MƏSİMLİ Əli Əhməd oğlu

Dairə: 114 saylı Şəki kənd birinci

1953-cü il yanvarın 3-də Şəki şəhərində anadan olmuşdur. Azərbaycan Xalq Təsərrüfatı İnstitutunun Siyasi iqtisad fakültəsini bitirmişdir. İqtisad elmləri üzrə fəlsəfə doktorudur. İqtisadiyyatın aktual problemlərinə dair 1300-dən çox məqalə, elmi-nəzəri araşdırma, elmi-kütləvi çalışma, təhlil, açıqlama, müsahibə, çıxış və şərhlərin müəllifi, 3 kitabın və 1 broşürün həmmüəllifidir. Tədqiqatlarının nəticələri bir sıra xarici ölkələrdə nəşr edilmişdir. Rus dilini bilir.
1975–1980-ci illərdə hərbi xidmət keçmiş, aspiranturada təhsil almışdır. 1980-ci ildən Azərbaycan EA-nın İqtisadiyyat İnstitutunda laborant, kiçik elmi işçi, elmi işçi, şöbə müdiri işləmişdir. 1991–1992-ci illərdə Azərbaycan Respublikası Prezidenti Aparatının İqtisadiyyatın idarə edilməsinin təşkili şöbəsinin bölmə müdiri, Sosial-iqtisadi inkişaf şöbəsinin baş məsləhətçisi, 1992–1993-cü illərdə Azərbaycan Respublikası Xarici İnvestisiyalar Komitəsinin sədri, Azərbaycan Respublikası Baş nazirinin birinci müavini, Dövlət İqtisadiyyat və Planlaşdırma Komitəsinin sədri, Baş nazir əvəzi, iqtisadiyyat naziri vəzifələrində çalışmışdır. 1989–2004-cü illərdə AXC(P)-nin İqtisadiyyat komissiyasının sədri, iqtisadi məsələlər üzrə sədr müavini, Azad Demokratlar Birliyi Təşkilat Komitəsinin sədri, 1993–2005-ci illərdə «Müstəqil İqtisadçılar Birliyi» ictimai təşkilatının prezidenti olmuşdur. 2010-cu ildən İqtisadi və Sosial İnnovasiyalar İnstitutunun rəhbəridir.
Bitərəfdir.
Üçüncü, dördüncü və beşinci çağırış Azərbaycan Respublikası Milli Məclisinin deputatı olmuşdur.
Milli Məclisin İqtisadi siyasət, sənaye və sahibkarlıq komitəsi sədrinin müavinidir. Azərbaycan-Vyetnam parlamentlərarası əlaqələr üzrə işçi qrupunun rəhbəri, Avstriya, Çin, İsveç, İsveçrə, Küveyt, Mavritaniya, Norveç, Ukrayna, Yaponiya parlamentləri ilə əlaqələr üzrə işçi qruplarının üzvüdür.
GUAM-ın Parlament Assambleyasında Azərbaycan nümayəndə heyətinin üzvüdür.
Evlidir, 2 övladı var

Partiya mənsubiyyəti: Bitərəf

Azərbaycan Respublikasının Milli Məclisi — Azərbaycan Respublikasında qanunvericilik hakimiyyətini həyata keçirən dövlət hakimiyyəti orqanı. Birpalatalı orqan olub 125 deputatdan ibarətdir. Deputatlar majoritar seçki sistemi, ümumi, bərabər və birbaşa seçki hüququ əsasında sərbəst, şəxsi və gizli səsvermə yolu ilə seçilirlər. Azərbaycan Respublikası Milli Məclisinin hər çağırışının səlahiyyət müddəti 5 ildir.

AZ EN RU