AZƏRBAYCANDA TENNİSİN İNKİŞAFINA BÖYÜK POTENSİAL VAR

Sentyabrın 3-də Milli Məclisin Sədri, Azərbaycan Tennis Federasiyasının prezidenti Oqtay Əsədov ölkəmizdə səfərdə olan  Avropa Tennis  Assosiasiyasının prezidenti Con Ceymsin  başçılıq etdiyi  nümayəndə heyəti ilə görüşdü.

Görüşdə Spiker, Azərbaycan Tennis Federasiyasının prezidenti Oqtay Əsədov  müstəqil  Azərbaycanın  idman aləmində tanınan ölkə olduğunu qeyd etdi, ölkəmizdə idmanın inkişafına göstərilən dövlət qayğısının böyük  nailiyyətlərə  təməl olduğunu vurğuladı. Son iki olimpiadada  idmançılarımızın qazandıqları uğurlardan söz açdı. İdmanın digər növlərində olduğu kimi, tennis oyununda da yüksək nailiyyətlər əldə etməyin  vacibliyini vurğuladı. Bu istiqamətdə həyata keçirilən tədbirlərdən  bəhs etdi.

Spiker bildirdi ki, ölkəmizin bütün bölgələrində müasir tipli idman qurğuları quraşdırılır, olimpiya idman kompleksləri inşa olunur. Əsas məqsəd idmanın bütün növlərinin inkişafı üçün yaxşı şərait yaratmaqdır.  Ölkəmizdə gözəl  ənənələri və böyük potensialı olan tennis idmanının  da yüksəlişi, inkişafı  üçün  hər cür şəraitə malik tennis mərkəzi  tikiləcəkdir. 

Azərbaycan Tennis Federasiyasının prezidenti Oqtay Əsədov ölkəmizdə idmanın bir çox növləri üzrə dünya çempionatlarının, beynəlxalq turnirlərin keçirildiyi, o cümlədən tennis  yarışları barədə də ətraflı məlumat verdi.  Ümidvar olduğunu bildirdi  ki, Avropa Tennis Assosiasiyası prezidentinin  Azərbaycana səfəri idmanın bu sahəsinin inkişafına, həmçinin  federasiyalar arasında əlaqələrin möhkəmlənməsinə güclü təkan verəcəkdir.

Avropa Tennis Assosiasiyasının  prezidenti Con Ceyms  səmimi qəbula və ətraflı məlumata görə təşəkkür etdi. Azərbaycan Tennis Federasiyasının prezidenti ilə ötən il Londondakı görüşlərini xatırladı. Qonaq  Azərbaycanda idmanın inkişafına göstərilən  qayğıdan, yeni idman qurğularının istifadəyə verilməsindən məmnunluğunu ifadə etdi. Qeyd etdi ki, Azərbaycanda tennisin inkişafı üçün də  böyük potensial vardır. Avropa Tennis Assosiasiyası  bu sahənin inkişafı üçün ölkəmizə  hər cür köməklik göstərməyə hazırdır.

Görüşdə qarşılıqlı maraq doğuran bir sıra  məsələlər ətrafında geniş fikir mübadiləsi aparıldı.

Milli Məclisin

Mətbuat xidməti