətli cəmiyyət formasında yaradılan vençur kapitalı fondu istisna olmaqla)" sözləri əlavə edilsin;

2.2.2. aşağıdakı məzmunda 90.3-2-ci maddə əlavə edilsin:

"90.3-2. Məhdud məsuliyyətli cəmiyyətin iştirakçılarına, idarəetmə orqanlarının üzvlərinə və ya işçilərinə həvəsləndirmə məqsədilə paylar bu Məcəllənin 404-5-ci maddəsinə uyğun olaraq bağlanmış işçilərin pay iştirakı planı haqqında müqavilə əsasında ödənişsiz verildikdə, bu Məcəllənin 90.3-cü maddəsi tətbiq edilmir.";

2.3. 90-1.2-ci maddəyə "Məhdud məsuliyyətli cəmiyyətin" sözlərindən sonra "(məhdud məsuliyyətli cəmiyyət formasında yaradılan vençur kapitalı fondu istisna olmaqla)" sözləri əlavə edilsin;

2.4. 95-ci maddə üzrə:

2.4.1. mətni 95.1-ci maddə hesab edilsin və həmin maddəyə "Məhdud məsuliyyətli cəmiyyətin" sözlərindən sonra "(məhdud məsuliyyətli cəmiyyət formasında yaradılan vençur kapitalı fondu istisna olmaqla)" sözləri əlavə edilsin;

2.4.2. aşağıdakı məzmunda 95.2-ci maddə əlavə edilsin:

"95.2. "İnvestisiya fondları haqqında" Azərbaycan Respublikasının Qanunu ilə müəyyən edilmiş hallarda, iştirakçının cəmiyyətdən çıxmaq hüququnun həyata keçirilməsi müddəti, hesablaşma vaxtı, şərtləri və qaydası cəmiyyətin nizamnaməsi ilə müəyyən edilə və məhdudlaşdırıla bilər.";

2.5. aşağıdakı məzmunda 103.4-2-ci maddə əlavə edilsin:

"103.4-2. Səhmdar cəmiyyətinin iştirakçılarına, idarəetmə orqanlarının üzvlərinə və ya işçilərinə həvəsləndirmə məqsədilə səhmlər bu Məcəllənin 404-5-ci maddəsinə uyğun olaraq bağlanmış işçilərin səhm iştirakı planı haqqında müqavilə əsasında ödənişsiz verildikdə, bu Məcəllənin 103.4-cü maddəsi tətbiq edilmir.";

2.6. 106-1.3.9-cu maddənin sonunda nöqtə işarəsi nöqtəli vergül işarəsi ilə əvəz edilsin və aşağıdakı məzmunda 106-1.3.10-cu maddə əlavə edilsin:

"106-1.3.10. cəmiyyətin səhmdarları arasında onların hüquqlarının bu Məcəllə ilə müəyyən edilmiş qaydada həyata keçirilməsi barədə korporativ müqavilə bağlamaq.";

2.7. 107-3.5-ci maddə aşağıdakı redaksiyada verilsin:

"107-3.5. Bu Məcəllənin 65-1.8.6-cı maddəsində nəzərdə tutulmuş hallar istisna olmaqla, səhmdarların ümumi yığıncağında səsvermə "bir səsli səhm - bir səsdir" prinsipi əsasında həyata keçirilir.";

2.8. aşağıdakı məzmunda 404-2 - 404-5-ci maddələr əlavə edilsin:

"Maddə 404-2. Konvertasiya edilən maliyyə alətləri

404-2.1. Təsərrüfat cəmiyyəti gələcəkdə əvvəlcədən müəyyən edilmiş hallar baş verdikdə, cəlb edilən vəsaitin cəmiyyətin payına (səhmlərinə) çevrilməsini (konvertasiyasını) nəzərdə tutan maliyyə alətlərindən istifadə edə bilər.

404-2.2. Konvertasiya edilən maliyyə alətləri borc öhdəliyi (konvertasiya edilən borc müqaviləsi) və ya borc öhdəliyi yaratmayan müqavilə (gələcək iştirak payı (səhm) haqqında müqavilələr) formasında ola bilər.

404-2.3. Konvertasiya edilən maliyyə alətlərinin tətbiqi nəzərdə tutulduğu hallarda, konvertasiya edilən maliyyə alətlərinin buraxılması və konvertasiyası qaydaları cəmiyyətin nizamnaməsi və ya cəmiyyətin iştirakçılarının ümumi yığıncağının qərarı ilə müəyyən edilə bilər.

404-2.4. Konvertasiya edilən maliyyə alətləri üzrə vəsait cəlb edən cəmiyyət, investorun tələbi ilə ona öz fəaliyyəti, maliyyə vəziyyəti və cəlb edilmiş vəsaitlərin istifadəsi haqqında mütəmadi olaraq, dövriliyi cəmiyyətin nizamnaməsi və ya korporativ müqavilə ilə müəyyən edilən qaydada hesabat təqdim edir.

404-2.5. Bu Məcəllənin 404-3-cü və 404-4-cü maddələrində nəzərdə tutulan alətlər (müqavilələr) və onlarda təsbit edilən hüquqlar konvertasiya edilənədək qiymətli kağız və ya törəmə maliyyə aləti hesab olunmur, onların bağlanması qiymətli kağızların emissiyası (kütləvi təklifi) sayılmır.

404-2.6. Cəmiyyət tərəfindən bağlanmış konvertasiya edilən maliyyə alətlərinin daxili reyestri aparılmalıdır. Konvertasiya baş verdikdə nizamnamə kapitalının artırılması və payların (səhmlərin) bölüşdürülməsi qanunvericiliklə müəyyən edilmiş ümumi qaydada dövlət qeydiyyatına alınır.

Maddə 404-3. Konvertasiya edilən borc müqaviləsi

404-3.1. Konvertasiya edilən borc müqaviləsi investordan cəmiyyətə borc qismində pul vəsaitinin verilməsini və müqavilədə göstərilən qaytarılma müddəti çatdıqda, yaxud cəmiyyət tərəfindən yeni investorlardan əlavə vəsaitin cəlb edildiyi maliyyələşmə mərhələsi (kvalifikasiyalı maliyyələşmə) baş verdikdə, həmin borcun (əsas məbləğ və faizlərin) qaytarılmaq əvəzinə tərəflərin razılaşdırdığı şərtlərlə cəmiyyətin paylarına (səhmlərinə) çevrilməsini nəzərdə tutan müqavilədir. Konvertasiya edilən borc müqaviləsi yazılı formada bağlanır və möhürlə (investor hüquqi şəxs olduqda həmçinin onun möhürü ilə) təsdiqlənir və onun notariat qaydasında təsdiqi tələb olunmur.

404-3.2. Borcun paya (səhmə) konvertasiyası zamanı ilkin investorun risklərini kompensasiya etmək üçün müqavilədə aşağıdakı qoruyucu mexanizmlərdən azı biri müəyyən edilməlidir:

404-3.2.1. qiymətləndirmənin yuxarı həddi - konvertasiya anında investorun əldə edəcəyi payın həcminin hesablanması üçün tətbiq edilən, cəmiyyətin dəyərinin müqavilə ilə əvvəlcədən razılaşdırılmış maksimal miqdarı;

404-3.2.2. endirim dərəcəsi - kvalifikasiyalı maliyyələşmə mərhələsində cəmiyyətə daxil olan yeni investorların bir pay (səhm) üçün ödədikləri qiymətə ilkin borcverən üçün tətbiq edilən güzəşt faizi.

404-3.3. Müqavilənin müddəti bitdikdə və paya çevrilməni şərtləndirən hadisə baş vermədikdə, investor öz seçimi ilə borcun (faizlərlə birlikdə) pul şəklində geri qaytarılmasını və ya borcun müqavilədə əvvəlcədən razılaşdırılmış qiymətləndirmə əsasında cəmiyyətin payına (səhmlərinə) çevrilməsini tələb edə bilər.

Maddə 404-4. Gələcək iştirak payı (səhm) haqqında müqavilə

404-4.1. Gələcək iştirak payı (səhm) haqqında müqavilə investorun cəmiyyətə pul vəsaiti ödəməsini, bunun müqabilində cəmiyyətin hər hansı borc öhdəliyi, faiz və ya ödəmə müddəti yaratmadan investora həmin vəsait müqabilində gələcəkdə cəmiyyətin paylarını (səhmlərini) almaq hüququ verməsini nəzərdə tutan müqavilədir. Gələcək iştirak payı (səhm) haqqında müqavilə yazılı formada bağlanır və möhürlə (investor hüquqi şəxs olduqda həmçinin onun möhürü ilə) təsdiqlənir və onun notariat qaydasında təsdiqi tələb olunmur.

404-4.2. Gələcək iştirak payı (səhm) haqqında müqavilə üzrə investorun vəsaitinin paya (səhmə) konvertasiyası cəmiyyətin nizamnamə kapitalını artıraraq yeni investorlara pay (səhm) satdığı yeni maliyyələşmə mərhələsi (kvalifikasiyalı maliyyələşmə) baş verdikdə və ya cəmiyyətin nəzarət zərfinin və ya bütün aktivlərinin satılması, cəmiyyətin başqa hüquqi şəxsə qoşulması, ləğvi kimi likvidlik hadisəsi baş verdikdə həyata keçirilir.

404-4.3. Gələcək iştirak payı (səhm) haqqında müqavilə üzrə paya (səhmə) çevrilmə zamanı investorun payının həcminin hesablanması tərəflərin razılaşdırdığı qiymətləndirmənin yuxarı həddi və (və ya) endirim dərəcəsi əsasında bu Məcəllənin 404-3.2-ci maddəsinə uyğun olaraq hesablanır. İnvestor bu iki şərtdən onun üçün daha sərfəli olanını seçmək hüququna malikdir.

404-4.4. Likvidlik hadisəsi (cəmiyyətin ləğvi və ya satışı) konvertasiyadan əvvəl baş verdikdə, bu müqavilə üzrə vəsaiti ödəmiş investorun ödəniş (investisiyanın geri qaytarılması) tələbləri cəmiyyətin digər təminatsız kreditorlarının tələblərindən sonra, lakin cəmiyyətin təsisçilərinə (iştirakçılarına, səhmdarlarına) qalıq əmlakın bölüşdürülməsindən əvvəl yerinə yetirilir.

Maddə 404-5. İşçilərin pay (səhm) iştirakı planı haqqında müqavilə

404-5.1. Təsərrüfat cəmiyyəti işçilərini və idarəetmə orqanının üzvlərini həvəsləndirmək məqsədilə, onlara cəmiyyətin paylarını (səhmlərini) gələcəkdə müəyyən edilmiş qiymətə (icra qiyməti) və ya ödənişsiz əsaslarla əldə etmək (almaq) hüququ verən pay (səhm) iştirakı planı haqqında müqavilələr bağlaya bilər. Müqavilə yazılı formada bağlanır və cəmiyyətin möhürü ilə təsdiqlənir və onun notariat qaydasında təsdiqi tələb olunmur.

404-5.2. Planın tərtibi tarixi, hüququn qüvvəyə minməsi şərtləri, icra qiyməti (payların (səhmlərin) güzəştli ödənişli əsaslarla əldə edilməsi nəzərdə tutulduğu hallarda) və müddəti müqavilədə aydın şəkildə göstərilməlidir. Cəmiyyət tərəfindən bağlanmış işçilərin pay (səhm) iştirakı planı müqavilələrinin daxili reyestri aparılmalıdır.

404-5.3. Bu müqavilələrin icrası üçün cəmiyyət nizamnamə kapitalının tərkibində səlahiyyət verilmiş (lakin buraxılmamış) xüsusi pay (səhm) fondu yarada bilər.".

Maddə 3. "Valyuta tənzimi haqqında" Azərbaycan Respublikası Qanununun (Azərbaycan Respublikası Ali Sovetinin Məlumatı, 1995, № 7, maddə 116; Azərbaycan Respublikasının Qanunvericilik Toplusu (Cild I); 2024, № 2, maddə 138, № 3, maddə 250; 2025, № 2, maddə 100, № 5, maddə 432) 11-ci maddəsində aşağıdakı dəyişikliklər edilsin:

3.1. birinci və ikinci hissələrə "Qeyri-rezidentlər" sözlərindən sonra ", o cümlədən rəqəmsal səyyahlar" sözləri əlavə edilsin;

3.2. aşağıdakı məzmunda 9-cu hissə əlavə edilisin:

"9. Vençur kapitalı fondları və akkreditə olunmuş investorlar tərəfindən Azərbaycan Respublikasından kənarda fəaliyyət göstərən innovativ layihələrdə (startaplarda) gələcək iştirak payının əldə edilməsi (gələcək iştirak payı (səhm) haqqında müqavilə, konvertasiya olunan borc və analoji maliyyə alətləri) məqsədilə investisiyaların qoyulması üzrə köçürmələr Mərkəzi Bankın müəyyən etdiyi qaydada və həddə həyata keçirilir.".

Maddə 4. "İnvestisiya fondları haqqında" Azərbaycan Respublikasının Qanununda (Azərbaycan Respublikasının Qanunvericilik Toplusu, 2010, № 11, maddə 950 (Cild I); 2025, № 4 (I kitab), maddələr 315, 318, № 5, maddə 432) aşağıdakı dəyişikliklər edilsin

4.1.  1.1-ci maddə üzrə:

4.1.1. aşağıdakı məzmunda 1.1.7-1 - 1.1.7-8-ci maddələr əlavə edilsin:

"1.1.7-1. vençur kapitalı fondu - fəaliyyətinin müstəsna predmeti investorların mənfəət əldə etməsi məqsədilə yalnız peşəkar investorlardan cəlb edilmiş pul vəsaitlərinin investisiya bəyannaməsinə uyğun olaraq investisiya edilməsi olan və aşağıdakı meyarlara cavab verən, habelə bu Qanunla nəzərdə tutulmuş təşkilati-hüquqi formalarda yaradılan investisiya fondudur:

1.1.7-1.1. əsas fəaliyyətinin investisiya qoyuluşundan ibarət olması və bu Qanunda nəzərdə tutulan hallar istisna olmaqla digər kommersiya fəaliyyəti həyata keçirməməsi;

1.1.7-1.2. fondun investorları üçün ortaq gəlir əldə etmək məqsədilə cəlb edilmiş kapitalı birləşdirməsi;

1.1.7-1.3. maliyyə və əməliyyat fəaliyyəti istiqamətlərinin müəyyən edilməsində, investisiya qərarların qəbulunda bütün təsisçilərin (iştirakçıların) birgə şəkildə davamlı iştirakının olmaması;

1.1.7-2. peşəkar investor - "Qiymətli kağızlar bazarı haqqında" Azərbaycan Respublikası Qanununun 1.0.7-ci maddəsi ilə müəyyən edilmiş institusional investorlar, iqtisadiyyatın, o cümlədən sahibkarlığın inkişafının maliyyələşdirilməsi və innovasiya fəaliyyətinin həyata keçirilməsi məqsədilə fəaliyyət göstərən dövlət adından yaradılan publik hüquqi şəxslər və ya paylarının (səhmlərinin) nəzarət zərfi dövlətə məxsus olan hüquqi şəxslər və ya bu Qanunun 1.1.7-3-cü maddəsində müəyyən edilmiş tələblərə cavab verən  akkreditə olunmuş investorlardır;

1.1.7-3. akkreditə olunmuş investor - bu Qanunun 9-1.3-cü maddəsində göstərilən fəaliyyətə vençur kapitalı fondu vasitəsilə investisiya edən, investisiya ilə bağlı riskləri dərk etmək üçün maliyyə təcrübəsinə və ya potensial itkiləri qarşılamaq üçün maliyyə imkanlarına malik olan və aşağıdakı meyarlardan azı birinə cavab verən fiziki və ya hüquqi şəxsdir:

1.1.7-3.1. son 2 ilin hər birində illik gəliri 150.000 (yüz əlli min) manatdan çox olan və cari ildə də eyni gəlir səviyyəsini əldə edəcəyini əsaslı şəkildə gözləyən fiziki şəxslər;

1.1.7-3.2. əsas yaşayış yeri olan daşınmaz əmlakının dəyəri istisna olmaqla, xalis maliyyə aktivlərinin dəyəri 500.000 (beş yüz min) manatdan çox olan fiziki şəxslər;

1.1.7-3.3. siyahısı Mərkəzi Bank tərəfindən müəyyən edilmiş sertifikatlara malik olan şəxslər;

1.1.7-3.4. xalis aktivlərinin dəyəri 5.000.000 (beş milyon) manatdan çox olan və ya bütün iştirakçıları bu Qanunun 1.1.7-3.1 - 1.1.7-3.3-cü maddələri ilə müəyyən edilmiş meyarlardan birinə cavab verən hüquqi şəxslər;

1.1.7-3.5. bütün iştirakçıları akkreditə olunmuş investorlardan ibarət olan hüquqi şəxslər;

1.1.7-3.6. vençur kapitalı fondunun idarəçisi (hüquqi şəxs olduqda isə onun rəhbər şəxsləri) və investisiya qərarlarının qəbulunda bilavasitə iştirak edən şəxslər;

1.1.7-4. azad hesabatlı vençur kapitalı fondu - bu Qanunun 9-2-ci maddəsində müəyyən edilmiş meyarlara cavab verən, fəaliyyəti üçün lisenziya tələb olunmayan və Mərkəzi Bank tərəfindən aparılan reyestrdə qeydə alınan vençur kapitalı fondudur;

1.1.7-5. lisenziyalaşdırılan vençur kapitalı fondu- bu Qanunun 9-3-cü maddəsinə uyğun olaraq Mərkəzi Bank lisenziyası əsasında fəaliyyət göstərən  vençur kapitalı fondudur;

1.1.7-6. idarə edilən aktivlərin həcmi - vençur kapitalı fondunun idarə etdiyi bütün aktivlərinin, o cümlədən cəlb edilmiş, lakin hələ investisiya edilməmişkapitalın və investorların ödənilməmiş kapital öhdəliklərinin bu Qanunun 9-1.7-ci maddəsinə əsasənhesablanan ümumi dəyəridir;

1.1.7-7. ödənilməmiş kapital öhdəliyi - vençur kapitalı fondunun təsis sənədlərinə (müqaviləsinə) əsasən fondun çağırışı əsasında investorun gələcəkdə fonda ödəməyi öhdəsinə götürdüyü, lakin hələ ödənilməmiş vəsaitin məbləğidir;

1.1.7-8.investorlardan pul vəsaitlərinin cəlb edilməsi - fond (və ya onun adından çıxış edən şəxs) tərəfindən kənar investorlardan (onların fondun təsisçisi qismində çıxış edib-etməməsindən asılı olmayaraq) investisiya məqsədilə fonda vəsaitin köçürülməsini (və ya bu barədə öhdəliyin götürülməsini) təmin etmək üçün həyata keçirilən fəaliyyətdir;";

4.1.2. 1.1.10-cu maddədə "şəxsdir" sözü "şəxs və ya investisiya şirkətləridir" sözləri ilə əvəz edilsin;

4.1.3. 1.1.17-ci maddəyə "müşahidə şurası" sözlərindən sonra "(olduqda)" sözü əlavə edilsin, "üzvlükdür" sözü "üzvlük və ya kommandit ortaqlığı formasında yaradılan vençur kapitalı fondunda işləri aparan tam ortaqdır (ortaqlardır)" sözləri ilə əvəz edilsin;

4.1.4. aşağıdakı məzmunda 1.2-ci maddə əlavə edilsin:

"1.2. Bu Qanunda xüsusi olaraq fərqləndirilmədikdə, bu Qanunun investisiya fondlarına, o cümlədən səhmdar investisiya fondlarına, qapalı paylı investisiya fondlarına, onların idarəçilərinə, depozitarlarına və investorlarına dair müddəaları (bu Qanunun 42-ci və 43-cü maddələri istisna olmaqla) vençur kapitalı fondlarına, onların idarəçilərinə, depozitarlarına və peşəkar investorlarına da şamil edilir. Bu Qanunun lisenziyalaşdırmaya, habelə prudensial tənzimləməyə və nəzarətə dair müddəaları yalnız lisenziyalaşdırılan vençur kapitalı fondlarına şamil edilir. Azad hesabatlı vençur kapitalı fondlarının fəaliyyəti bu Qanunun II-I fəslində nəzərdə tutulmuş rejimə əsasən tənzimlənir.";

4.2. 3-cü maddə üzrə:

4.2.1. aşağıdakı məzmunda 3.2-1-ci maddə əlavə edilsin:

"3.2-1. Vençur kapitalı fondunun adında "vençur kapitalı fondu" sözləri olmalıdır. Hüquqi şəxs statusu almaq istəyən azad hesabatlı vençur kapitalı fondunun dövlət qeydiyyatına alınması və ya mövcud hüquqi şəxsin nizamnaməsində (adında) dəyişiklik edilməsi zamanı bu sözlərdən istifadə edilməsi üçün Mərkəzi Bankın ilkin razılığı alınmalıdır. İlkin razılığın alınması qaydası Mərkəzi Bankın qəbul etdiyi normativ xarakterli aktlarla müəyyən edilir.";

4.2.2. 3.3-cü maddəyə "İnvestisiya fondu" sözlərindən sonra "və ya "Vençur kapitalı fondu" sözləri, "fondları" sözündən sonra "(vençur kapitalı fondları)" sözləri əlavə edilsin və həmin maddədə "qanunvericiliyinə müvafiq" sözləri "normativ hüquqi aktlarına uyğun" sözləri ilə əvəz edilsin;

4.3. aşağıdakı məzmunda II-I fəsil əlavə edilsin:

"II-I fəsil

Vençur kapitalı fondunun fəaliyyət rejimləri və fəaliyyətinin tənzimlənməsi

Maddə 9-1. Vençur kapitalı fonduna dair ümumi müddəalar

9-1.1. Vençur kapitalı fondunun nizamnaməsində və ya onun təsis sənədlərində fondun fəaliyyətinin müstəsna predmetinin cəlb edilən vəsaitlərinin 70 faizindən az olmayan hissəsinin bu Qanunun 9-1.3-cü maddəsində göstərilən məqsədlərə yatırılmasından ibarət olduğu göstərilməlidir. Qalan vəsait likvidliyin idarə edilməsi məqsədilə digər maliyyə alətlərinə yatırıla bilər.

9-1.2. Vençur kapitalı fondları bu Qanunun II-I fəslinə uyğun olaraq azad hesabatlı vençur kapitalı fondu və ya lisenziyalaşdırılan vençur kapitalı fondu rejimində fəaliyyət göstərirlər. Vençur kapitalı fondu məhdud məsuliyyətli cəmiyyət, qapalı səhmdar cəmiyyəti, kommandit ortaqlığı və ya qapalı paylı investisiya fondu formasında yaradıla bilər. Vençur kapitalı fondu sahibkarlıq fəaliyyətinin digər növləri ilə məşğul ola bilməz.

9-1.3. Vençur kapitalı fondu investorlardan cəlb olunmuş pul vəsaitlərinin yalnız rəqəmsal texnologiyaların və innovasiya məhsulunun (iqtisadi və ya sosial səmərə əldə etmək məqsədilə yeni yaradılmış və ya təkmilləşdirilmiş məhsul (iş, xidmət), texnoloji proses, həmçinin ictimai münasibətlərin müxtəlif sahələrində (təşkilati-texniki, maliyyə-iqtisadi və digər sahələrdə) tətbiq edilən inzibati, kommersiya, texnoloji və digər xarakterli yeniliklər) hazırlanması, istehsalı və təkmilləşdirilməsini həyata keçirən, mikro, kiçik və orta sahibkarlıq subyekti olan, habelə Azərbaycan Respublikasında "Startap" şəhadətnaməsini və ya texnologiyalar parkının və texnoloji biznes inkubatorunun və ya sənaye və azad iqtisadi zonaların qeydiyyat şəhadətnaməsini alan sahibkarların innovativ layihələrinə bu Qanunla müəyyən edilmiş qaydada  yatırılması ilə məşğul olur.

9-1.4. Vençur kapitalı fondunun borc götürməsinə dair məhdudiyyətlər fondun rejimindən asılı olaraq aşağıdakı kimi müəyyən edilir:

9-1.4.1. azad hesabatlı vençur kapitalı fondu yalnız qısamüddətli likvidlik ehtiyaclarını (investisiyaların maliyyələşdirilməsi və ya əməliyyat xərclərinin ödənilməsi) ödəmək məqsədilə borc götürə bilər. Ümumi borc öhdəlikləri fondun ümumi kapital öhdəliklərinin (cəlb edilmiş və ödənilməmiş kapital öhdəliklərinin cəmi) 30 faizindən çox, hər borcun müddəti isə 12 aydan artıq ola bilməz;

9-1.4.2. lisenziyalaşdırılan vençur kapitalı fondu aktivlərinin 10 faizini keçməyən məbləğdə və üç aydan artıq olmayan müddətə borc götürə bilər.

9-1.5. Lisenziyalaşdırılan vençur kapitalı fondunun nizamnamə (şərikli) kapitalının minimum miqdarı və nizamnamə (şərikli) kapitalının formalaşdırması qaydaları Mərkəzi Bank tərəfindən müəyyən edilir.

9-1.6. Vençur kapitalı fondunun pay mülkiyyətçilərinin (səhmdarlarının) reyestri mərkəzi depozitar tərəfindən aparılır.

9-1.7. Vençur kapitalı fondu ildə azı bir dəfə idarə edilən aktivlərin həcmini hesablamalıdır. İdarə edilən aktivlərin həcminin hesablanması qaydası Mərkəzi Bank tərəfindən müəyyən edilir.

9-1.8. Vençur kapitalı fondu öz investisiyalarını Azərbaycan Respublikasında, həmçinin "Valyuta tənzimi haqqında" Azərbaycan Respublikası Qanunun tələbləri nəzərə alınmaqla Azərbaycan Respublikasından kənarda həyata keçirə bilər.

9-1.9. Vençur kapitalı fondu tərəfindən hüquqi şəxs təsis edildikdə, 5 iş günü müddətində Mərkəzi Banka məlumat verir.

9-1.10. Vençur kapitalı fondunun fəaliyyət müddətinin uzadılması, idarəçisinin dəyişdirilməsi, habelə idarəçi tərəfindən əvvəlki fondun fəaliyyət müddəti bitdikdən və ya kapitalının (fondun təsis sənədlərində və ya idarə edilməsi qaydalarında müəyyən edilmiş hissəsinin) investisiya edilməsindən sonra yeni varis vençur kapitalı fondunun təsis edilməsi məhdudiyyətləri bu Qanunun tələbləri nəzərə alınmaqla fondun nizamnaməsi, paylı investisiya fondunun idarə edilməsi qaydaları və (və ya) investisiya bəyannaməsi ilə müəyyən edilir. Vençur kapitalı fondunun fəaliyyət müddətinin uzadılması və idarəçinin dəyişdirilməsi investorların (səhmdarların, pay mülkiyyətçilərinin, iştirakçıların) razılığı əsasında həyata keçirilir. Bu maddədə göstərilən hallar baş verdikdə bu barədə 5 (beş) iş günü müddətində Mərkəzi Banka yazılı məlumat verilməlidir.

9-1.11. Yeni varis vençur kapitalı fondu bu Qanunla müəyyən edilmiş qaydada Mərkəzi Bank tərəfindən reyestrdə qeydə alınmalı və ya lisenziya almalıdır.

Maddə 9-2. Azad hesabatlı vençur kapitalı fondu rejimi və meyarları

9-2.1. Azad hesabatlı vençur kapitalı fondu aşağıdakı meyarların hamısına cavab verdikdə azad hesabatlı vençur kapitalı fondu rejimində fəaliyyət göstərə bilər:

9-2.1.1. bu Qanunun 9-1.7-ci maddəsi nəzərə alınmaqla, idarə etdiyi aktivlərin həcmi 50 (əlli) milyon manat ekvivalentini keçmirsə;

9-2.1.2. investorlarının ümumi sayı əllidən çox deyilsə (fondun təşkilati-hüquqi forması üçün normativ hüquqi aktlarda daha az say müəyyən edildiyi hallar istisna olmaqla).

9-2.2. Azad hesabatlı vençur kapitalı fondunun fəaliyyəti lisenziyalaşdırılmır. Azad hesabatlı vençur kapitalı fondu fəaliyyətə başlamazdan əvvəl Mərkəzi Bank tərəfindən bu Qanunun 9-6-cı maddəsində müəyyən edilmiş qaydada reyestrdə qeydə alınmalıdır.

9-2.3. Azad hesabatlı vençur kapitalı fondu Mərkəzi Banka illik əsasda bu Qanunun 9-7-ci maddəsində müəyyən edilmiş məzmunda hesabat təqdim etməlidir.

Maddə 9-3. Lisenziyalaşdırılan vençur kapitalı fondu rejimi və meyarları

9-3.1. Bu Qanunun 9-2.1-ci maddəsində nəzərdə tutulan meyarlara cavab verməyən vençur kapitalı fondu yalnız lisenziyalaşdırılan vençur kapitalı fondu rejimində fəaliyyət göstərə bilər. Vençur kapitalı fondu həmçinin könüllü olaraq lisenziyalaşdırılan vençur kapitalı fondu rejimində fəaliyyət göstərmək barədə qərar qəbul edə bilər.

9-3.2. Lisenziyalaşdırılan vençur kapitalı fondu bu Qanunun VIII fəslinə uyğun olaraq Mərkəzi Bankdan lisenziya almalıdır.

Maddə 9-4. Vençur kapitalı fondunun fəaliyyət rejiminin dəyişdirilməsi

9-4.1. Azad hesabatlı vençur kapitalı fondu bu Qanunun 9-1.7-ci maddəsində qeyd edilən hesablamanı həyata keçirərkən bu Qanunun 9-2.1-ci maddəsində  nəzərdə tutulan meyarlara uyğun olmadığı təqdirdə, bu barədə 10 iş günü ərzində Mərkəzi Banka və investorlarına məlumat verməli və bu halın baş verdiyi tarixdən etibarən 90  təqvim günü (keçid dövrü) ərzində lisenziyalaşdırılan vençur kapitalı fondu lisenziyası almaq üçün Mərkəzi Banka müraciət etməlidir.

9-4.2. Keçid dövründə fond yeni investor cəlb edə bilməz, lakin mövcud investisiya fəaliyyətini, o cümlədən mövcud investorlardan ödənilməmiş kapital öhdəliklərini tələb etməyi və mövcud portfel şirkətlərinə əlavə investisiyalar etməyi davam etdirə bilər.

9-4.3. Mərkəzi Bank əsaslandırılmış müraciət əsasında keçid dövrünü əlavə 90 təqvim günədək uzada bilər.

9-4.4. Bu Qanunun 9-4.1-ci maddəsində göstərilən müddət ərzində lisenziya üçün müraciət edilmədikdə və ya ona lisenziya verilməsindən bu Qanunla nəzərdə tutulmuş hallarda imtina edildikdə vençur kapitalı fondu fəaliyyətini dayandırmalı, Mərkəzi Bank isə azad hesabatlı vençur kapitalı fondunu reyestrdən çıxarılma barədə qərar qəbul etməli və bu barədə məlumatı reyestrdən qeydi çıxarılmış azad hesabatlı vençur kapitalı fonduna və ya onun idarəçisinə, onun depozitarına və vergi orqanlarına dərhal göndərməli və mediada dərc etdirməlidir.

9-4.5. Reyestrdə müvafiq qeydi ləğv edilmiş azad hesabatlı vençur kapitalı fondunun təsisçiləri (iştirakçıları, səhmdarları, tam ortaqları) Mərkəzi Bankın qərarının qəbul edildiyi tarixdən 30 (otuz) təqvim günü müddətində Azərbaycan Respublikası Mülki Məcəlləsinin 59.2.1-ci maddəsinə uyğun olaraq fondun ləğv edilməsi və ya adından "vençur kapitalı fondu" sözləri çıxarılmaqla fəaliyyət predmetinin dəyişdirilməsi barədə qərar qəbul etməlidirlər. Bu müddət ərzində müvafiq qərar qəbul edilmədikdə, müvafiq icra hakimiyyəti orqanının müəyyən etdiyi orqan (qurum) həmin hüquqi şəxsin məhkəmə qaydasında məcburi ləğv edilməsi tələbi ilə iddia qaldırır.

Maddə 9-5. Vençur kapitalı fondunun idarəçilərinə dair tələblər

9-5.1. Vençur kapitalı fondu daxili idarəetmə formasında (fondun  icra orqanı və ya tam ortaq tərəfindən) və ya kənar idarəçi cəlb etməklə idarə oluna bilər.

9-5.2. Lisenziyalaşdırılan vençur kapitalı fondunun idarə edilməsi kənar idarəçi tərəfindən həyata keçirildikdə , həmin kənar idarəçi bu Qanunun IV və VIII fəsillərinə uyğun olaraq investisiya fondlarının idarə edilməsi üzrə lisenziyaya malik olan şəxs olmalıdır.

9-5.3. İdarəçi vençur kapitalı fondunun nizamnamə (şərikli) kapitalının və ya investorların cəlb edilmiş kapital öhdəliklərinin azı 1 - 5 faizinə bərabər məbləğdə öz vəsaiti ilə fondda iştirak etməlidir.

9-5.4. Azad hesabatlı vençur kapitalı fondunun idarə edilməsi üçün bu Qanunla   nəzərdə tutulmuş investisiya fondlarının idarə edilməsi üzrə lisenziya tələb olunmur. Aşağıdakı tələblərə cavab verən idarəçi (fondun icra orqanı və ya tam ortaq istisna olmaqla) fondun reyestrə qeydə alınması zamanı Mərkəzi Bank tərəfindən aparılan reyestrdə qeydə alınmalıdır:

9-5.4.1. idarəçinin nizamnamə kapitalı azı 50.000 manat olmalı və ya 3 aylıq əməliyyat xərclərini qarşılamaq üçün kifayət edən likvid aktivlərə malik olmalıdır (hansı daha yüksəkdirsə);

9-5.4.2. idarəçinin rəhbər şəxsləri (və ya tam ortaqlar) bu Qanunun 40-cı maddəsində nəzərdə tutulan məqbul və lazımi keyfiyyətlərə malik olmalıdırlar.

9-5.5. Bu Qanunun 9-5.4-cü maddəsinə əsasən idarəetməni həyata keçirən şəxsin reyestrdə qeydə alınması bu Qanunun 9-6.3 - 9-6.11-ci maddələrində qeyd edilmiş qaydada aparılır.

9-5.6. Azad hesabatlı vençur kapitalı fondunun idarəçisi eyni zamanda ondan artıq vençur kapitalı fondunu idarə edə bilməz.

Maddə 9-6. Azad hesabatlı vençur kapitalı fondunun reyestri

9-6.1. Bu Qanunun 3.2-1-ci maddəsinin tələbləri nəzərə alınmaqla, azad hesabatlı vençur kapitalı fondu (və ya onun idarəçisi) tərəfindən fəaliyyətə başlamazdan əvvəl Mərkəzi Bankda reyestrdə qeydə alınmaq üçün ərizə və aşağıdakı sənədlər (məlumatlar) təqdim edilməlidir:

9-6.1.1. fondun və idarəçinin (kənar idarəçi olduqda) təsis sənədlərinin surətləri;

9-6.1.2. fondun investisiya bəyannaməsi və ya əsas investisiya şərtlərini əks etdirən sənəd;

9-6.1.3. idarəçinin bu Qanunun 9-5.3-cü və 9-5.4-cü maddələrinin tələblərinə uyğunluğunu təsdiq edən məlumatlar (rəhbər şəxslər və kapital (likvidlik) barədə).

9-6.2. Bu maddədə nəzərdə tutulmuş sənədlərin və məlumatların Elektron Hökumət İnformasiya Sistemi vasitəsilə müvafiq dövlət orqanından (qurumundan) əldə edilməsi mümkün olduqda, həmin sənədlər və məlumatlar müraciət edəndən tələb edilmir. Belə sənədlərin və məlumatların Elektron Hökumət İnformasiya Sistemi vasitəsilə əldə edilməsi mümkün olmadığı hallarda onların təqdim edilməsi müraciət edənin razılığı ilə sorğu əsasında müvafiq dövlət orqanından (qurumundan) tələb olunur və ya müraciət edən tərəfindən təmin edilir.

9-6.3. Mərkəzi Bank təqdim edilmiş sənədlərə 15 iş günü ərzində baxır.

9-6.4. Sənədlərdə və ya məlumatlarda çatışmazlıq aşkar edildikdə, ərizənin qeydiyyata alındığı tarixdən 3 iş günündən gec olmayaraq Mərkəzi Bank bu barədə məlumatı müraciət edənə təqdim edir. Bütün çatışmazlıqlar müraciət edənə eynizamanda bildirilməlidir.

9-6.5. Müraciət edən həmin çatışmazlıqları məlumatı aldığı vaxtdan ən geci 10 iş günü ərzində aradan qaldırmalıdır. Bu zaman azad hesabatlı vençur kapitalı fondunun reyestrdə qeydə alınması ilə bağlı müddətin axımı dayandırılır və dayandırılmış müddət reyestrdə qeydə alınma müddətinə daxil edilmir. Çatışmazlıqların aradan qaldırılması barədə müraciət edənin müraciətindən sonra müddətin axımı bərpa olunur.

9-6.6. Müraciət edən ərizədə və ona əlavə edilmiş sənədlərdə və məlumatlarda aşkar olunmuş çatışmazlıqları bu Qanunun 9-6.5-ci maddəsində göstərilən müddətdə aradan qaldırmadıqda ərizə baxılmamış saxlanılır və bu barədə məlumatı 2 iş günü müddətində müraciət edənə təqdim edilir.

9-6.7. Müraciət edən aşkar olunmuş çatışmazlıqları aradan qaldırdıqdan sonra reyestrdə qeydə alınma üçün təkrar ərizə ilə Mərkəzi Banka müraciət edə bilər. Bu halda müraciətə yeni müraciət kimi baxılır.

9-6.8. Təqdim edilən sənədlərdə və məlumatlarda çatışmazlıq olmadıqda, Mərkəzi Bank fondu azad hesabatlı vençur kapitalı fondu reyestrinə daxil edir və bu barədə 5 iş günü müddətində fonda yazılı bildiriş göndərir.

9-6.9. Mərkəzi Bank aşağıdakı hallarda fondu azad hesabatlı vençur kapitalı fondu kimi reyestrdə qeydə almaqdan imtina edir:

9-6.9.1. ərizədə və ona əlavə olunmuş sənədlərdə bu Qanunun 9-6.1-ci maddəsində nəzərdə tutulmuş tələblərə uyğun olmayan məlumatlar olduqda (bu Qanunun 9-6.4-ci maddəsində nəzərdə tutulmuş hal istisna olmaqla);

9-6.9.2. çatışmazlıqların aradan qaldırılması barədə müraciət edən müraciətindən sonra çatışmazlıqların aradan qaldırılmadığı müəyyən edildikdə.

9-6.10. Fondu azad hesabatlı vençur kapitalı fondu kimi reyestrdə qeydə alınmasından imtina haqqında Mərkəzi Bankın qərarını aldıqdan sonra müraciət edənlər inzibati qaydada və məhkəməyə şikayət edə bilərlər.

Maddə 9-7. Azad hesabatlı vençur kapitalı fondunun hesabatlılığı

9-7.1. Azad hesabatlı vençur kapitalı fondu Mərkəzi Banka hesabat təqdim etməlidir.

9-7.2. Hesabatda aşağıdakı məlumatlar göstərilir:

9-7.2.1. hesabat dövrünün sonuna bu Qanunun 9-1.7-ci maddəsinə uyğun hesablanmış idarə edilən aktivlərin həcmi və komponentləri;

9-7.2.2. investorların ümumi sayı və onların hamısının peşəkar investor olduğuna dair təsdiqedici sənədlər;

9-7.2.3. investisiya portfeli haqqında icmal məlumat (əsas investisiya sahələri və coğrafi bölgüsü);

9-7.2.4. fondun borclanma səviyyəsi və bu Qanunun 9-1.4.1-ci maddəsinin tələblərinə uyğunluğunu təsdiq edən sənədlər.

9-7.3. Azad hesabatlı vençur kapitalı fondu bu Qanunun 9-7.2.1-ci maddəsində nəzərdə tutulan məlumatları hər təqvim ili üzrə növbəti ilin birinci rübü ərzində, bu Qanunun 9-7.2.2 - 9-7.2.4-cü maddələrində nəzərdə tutulan məlumatları isə yarımildə bir dəfə (avqust və fevral aylarında), habelə bu Qanunun 9-7.6.2-ci maddəsində investorlara təqdim olunması nəzərdə tutulan illik maliyyə hesabatlarını Mərkəzi Banka təqdim edir.

9-7.4. Hesabatın forması Mərkəzi Bank tərəfindən müəyyən edilir.

9-7.5. Azad hesabatlı vençur kapitalı fondu investisiya strategiyası, risklər, xərclər və kapital itkisi ehtimalı barədə investorları yazılı şəkildə məlumatlandırmalı və onlardan bu riskləri qəbul etdiklərinə dair yazılı təsdiq almalıdır. İnvestorlara təqdim edilən bütün təklif sənədlərində və marketinq materiallarında fondun fəaliyyət rejimi, o cümlədən azad hesabatlı vençur kapitalı fondunun lisenziyalaşdırılmamış statusu barədə investorlara aydın şəkildə məlumat verilməlidir.

9-7.6. Azad hesabatlı vençur kapitalı fondu investorlarına aşağıdakı dövrilikdə və məzmunda hesabat təqdim etməlidir:

9-7.6.1. rüblük əsasda aktivlərin xalis dəyəri, idarəetməsində olan müəssisələrin vəziyyəti və idarəetmə xərcləri barədə hesabat;

9-7.6.2. illik əsasda Maliyyə Hesabatlarının Beynəlxalq Standartlarına uyğun hazırlanmış və kənar auditor tərəfindən təsdiq edilmiş maliyyə hesabatları və idarə edilən aktivlərin həcmi barədə məlumat.

Maddə 9-8. Azad hesabatlı vençur kapitalı fonduna dair nəzarət mexanizmləri

9-8.1. Mərkəzi Bankın azad hesabatlı vençur kapitalı fondu üzərində nəzarəti bu Qanunun 9-7-ci maddəsinə əsasən təqdim edilən illik hesabatların monitorinqi vasitəsilə həyata keçirilir.

9-8.2. Mərkəzi Bank azad hesabatlı vençur kapitalı fondunda və ya onun idarəçisində yalnız aşağıdakı hallarda "Azərbaycan Respublikasının Mərkəzi Bankı haqqında" Azərbaycan Respublikasının Qanununa uyğun olaraq yoxlama apara bilər:

9-8.2.1. fondun azad hesabatlı vençur kapitalı fondu meyarlarını pozduğuna dair əsaslı şübhələr olduqda;

9-8.2.2. fondun fəaliyyətində investorların və digər üçüncü şəxslərin hüquqlarının pozulması barədə şikayət və ya məlumat daxil olduqda.

Maddə 9-9. Akkreditə olunmuş investor statusunun yoxlanılması qaydaları

9-9.1. Vençur kapitalı fondu, investorun akkreditə olunmuş investor statusunu müəyyən etmək üçün onun tərəfindən imzalanmış yazılı bəyannaməyə əsaslana bilər. Bəyannamədə investorun bu Qanunun 1.1.7-3-cü maddəsindəki hansı meyara (meyarlara) cavab verdiyi göstərilməlidir. Fondun bu bəyanatın yanlış olduğuna dair faktiki məlumatı olduqda, investorun ona əsaslanmasına yol verilmir.

9-9.2. Vençur kapitalı fondu investorların akkreditə olunmuş investor statusunu yoxlamaq üçün investorlar tərəfindən aşağıdakı sənədlərdən  azı biri təqdim edilir:

9-9.2.1. fiziki şəxslərin gəlirlərini və ya xalis aktivlərini təsdiq edən rəsmi sənədlər (vergi bəyannamələri, bank (depozitar) çıxarışları, əmlak qiymətləndirmə hesabatları);

9-9.2.2. hüquqi şəxslərin audit yoxlamasından keçmiş maliyyə hesabatları;

9-9.2.3. investorun akkreditə olunmuş investor statusunu göstərən auditor rəyi.

9-9.3. Akkreditə olunmuş investor statusunun yoxlanılmasına dair sənədlər fond tərəfindən azı 5 il müddətində saxlanılmalıdır.

9-9.4. Fəaliyyətlərin dəstəklənməsi və əlaqələndirilməsi habelə ümumi mənafelərinin (əmlak mənafeləri daxil olmaqla) təmsil və müdafiə edilməsi (o cümlədən, müəssisə, idarə və təşkilatlarda, dövlət orqanlarında (qurumlarında), beynəlxalq təşkilatlarda) məqsədilə akkreditə olunmuş investor statusuna malik şəxslər qeyri-kommersiya hüquqi şəxsi formasında (akkreditə olunmuş investor birlikləri) birləşə bilər.

Maddə 9-10. Qapalı səhmdar cəmiyyəti formasında yaradılan vençur kapitalı

fondunun təşkili və fəaliyyəti

9-10.1. Qapalı səhmdar cəmiyyəti formasında yaradılan vençur kapitalı fondu azı üç hüquqi və (və ya) fiziki şəxs tərəfindən yaradılır.

9-10.2. Qapalı səhmdar cəmiyyəti formasında yaradılan vençur kapitalı fondunun təsisçilərinin (iştirakçılarının) ümumi sayı əllidən çox ola bilməz.

9-10.3. Qapalı səhmdar cəmiyyəti formasında yaradılan vençur kapitalı fondu bu Qanunun 9-2-ci və 9-3-cü maddələrinə uyğun olaraq azad hesabatlı vençur kapitalı fondu və ya lisenziyalaşdırılan vençur kapitalı fondu rejimində fəaliyyət göstərə bilər.

9-10.4. Qapalı səhmdar cəmiyyəti formasında yaradılan vençur kapitalı fondunun iştirakçıları (səhmdarları) onun öhdəlikləri üçün cavabdeh deyildirlər və cəmiyyətin fəaliyyəti ilə bağlı zərər üçün onlara mənsub səhmlərin dəyəri həddində risk daşıyırlar.

Maddə 9-11. Qapalı səhmdar cəmiyyəti formasında yaradılan vençur kapitalı fondunda idarəetmə

9-11.1. Qapalı səhmdar cəmiyyəti formasında yaradılan vençur kapitalı fondunun səhmdarlarının ümumi yığıncağının müstəsna səlahiyyətlərinə Azərbaycan Respublikası Mülki Məcəlləsinin 107.1-ci maddəsi ilə nəzərdə tutulmuş səlahiyyətlərdən əlavə aşağıdakılar aiddir:

9-11.1.1. idarəçinin və ya depozitarın dəyişdirilməsi barədə qərarın qəbul edilməsi;

9-11.1.2. fondun xərclərinin artırılması barədə qərarın qəbul edilməsi.

9-11.2. Qapalı səhmdar cəmiyyəti formasında yaradılan vençur kapitalı fondunun səhmdarlarının ümumi yığıncağında iştirak etmək hüququna malik olan şəxslərin siyahısı vençur kapitalı fondunun səhmdarlarının reyestri əsasında müəyyənləşdirilir. Həmin siyahı səhmdarların ümumi yığıncağının keçirilməsi tarixinədək 60 gündən gec və 45 gündən tez olmayan müddətdə tərtib edilməlidir.

9-11.3. Qapalı səhmdar cəmiyyəti formasında yaradılan vençur kapitalı fondunun səhmdarların ümumi yığıncağının çağırılmasına azı 45 gün qalmış bu barədə məlumat verilməli, habelə tərtib edilmiş siyahı əsasında səhmdarlara, idarəçiyə, depozitara, həmçinin lisenziyalaşdırılan vençur kapitalı fondu tərəfindən Mərkəzi Banka yazılı bildiriş göndərilməlidir.

9-11.4. Qapalı səhmdar cəmiyyəti formasında yaradılan vençur kapitalı fondu ilə müvafiq müqavilələr bağlamış idarəçinin, depozitarın, auditorun və qiymətləndiricinin əməkdaşları, habelə onlara aidiyyəti olan şəxslər vençur kapitalı fondunun icra orqanının üzvü ola bilməzlər.

9-11.5. Qapalı səhmdar cəmiyyəti formasında yaradılan vençur kapitalı fondunun idarəetmə orqanlarının səlahiyyətləri, onların qərarları qəbul etmə prosedurları, o cümlədən barəsində qərarların yekdilliklə və ya şərtləşdirilmiş səs çoxluğu ilə qəbul edildiyi məsələlər səhmdar cəmiyyətlərə dair müvafiq normativ hüquqi aktlarla tənzimlənir.

9-11.6. Qapalı səhmdar cəmiyyəti formasında yaradılan vençur kapitalı fondunun icra orqanının üzvlərinin şəxsi marağı ilə vençur kapitalı fondunun maraqları arasında ziddiyyətlərə gətirib çıxara bilən hallarda məlumat verilməsi, habelə vençur kapitalı fondunun maraqlarına zidd olan əqdlərin bağlanması Azərbaycan Respublikasının Mülki Məcəlləsinin 107-10.5-ci maddəsinin tələblərinə uyğun olaraq həyata keçirilir.

Maddə 9-12. Qapalı səhmdar cəmiyyəti formasında yaradılan vençur kapitalı

fondunun investisiya bəyannaməsi

9-12.1. Qapalı səhmdar cəmiyyəti formasında yaradılan vençur kapitalı fondunun investisiya bəyannaməsi fondun təsis yığıncağının qərarı ilə, fond yaradıldıqdan sonra isə səhmdarların ümumi yığıncağının qərarı ilə qəbul edilir.

9-12.2. Qapalı səhmdar cəmiyyəti formasında yaradılan vençur kapitalı fondunun investisiya bəyannaməsində aşağıdakılar göstərilir:

9-12.2.1. vençur kapitalı fondunun, idarəçinin (olduqda), depozitarın və auditorun tam adı və yerləşdiyi ünvan;

9-12.2.2. qiymətləndiricinin və ya qiymətləndirici təşkilatın (olduqda) tam adı, fəaliyyət və ya hüquqi ünvanları;

9-12.2.3. vençur kapitalı fondunun investisiya strategiyası, şərtləri, istiqamətləri və sahələri haqqında məlumat;

9-12.2.4. vençur kapitalı fondunun aktivlərinin diversifikasiyası şərtləri;

9-12.2.5. investisiyaların həyata keçirilməsi ilə bağlı risklər;

9-12.2.6. investisiya fəaliyyətinə dair məhdudiyyətlər;

9-12.2.7. fondun aktivləri hesabına idarəçiyə, depozitara və digər şəxslərə ödəniləcək mükafatların, xərclərin və xidmət haqlarının hesablanma qaydaları və maksimum həcmi;

9-12.2.8. dividendlərin ödənilməsi qaydası;

9-12.2.9. vençur kapitalı fondundan və səhmdarlardan qanunla nəzərdə tutulmuş vergilər və onların ödənilməsi qaydası barədə məlumat;

9-12.2.10. vençur kapitalı fondunun fəaliyyətinə dair məlumatların açıqlanması qaydaları;

9-12.2.11. vençur kapitalı fondunun müddəti və investisiyalardan çıxış strategiyası;

9-12.2.12. investisiya bəyannaməsinə əlavə və dəyişikliklərin edilmə proseduru və investorların məlumatlandırılması qaydası;

9-12.2.13. investisiya portfelinə dair tərtib olunan hesabatın əsas valyutası;

9-12.2.14. bu Qanunun 9-1.10-cu maddəsində göstərilən məlumatlar.

9-12.3. Qapalı səhmdar cəmiyyəti formasında yaradılan lisenziyalaşdırılan vençur kapitalı fondunun investisiya bəyannaməsi onun səhm buraxılışı ilə birgə dövlət qeydiyyatına alınır. Səhm buraxılışının dövlət qeydiyyatı "Qiymətli kağızlar bazarı haqqında" Azərbaycan Respublikasının Qanununa uyğun olaraq həyata keçirilir. Azad hesabatlı vençur kapitalı fondunun investisiya bəyannaməsi isə fondun reyestrdə qeydə alınması zamanı Mərkəzi Banka təqdim edilir. 

9-12.4. Qapalı səhmdar cəmiyyəti formasında yaradılan vençur kapitalı fondununinvestisiya bəyannaməsi hər bir potensial investora təqdim edilməlidir.

Maddə 9-13. Kommandit ortaqlığı formasında yaradılan vençur kapitalı

fondunun təşkili və fəaliyyəti

9-13.1. Kommandit ortaqlığı formasında yaradılan vençur kapitalı fondu bu Qanunun 9-2-ci və 9-3-cü maddələrinə uyğun olaraq azad hesabatlı vençur kapitalı fondu və ya lisenziyalaşdırılan vençur kapitalı fondu rejimində fəaliyyət göstərə bilər.

9-13.2. Kommandit ortaqlığı formasında yaradılan vençur kapitalı fondunun tam ortaqları istisna olmaqla, digər ortaqlar (kommanditçi) fondun öhdəlikləri üzrə məsuliyyət daşımır və fondun fəaliyyəti ilə bağlı zərər üçün qoyduqları mayaların dəyəri həddində risk daşıyırlar.

Maddə 9-14. Kommandit ortaqlığı formasında yaradılan vençur kapitalı

fondunda idarəetmə

9-14.1. Kommandit ortaqlığı formasında yaradılan vençur kapitalı fondunda idarəetmə Azərbaycan Respublikasının Mülki Məcəlləsinə uyğun həyata keçirilir.

9-14.2. Kommandit ortaqlığı formasında yaradılan vençur kapitalı fondu ilə müvafiq müqavilələr bağlamış idarəçi, depozitar, auditor və qiymətləndirici, habelə onlara aidiyyəti olan şəxslər və onların nümayəndələri fondun iştirakçısı ola bilməz.

Maddə 9-15. Kommandit ortaqlığı formasında yaradılan vençur kapitalı

fondunun investisiya bəyannaməsi

9-15.1. Kommandit ortaqlığı formasında yaradılan vençur kapitalı fondunun investisiya bəyannaməsi fondun tam ortaqlarının qərarı ilə qəbul edilir.

9-15.2. Kommandit ortaqlığı formasında yaradılan vençur kapitalı fondunun investisiya bəyannaməsində aşağıdakılar göstərilir:

9-15.2.1. vençur kapitalı fondunun və idarəçinin (olduqda) tam adı və yerləşdiyi ünvan;

9-15.2.2. qiymətləndiricinin və ya qiymətləndirici təşkilatın (olduqda) tam adı, fəaliyyəti və hüquqi ünvanları;

9-15.2.3. fondun investisiya strategiyası, şərtləri, istiqamətləri və sahələri haqqında məlumat;

9-15.2.4. fondun aktivlərinin diversifikasiyası şərtləri;

9-15.2.5. investisiyaların həyata keçirilməsi ilə bağlı risklər;

9-15.2.6. investisiya fəaliyyətinə dair məhdudiyyətlər;

9-15.2.7. fondun aktivləri hesabına idarəçiyə digər şəxslərə ödəniləcək mükafatların, xərclərin və xidmət haqlarının hesablanma qaydaları və maksimum həcmi;

9-15.2.8. mənfəət və zərərin bölüşdürülməsi qaydası;

9-15.2.9. vençur kapitalı fondundan və iştirakçılardan qanunvericiliklə nəzərdə tutulmuş vergilər və onların ödənilməsi qaydası barədə məlumat;

9-15.2.10. fondun fəaliyyətinə dair məlumatların açıqlanması qaydaları;

9-15.2.11. vençur kapitalı fondunun müddəti və investisiyalardan çıxış strategiyası;

9-15.2.12. investisiya bəyannaməsinə əlavə və dəyişikliklərin edilmə proseduru və investorların məlumatlandırılması qaydası;

9-15.2.13. investisiya portfelinə dair tərtib olunan hesabatın əsas valyutası;

9-15.2.14. bu Qanunun 9-1.10-cu maddəsində göstərilən məlumatlar.

9-15.3. Kommandit ortaqlığı formasında yaradılan vençur kapitalı fondunun investisiya bəyannaməsinin təsdiq edilməsi barədə qərar fondun tam ortaqları tərəfindən qəbul edildikdən sonra 5 iş günü ərzində Mərkəzi Banka təqdim edilir. Mərkəzi Bank investisiya bəyannaməsini 10 iş günü ərzində qeydiyyata alır.

9-15.4. Kommandit ortaqlığı formasında yaradılan vençur kapitalı fondunun investisiya bəyannaməsi ictimaiyyətə açıqlanmır (dərc edilmir), lakin bütün iştirakçılara təqdim edilməlidir.

Maddə 9-16. Məhdud məsuliyyətli cəmiyyət formasında yaradılan vençur

kapitalı fondunun təşkili və fəaliyyəti

9-16.1. Məhdud məsuliyyətli cəmiyyət formasında yaradılan vençur kapitalı fondu yalnız azad hesabatlı vençur kapitalı fondu rejimində fəaliyyət göstərə bilər.

9-16.2. Məhdud məsuliyyətli cəmiyyət formasında yaradılan azad hesabatlı vençur kapitalı fondunun nizamnamə kapitalı iştirakçıların bəyan etdiyi ödənilməmiş kapital öhdəliyi prinsipi əsasında formalaşdırıla bilər. İştirakçılar nizamnamə kapitalındakı paylarını (kapital öhdəliyini) fondun nizamnaməsində və ya investisiya bəyannaməsində müəyyən edilmiş investisiya dövrü ərzində, vençur kapitalı fondunun və ya onun idarəçisinin yazılı tələbi əsasında, tələbdə göstərilən və 30 (otuz) iş günündən çox olmayan müddətdə ödəyirlər. İnvestisiya dövrü başa çatdıqda iştirakçıların tələb olunmamış və ödənilməmiş kapital öhdəliklərinə xitam verilir və fondun nizamnamə kapitalı faktiki ödənilmiş məbləğə qədər azaldılır.

9-16.3. İştirakçı kapital öhdəliyini yazılı tələbdə müəyyən edilmiş müddətdə icra etmədikdə, fondun nizamnaməsində və ya təsis sənədlərində nəzərdə tutulmuş qaydada həmin iştirakçıya qarşı aşağıdakı tədbirlərdən biri və ya bir neçəsi tətbiq edilə bilər:

9-16.3.1. ödənilməmiş məbləğə münasibətdə cərimələrin və ya dəbbə pulunun hesablanması;

9-16.3.2. fondun idarə edilməsində səsvermə hüququnun və fondun mənfəətindən (gəlirindən) pay almaq hüququnun məhdudlaşdırılması və ya dayandırılması;

9-16.3.3. iştirakçının fonddakı ödənilməmiş pay hissəsinin və ya əvvəllər ödəmiş olduğu məbləğlərin məcburi qaydada fondun digər iştirakçılarına, yaxud üçüncü şəxslərə (peşəkar investorlara) satılması.

9-16.4. Fondun iştirakçılarının sayı əllidən çox ola bilməz.

9-16.5. İştirakçılar fondun öhdəlikləri üzrə məsuliyyət daşımır və fondun fəaliyyəti ilə bağlı zərər üçün qoyduqları mayaların dəyəri həddində risk daşıyırlar.

9-16.6. Fondun fəaliyyət müddəti ərzində iştirakçının cəmiyyətdən çıxmaq və payının dəyərini tələb etmək hüququ nizamnamə ilə məhdudlaşdırıla bilər.

9-16.7. Məhdud məsuliyyətli cəmiyyət formasında yaradılan vençur kapitalı fondu azı iki iştirakçı tərəfindən yaradılır.

Maddə 9-17. Məhdud məsuliyyətli cəmiyyət formasında yaradılan vençur

kapitalı fondunda idarəetmə

9-17.1. Fondun ali idarəetmə orqanı iştirakçıların ümumi yığıncağıdır. Ümumi yığıncağın səlahiyyətləri Azərbaycan Respublikasının Mülki Məcəlləsinin 91.3-cü maddəsinə uyğun olaraq müəyyən edilir. Ümumi yığıncaq, o cümlədən, fondun idarəçisinin (icra orqanının və ya kənar idarəçinin) təyini və azad edilməsi məsələlərini həll edir.

9-17.2. Fondun cari fəaliyyətinə rəhbərlik təkbaşına icra orqanı (direktor) və ya kollegial icra orqanı tərəfindən həyata keçirilir. Fondun idarə edilməsi müqavilə əsasında kənar idarəçiyə verilə bilər.

9-17.3. Təsis sənədlərində nəzərdə tutulduğu halda fondun mənfəəti və zərəri iştirakçılar arasında onların nizamnamə kapitalındakı paylarına mütənasib olmayan qaydada bölüşdürülə bilər.

Maddə 9-18. Məhdud məsuliyyətli cəmiyyət formasında yaradılan vençur

kapitalı fondunun investisiya bəyannaməsi

9-18.1. İnvestisiya bəyannaməsi iştirakçıların ümumi yığıncağının qərarı ilə qəbul edilir.

9-18.2. Məhdud məsuliyyətli cəmiyyət formasında yaradılan vençur kapitalı fondunun investisiya bəyannaməsində bu Qanunun 9-12.2-ci maddəsində qeyd edilən məlumatlar göstərilir.

9-18.3. İnvestisiya bəyannaməsi ictimaiyyətə açıqlanmır (dərc edilmir), lakin fondun reyestrdə qeydə alınması zamanı Mərkəzi Banka və hər bir investora təqdim edilməlidir.";

4.4. aşağıdakı məzmunda 10.8-ci, 13.2-1-ci və 14.1.1-1-ci maddələr əlavə edilsin:

"10.8. Vençur kapitalı fondu kimi fəaliyyət göstərən qapalı paylı investisiya fondunun pay mülkiyyətçilərinin (peşəkar investorlarının) ümumi sayı yüzdən çox ola bilməz.";

"13.2-1. Vençur kapitalı fondu fəaliyyəti ilə məşğul olan qapalı paylı investisiya fondunun idarə edilməsi qaydalarında bu Qanunun 13.2-ci maddəsində qeyd olunan məlumatlardan əlavə idarəçinin peşəkar investorlardan cəlb edilən pul vəsaitlərinin bu Qanunun 9-1.3-cü maddəsində nəzərdə tutulan məqsədlərə və Mərkəzi Bank tərəfindən müəyyən edilmiş qaydada investisiya qiymətli kağızlarına investisiya edəcəyi ilə bağlı şərt əlavə edilməlidir.";

"14.1.1-1. vençur kapitalı fondu fəaliyyəti ilə məşğul olan qapalı paylı investisiya fondunun peşəkar investorlardan cəlb edilən pul vəsaitlərinin bu Qanunun 9-1.3-cü maddəsində nəzərdə tutulan məqsədlərə və Mərkəzi Bank tərəfindən müəyyən edilmiş qaydada investisiya qiymətli kağızlarına investisiya edilməsi haqqında məlumat;";

4.5. 24-cü maddə üzrə:

4.5.1. 24.2-ci maddənin birinci cümləsinə "İdarəçi" sözündən sonra "(investisiya şirkətləri istisna olmaqla)" sözləri əlavə edilsin;

4.5.2. aşağıdakı məzmunda 24.13-cü maddə əlavə edilsin:

"24.13. Vençur kapitalı fondları müvafiq olaraq məhdud məsuliyyətli cəmiyyətinin və ya qapalı səhmdar cəmiyyətinin icra orqanı və ya kommandit ortaqlığının tam ortağı (ortaqları) tərəfindən idarə olunduğu halda kənar idarəçi cəlb etməyə bilər.";

4.6. 25.11.5-ci maddənin birinci abzasına və 25.11.6-cı maddəyə "idarəçi" sözündən sonra ", kommandit ortaqlığı formasında yaradılan vençur kapitalı fondunun işlərini aparan tam ortağı (ortaqları)" sözləri əlavə edilsin;

4.7. 27-ci maddə üzrə:

4.7.1. 27.1.1-ci və 27.2.4-cü maddələrə "üzvü" sözündən sonra "(kommandit ortaqlığı formasında yaradılan vençur kapitalı fondunun işlərini aparan tam ortağı (ortaqları)" sözləri əlavə edilsin;

4.7.2. 27.2.5-ci maddəyə "yığıncağının" sözündən sonra "(kommandit ortaqlığı formasında yaradılan vençur kapitalı fondunun tam ortağı (ortaqları)" sözləri əlavə edilsin;

4.7.3. 27.2.5-1-ci maddəyə "orqanı" sözündən sonra "(kommandit ortaqlığı formasında yaradılan vençur kapitalı fondunun işlərini aparan tam ortağı (ortaqları)" sözləri əlavə edilsin;

4.7.4. 27.2.9-cu maddəyə "üzvləri" sözündən sonra "(kommandit ortaqlığı formasında yaradılan vençur kapitalı fondunun işlərini aparan tam ortağı (ortaqları)" sözləri əlavə edilsin;

4.8. aşağıdakı məzmunda 29.1-1-ci maddə əlavə edilsin:

"29.1-1. Vençur kapitalı fondunun aktivləri pul vəsaitlərindən, hüquqi şəxslərin nizamnamə (şərikli) kapitalında iştirak paylarından (səhmlərindən), investisiya qiymətli kağızlardan və portfel şirkətlərinə verilən borclardan, gələcəkdə kapitala çevrilmə hüququ verən borc alətlərindən, digər investisiya fondlarında (o cümlədən vençur fondlarında) iştirak paylarından, habelə investisiya strategiyasına uyğun olaraq digər maliyyə aktivlərindən və digər maliyyə alətlərindən ibarət ola bilər. Vençur kapitalı fondunun aktivlərinin tərkibinə və strukturuna dair tələblər Mərkəzi Bank tərəfindən qəbul olunmuş normativ xarakterli aktlarla müəyyən edilir.";

4.9. 30.2-ci maddəyə "edilməsini" sözündən sonra ", vençur kapitalı fondları həmçinin maliyyə hesabatlarının təqdim və dərc edilməsini" sözləri əlavə edilsin;

4.10. 36-cı maddə üzrə:

4.10.1. aşağıdakı məzmunda 36.1.9-1-ci və 36.1.9-2-ci maddələr əlavə edilsin:

"36.1.9-1. vençur kapitalı fondunun idarəçi tərəfindən idarə edilməsi nəzərdə tutulduqda vençur kapitalı fondunun idarə edilməsini həyata keçirəcək idarəçi barədə məlumat;

36.1.9-2. vençur kapitalı fondunun öz idarəetmə orqanları tərəfindən idarə olunması nəzərdə tutulduqda həmin idarəetmə orqanları barədə məlumat;";

4.10.2. 36.1.13-cü maddəyə "əməkdaşlarının" sözündən sonra "(vençur kapitalı fondlarında baş mühasib (bu vəzifələri icra edən şəxs mövcud olduqda)" sözləri əlavə edilsin;

4.10.3. 36.1.15-ci maddədə "səhmdarları" sözü "iştirakçıları" sözü ilə əvəz edilsin;

4.11. 38.2.1-ci maddəyə "fondunun" sözündən sonra "və bu Qanunun 24.13-cü maddəsində göstərilən hal istisna olmaqla vençur kapitalı fondunun" sözləri əlavə edilsin;

4.12. 40-cı maddə üzrə:

4.12.1. 40.2-ci maddəyə "üzvü" sözündən sonra ", habelə kommandit ortaqlığı formasında yaradılan vençur kapitalı fondunun işlərini aparan tam ortağı (ortaqları)" sözləri əlavə edilsin;

4.12.2. 40.4-cü maddəyə "barəsində" sözündən sonra ", habelə kommandit ortaqlığı formasında yaradılan vençur kapitalı fondunun işlərini aparan tam ortaq (ortaqlar) müəyyən olunduqda və dəyişdirildikdə" sözləri əlavə edilsin;

4.12.3. 40.4-2-ci maddədə "verməlidir" sözü "verməli, habelə kommandit ortaqlığı formasında yaradılan vençur kapitalı fondunun tam ortağının (ortaqlarının) işlərin aparılması səlahiyyətinə xitam verməlidir" sözləri ilə əvəz edilsin;

4.13. 41-ci maddə üzrə:

4.13.1. 41.1.1-ci maddəyə "orqanının" sözündən sonra "(kommandit ortaqlığı formasında yaradılan vençur kapitalı fondunun tam ortağının (ortaqlarının)" sözləri əlavə edilsin;

4.13.2. aşağıdakı məzmunda 41.1.1-1-ci maddə əlavə edilsin:

"41.1.1-1. idarəçi tərəfindən idarə olunan vençur kapitalı fondunun idarəçisi tərəfindən vençur kapitalı fondunun bütün səhmləri və ya payları satın alındıqda;";

4.13.3. 41.3-cü maddənin ikinci cümləsinə "fondu" sözündən sonra "və bu Qanunun 24.13-cü maddəsinin tələbi nəzərə alınmaqla vençur kapitalı fondu" sözləri əlavə edilsin;

4.14. 45-ci maddə üzrə:

4.14.1. 45.2.1-ci maddədə, 45.3-cü maddənin birinci cümləsində və 45.8-ci maddədə ismin müvafiq hallarında "yığıncağı" sözündən sonra ismin müvafiq hallarında "(kommandit ortaqlığı formasında yaradılan vençur kapitalı fondunun tam ortağı (ortaqları)" sözləri əlavə edilsin;

4.14.2. 45.9-cu maddəyə "orqanına" sözündən sonra "(kommandit ortaqlığı formasında yaradılan vençur kapitalı fondunun tam ortağına (ortaqlarına)" sözləri əlavə edilsin;

4.14.3. 45.14-cü maddənin ikinci cümləsinə "səhmdarlar" sözündən sonra "(kommandit ortaqlığı formasında yaradılan vençur kapitalı fondunun tam ortağı (ortaqları)" sözləri əlavə edilsin;

4.15. 46-cı maddə üzrə:

4.15.1. 46.4-cü maddənin birinci cümləsinə "yığıncağının" sözündən sonra "(kommandit ortaqlığı formasında yaradılan vençur kapitalı fondunun tam ortağının (ortaqlarının)" sözləri əlavə edilsin;

4.15.2. 46.16-cı maddəyə "orqanına" sözündən sonra "(kommandit ortaqlığı formasında yaradılan vençur kapitalı fondunun işlərini aparan tam ortağına (ortaqlarına)" sözləri əlavə edilsin;

4.15.3. 46.17.2-ci maddəyə "səhmdarlarının" sözündən sonra "(kommandit ortaqlığı formasında yaradılan vençur kapitalı fondunun iştirakçılarının)" sözləri əlavə edilsin;

4.16. 46.25-ci maddənin üçüncü cümləsinə "səhmdarlar" sözündən sonra "(kommandit ortaqlığı formasında yaradılan vençur kapitalı fondunun iştirakçıları)" sözləri əlavə edilsin;

4.17. 48-ci maddə üzrə:

5.17.1. 48.1.4-cü maddəyə "mülkiyyətçilərinin" sözündən sonra "(səhmdarlarının)" sözü əlavə edilsin;

4.17.2. 48.1.6-cı maddəyə "üzvləri" sözündən sonra "(kommandit ortaqlığı formasında yaradılan vençur kapitalı fondunun işlərini aparan tam ortağı (ortaqları)" sözləri əlavə edilsin;

4.17.3. 48.4-cü maddənin birinci cümləsinə "fondları" sözündən sonra "(vençur kapitalı fondları istisna olmaqla)" sözləri əlavə edilsin.

Maddə 5. "Qiymətli kağızlar bazarı haqqında" Azərbaycan Respublikasının Qanununda (Azərbaycan Respublikasının Qanunvericilik Toplusu, 2015, № 7, maddə 813 (Cild I); 2025, № 4 (I kitab), maddə 318, № 5, maddə 432, № 7, maddə 613) aşağıdakı dəyişikliklər edilsin:

5.1. aşağıdakı məzmunda 1.0.7-1-ci maddə əlavə edilsin:

"1.0.7-1. peşəkar investor - institusional investorlar da daxil olmaqla Azərbaycan Respublikasının Mərkəzi Bankı tərəfindən müəyyən olunan tələblərə cavab verən hüquqi və fiziki şəxslər;";

5.2. 5.5.5-ci maddədə "institusional" sözü "peşəkar" sözü ilə əvəz edilsin.

Azərbaycan Respublikasının Prezidenti